#nerdplanet

بمعنى مثلا واحد صاحب شركة وعاوز حد يعمله تصميم شعار لمنتج او حد يكتبله مقال او حد يترجمله حاجة ، او برنامج يعمل حاجة معينة او موقع لشركته او خدمة بتقدمها شركته ، او عاوز واحد يدخل بيانات ، او يجمع بيانات ، أو يتولى مهمة التسويق الإلكتروني ..إلخ ، الطبيعي ان العميل اللي عاوز الخدمة هيدور في السوق المحلي عن حد يعمله اللي هو عاوزه وهيبقى مربوط بسعر السوق اللي هو فيه ونسبة الاختيارات قليلة قدامه، أو يقرر انه يعين واحد في شركته عشان يعمل اللي هو طالبه ، بس موضوع تعيين حد ده ممكن يكون مرهق ماليا للشركة ، عشان لازم يوفر مكان وعقد ومميزات ومرتب ثابت وممكن يعين واحد ويطلع اي كلام فيدور على واحد تاني ، كل ده وقت وفلوس ضايعين ، فالعميل ده هيخش على مواقع الفريلانسينج اللي تعتبر سوق عالمي لكل المهارات ، هيخش يقول انا عاوز حد يعملي الحاجة الفلانية بالسعر الفلاني ، الطلب ده هيظهر لكل الفريلانسرز اللي موجودين على الموقع ده وعندهم المهارات اللي طالبها الراجل صاحب الشركة ، فهيتقدموا للشغلانة دي ، وكل واحد يسوق لنفسه وسط منافسة شرسة من كل اللي عندهم المهارة اللي هو طالبها ، وكل واحد بيتفنن في أسلوب عرض خبراته السابقة ويعرض نماذج من شغله على الراجل وكل ده في خطاب التقديم ، الراجل صاحب الشركة يدرس العروض اللي متقدماله وبعدين يقرر يختار مجموعة من اللي اتقدموا عشان يعمل معاهم مقابلات من خلال اي برنامج اتصال على النت زي سكايب او غيره ، ومن خلال المقابلة دي بيتناقش مع الفريلانسر وعلى اساس اقتناعه بالسعر وبالكفاءة بيقرر انه يختار حد معين ليبدأ في التنفيذ فورا ، وبعد ما الفريلانسر يخلص الشغل ،صاحب الشركة ممكن يطلب تعديلات او يقرر يزود حاجات تانية بسعر جديد عشان شغلك عجبه او ينصب عليك وما يدفعلك فلوس وهنتكلم بعد كده ازاي تتجنب النصابين وده سهل .. الفريلانسينج ده المجال الوحيد اللي مفهوش كوسة ومحسوبية ، شغلك ومهارتك هي واسطتك. 

طب ليه العميل بيحب يشتغل مع عامل حر ؟

اولا سهوله التعامل معاه وانه يقدر يوصلك ويقابلك وتقابله او تكون على تواصل معاه على الانترنت عن طريق برنامج زى سكايب مثلا .

ثانيا الوقت ,  احيانا بيكون العميل مستعجل و صعب يتعامل مع تعقيدات الشركات فـ بيكون محتاج حد حر يقدر يتعامل بسرعة بدون تعقيد

ثالثا الفلوس طبعا واللى هو بتبقى اهم جزء فى الفرى لانس انه بيحتاج حد سعره كويس

  طب ايه اصعب حاجة ممكن تقابلك لما تشتغل فى العمل الحر ؟

1-     الدخل مش هيكون مستقر خصوصا فى البدايات فـ حاول متستسلمش بسهولة و اصبر و حاول يبقى فيه مصدر دخل تانى فى البداية على قد ما تقدر

2-     التعامل مع العملاء بمختلف تفكيرهم وانك تقدر توصل معاه لحاجه مرضيه من الطرفين

3-     الوقت , هتحتاج وقت قد ايه فى كل مشروع هتبتدى تشتغل فيه فى البداية هيبقى الموضوع صعب انك تحدد وقت قد ايه لكن بعد كدة الموضوع هيبقى سهل بالخبرة .

طب ايه مواقع الفريلانسينج اللى اقدر اشتغل منها  ؟

مواقع الفريلانسينج كتيرة جدا بس اشهرهم و افضلهم :

1-     Odesk

2-     Freelancer

3-     Elance

4-     Peopleperhour

5-     Khamsat.com

الاربعة مواقع الاولى مواقع اجنبية تحتاج الى معرفة باللغة الانجليزية للتعامل مع العملاء , الموقع الخامس موقع عربى لمن يجد صعوبة فى التعامل مع الأنجليزية و لكن من الافضل انك تتقن الانجليزية لان المواقع دى بتوفر فرص اكبر و افضل بكتير و مشهورة اكثر على المستوى العالمى

يعنى مثلا موقع Odesk العملاء صرفوا عليه اكتر من 350 مليون دولار سنة 2012

متخيل الرقم :D

خد بالك من الحساب بتاعك فى المواقع دى لازم يبقى قوى جدا و حاول تحط فيه كل المهارات اللى بتتقنها و ركز فى كل كلمة بتكتبها و انه يبقى مفيش غلطات املائية فى اى حاجة كاتبها لأن فى عملاء بيركزوا فى الحاجات دى جدا

طب دلوقتى عرفت المواقع و عندى وقت فاضى اشتغل فيه ايه اللى ممكن اعمله ؟

فى مجالات كتير ممكن تشتغل فيها زى مثلا :

1-     برمجة تطبيقات الموبايل (اندرويد , ويندوزفون . IOS  )  و الكمبيوتر (بتحتاج انك تعرف جافا او C#  .... الخ)

2-     شغل الجرافيكس ( تصميم الفوتوشوب والثري دي ماكس.....الخ)

3-     عمل الفيديوهات الدعائية

4-     الكتابة ، كتابة مقالات او كتابة محتوى المواقع او تقارير .....الخ

5-     الترجمة ،  و كل ما تزيد حصيلة لغاتك كل ما تزيد فرصك

6-     التصوير بأنواعه

7-     ادخال البيانات وجمع معلومات

8-     ادارة المواقع وصفحات الفيسبوك

9-     التسويق الالكتروني والعادي

10-  ادارة الاعمال

اهم نقطة بقى بعد الكلام اللى فات , الدفع  :D

فى حالتين للحساب و الدفع فى المواقع دى :

الحالة الاولى السعر الثابت و دى بيبقى العميل محدد سعر محدد للمشروع بتاعه و انت بتتفق معاه على طريقة الدفع و نظامه و يفضل دائما فى حالات السعر الثابت يكون الدفع بنسبة 50-50 % 50 % مقدم قبل بدء الشغل و الاخرى بعد الانتهاء و فى حالة وجود تعديلات كبيرة فى الشغل ممكن تزود المبلغ

الحالة التانية و دى فى حالة المشاريع اللى هتحتاج وقت كبير بيبقى الحساب بالساعة و بيتم تحديد قيمة الساعة انك بتقسم المرتب بتاعك او اخر مرتب انت اخدته او المرتبات اللى ماشيه فى السوق على 22 يوم وده عدد ايام الشغل الفعلى فى الشهر على 8 ساعات ودى عدد الشغل الرسمى فى اليوم واللى بيطلع بتضربه فى 2 ده رقم ساعتك لو عندك احساس انو قليل زوده بنسبه تعادل خبرتك

الدفع بيكون عن طريق تحويل المبلغ على حسابك فى الموقع زى Odesk مثلا و بعد كدة تحول المبلغ لبنك من البنوك الاكترونية زى PayPal مثلا و ده يعتبر اشهر و افضل بنك الكترونى فى العالم و بيدعم تحويل الاموال لمعظم بلاد العالم

او بيكون عن طريق ان العميل بيحولك المبلغ على البنك الالكترونى مباشرة

بعد ما تتحول على البنك الالكترونى تقدر تستقبها على الفيزا* من اى بنك من دولتك

*هتحتاج تعمل فيزا من اى بنك محلى لربطه بالبنك الالكترونى لتحويل الاموال عليه

حاجات لازم تخللى بالك منها و انت شغال فى البداية  :

انك يكون عندك تواصل كويس مع اللى حواليك وتقدر تنتشر سواء عن طريق السوشيال ميديا او الاتصال المباشر بين الناس

  انك تبقى قادر على تقدير الوقت اللى حياخده منك المشروع والفلوس اللى حيتكلفها وده عمره ماحيجى من اول مره صح فمتقلقش لو فى اول مشاريع بتعملها ان مشروع حسيت انك اديتلو سعر قليل ومشروع وقت قليل ده طبيعى جدا مفيش حاجه حتطلع معاك مسطره سواء سعر او وقت كلو حيتظبط معاك بعد كده متقلقش

  متبداش مشروع جديد الا لما تكون دارسه كويس وعارف وقته مناسبك ولا لا لازم تكون عارف حجم المشروع كويس قبل ما تبداه متفرحش بالسعر العالى فى بروجيكت حياخد منك 6 شهور شغل مثلا

  خلى كل حاجه بينك وبين العميل بتاعك تكون عن طريق الميل افضل اى حاجه تانيه لا فيس بوك ولا سكايب ولا موبايل كل حاجه رسمى على الميل ودى نصحيه حتعرف قيمتها لما تجربها

  انت راس مالك الوقت بتاعك فمضيعش وقتك مع عميل باين عليه انو مش بتاع شغل ودى حاجه حتعرفها برده مع الوقت

متقلقش انك تحط شروطك على العميل حتى لو انت بادى ده بيزود منك مش بيقلل على فكره وحيخليك مرتاح جدا فى البروجيكت بتاعك لما الموضوع يتم … وشروطك دى طرق الدفع وحيستلم امتا وايه قبل ايه وكل الكلام ده

  خليك عارف دائما امتى تقول للعميل لا حتى لو كنت لسة مبتدئ يعنى مثلا لو هو من النوع المماطل فى ناس بعد ما توافق على سعر حاجه والدنيا تمام ممكن تغيب فتره وتيجى تانى ايه الاخبار طيب مينفعش دى تقل انا حبدأ ده دلوقتى وبلاش ده اصل الحكايه  احنا معادنا امتا طب خليها بكره …. حاجات كتير جدا بتبيلك ان الراجل ده مش بتاع شغل , العميل بقا المتردد اللى هو مش عارف هو عايز ايه … وده مشكله المصممين تحديداا و من الاحسن انك تحاول متضيعش وقتك مع الناس دى لان زى ما قلنا قبل كدة انت راس مالك الوقت بتاعك فبلاش تضيع وقتك على حاجات ممكن تعطلك مش هتفيدك

مينفعش العميل يطلب اضافات جديده غير المتفق عليها الا بفلوس اضافيه ومينفعش برده يطلب تعديل يغيرلك الموضوع 180 درجة

فى ناس كتير بتلاقيها شايفاك انت فرى لانس طيب اعملى دى مجانا كده …. مفيش مشكله فى المبدا ده بس فى حدود واهم حاجه يكون فى مقابل انت حتستفيد منه مش لازم يكون فلوس ممكن حيجيلك دعايا كويسه من وراه

تشتغل فين ؟ اشتغل فى اى مكان تقدر تخلص فيه شغلك مرتاح و يكون بعيد عن عوامل التشتيت لو انت سهل التشتيت مكان فاضى لو عندك , Workspace  و دى بقت كتيرة جدا الفترة دى , كافيه لو هتقدر تشتغل منه , او ممكن تأقلم نفسك على الشغل من البيت زى كدة 

انفوجرافيك بيوضح فوائد العمل الحر

للأنفوجرافيك بصورة اكبر من هنا

نتنمنى تكون المعلومات دى افادتكم و لاى مناقشات او استفسارات