#lockenhaus

En 1980, o violinista letón Gidon Kremer (Riga, 1947) acomete a súa primeira gravación das partitas para violín só de J.S. Bach, BWV 1002, 1004 e 1006. Daquela, o talentoso músico de orixe xudía-alemá (o seu pai fora un sobrevivente do Holocausto), alumno do grande mestre ruso David Oistrakh no Conservatorio de Moscova, fora declarado “persona non grata” na URSS, tendo así que abandonar o país para continuar a súa carreira na Europa Occidental.

Vinte anos despois desa gravación das partitas, no 2001, o músico desprázase ao val de Gülls, na rexión austríaca do Burgenland, para pecharse alí durante varios días e preparar unha nova interpretación e gravación desas pezas bachianas. Será en Lockenhaus, na igrexa barroca de Sankt Nikolaus; a súa vinculación con ese lugar viña de lonxe, pois en 1981, xunto co parroco local - Josef Herowitsch - fundara alí un festival de música de cámara, o “Lockenhaus Kammermusikfest”, que desde entón ten lugar cada verán nesa localidade austríaca. Kremer experimentara un longo silencio en relación ás partitas de Bach, pois neses vinte anos non as volvería tocar nunca máis en público.

O filme que presentamos aquí, Gidon Kremer - Back to Bach (versión orixinal en alemán con subtítulos en español), dos realizadores Daniel Finkernagel e Alexander Lück, mostra ese regreso de Kremer ás pezas bachianas despois de tantos anos, no que será, seguramente, o encontro máis importante do violinista co seu admirado compositor. Ademais, a fita permítenos coñecer de primeira man a súa visión acerca desa música e o modo en que ela o marcou profundamente, tanto na súa vida persoal, como musical.

É tamén un documental sobre o rico proceso de reflexión musicolóxica arredor desas partituras, así como sobre a preparación metódica dunha interpretación e unha gravación por parte dun músico tan extraordinario como Gidon Kremer. Os realizadores seguiron a carreira de Kremer durante cinco anos e no filme a cámara acompaña o violinista ao longo dunha semana, nun diálogo moi próximo e íntimo en torno á música de Bach, mais tamén a outros aspectos persoais e biográficos do propio Kremer. Todo ese material deita unha luz nova e intensa sobre as partitas de J.S. Bach, un compositor que, en palabras do propio Gideon Kremer, “acompaña un músico para toda a súa vida”.