Ibera Polio

Dokumento trovita en la Organiza guglodisko priskribas planojn de "granda purigo" por "forigi la perfidulojn de Esperantujo". Laŭ metadatumoj, tra la kreintoj kaj posedantoj de la dokumento estas la TEJO-prezidinto Albert Stalin Garrido, konstatis esploro-teamo de Ibera Polio.

Dokumento trovita en la Organiza guglodisko priskribas planojn de "granda purigo" por "forigi la perfidulojn de Esperantujo". Laŭ metadatumoj, tra la kreintoj kaj posedantoj de la dokumento estas la TEJO-prezidinto Albert Stalin Garrido, konstatis esploro-teamo de Ibera Polio.

En disko de Guglo de la Tutmonda Esperantista Junulara Organizo (TEJO), nomata de la stabanoj “TEJO-Oficejo”, estis trovita dosiero kun ampleksaj priskriboj de plano por “purigi” Esperantujon.

Laŭ informoj trovitaj en la metadatumoj, la 276-paĝa dokumento, nomata Granda Purigo de Esperantujo, estis verkita en 2022 kaj, malgraŭ esti nuntempe posedita de la TEJO-retadreso, estis kreita de Albert Garrido. Ankaŭ en 2022 okazis la ekprezidantiĝo de Stalin Garrido ĉe TEJO. Indikoj montras, ke la unuaj skizoj de la teksto jam ekzistis antaŭ lia elektiĝo.

La teksto detaligas la planojn de Garrido por “forigi" la anojn de Esperanto-organizoj, kiuj "estas ideologie danĝeraj por Esperantujo". Ĝi priskribas strategiojn por "perforte kabeigi" homojn, samkiel por forigi pruvojn de la ĉeesto de tiuj homoj, kiel bildredaktado. La listo de forigendaj homoj enhavas interalie raŭmistojn, desubismajn finvenkistojn, redaktantojn de Libera Folio, esperantistojn je “alta kaj mezalta risko de kabeiĝo", homojn "suspektinde” aktivajn en la Tokipono-komunumo kaj "eblajn kaŝajn Idistojn”.

Kontaktita de la redaktistaro de Ibera Polio por prikomenti la temon, Albert Stalin Garrido ne respondis. Kaj kiam la nuna ĜenSek provis transdoni la posedon de la dosiero al la retadreso de Albert, la invito estis rizufita. Aldonindas, ke post unu tago, unu el niaj redaktistoj ricevis anoniman mesaĝon enhavantan la vortojn “Vi vicas en la listo".

Reage al la doganpolitiko de Trump, kiu haltigis ĝiajn libropakaĵojn al Usono, UEA decidis firme respondi.

"La evoluo de la doganaj reguloj ne estas nura administracia malsimpligo. Tio estas agresa politika decido, kiu celas malplifortigi la ekonomion de Esperantujo", asertis la prezidento de UEA Fernando Maia. "Temas pri forta krizo kaj ni nun devas pretiĝi al ĉiuj eblaj situacioj. UEA nun komerce militas kontraŭ Usono".

Responde al la demandoj de Ibera Polio pri kiel konkretiĝos ĉi tiu komerca milito, Fernando Maia elvokis radikalajn sankciojn fare de la asocio. "Ni unue malpermesos al niaj volontuloj tagmanĝi ĉe McDonald's. Tio estas nun nenio alia ol kontraŭesperantuja perfidago, kaj plie pro tio la roterdama sidejo nuntempe plenas je rubaĵaĉoj. Due, la kanto de La perdita generacio "Ĉiuj Ni Amegas Usonon" memkompreneble estos malpermesita sur la teritorio de Esperantujo, kaj ajna leĝorompinto riskos devigan porĉiaman kabeigon, se vi komprenas, kion mi celas", aldonis li kun malica rideto.

Kontaktite, la administracio de Trump ne reagis al la demandoj de Ibera Polio.

Post almeti Pikaĉu-balonon al la tombo de Zamenhof en Varsovio, senrespektaj junuloj de Esperanto senlime nun faligis statuon de la majstro en Bjalistoko. Unu el la sencerbulaĉoj atestis al Ibera Polio ke tio estis bonusa defio de la vojaĝkonkurso.

Laŭ la prezidanto de UEA Duncan Charters, kiu anoncis oficialan plendon en la kortumo de Bjalistoko, "ĉi tiuj bastardidoj pagos".

Libera Folio decidis maldungi unu el siaj kunlaborantoj pro surprize senskandala IJK. La kunlaboranto sendita en Šventoji fiaskis rimarki ion ajn interesan, klarigis anonima membro de la redakcio de LF.

La maldungito mem kulpigas la litovajn leĝojn kontraŭ alkoholo kaj la baltan maron, kies ŝtormemo kaj malvarmeco laŭ li probable malallogis Galekson.