“Magandang Umaga! Ako nga pala si Maria Ada, at ako’y lubos na nagagalak ‘pagkat binasa mo itong kuwento ko. Gusto ko sana mag-vlog, yung A Day of a life, D-Day with a life basta iyon. Nakita ko kasi iyon sa isang ale sa dyip, pinapanood niya yung bidyo ni Liza Soberano. Nais ko rin sanang ibahagi ang aking kuwento sa buong mundo, ngunit dulot ng kahirapan ay dito na lamang ako sa papel magbabahagi. Sa katunayan, kinuha ko nga lang itong papel at panulat kila Aling Nena. Nga pala ako’y labing-walong gulang na, at kami ay nakatira sa Tondo, Maynila, at isa kami sa bahagdan ng mga mahihirap na pamilya rito sa aming lugar. Ang bahay namin ay hanggang ikalawang palapag lamang at mayroong dalawang silid. Alaws pintura, ang aming pinto ay isang kalawanging yero, tasbu-tasbu ang bubong, at ang kurtina namin ay ang paskil ng “Nonoy’s Eatery” na nakuha lang namin diyan sa gidli-gidli. Ako ang panganay sa aming magkakapatid. Gusto n’yo bang malaman kung ilan kami? SAMPU! Oo, pusam! At ako ang nag-aalaga sa siyam kong kapatid! Hays! Andres Ada nga pala ang pangalan ng erpat ko, at Emelda Ada naman ang ermat ko. Hindi ko na papakilala mga kaputol ko, masyadong marami baka maburyong na kayo.
Ito na nga, ikukwento ko sa inyo kung paano ba tumatakbo ang aking buhay sa loob ng isang araw. Nagsisimula iyon sa tilaok ni JR, ang manok sa katabi naming bahay na sila Aling Nena. Alas-singko iyon ng umaga. Dahil wala akong selpon, o alarm clock, iyon na lamang ang nagpapagising sa akin. Ang laking utang na loob ko kay JR, kaya hindi ko alam ang mangyayari sa akin kapag naisip ni Mang Dodo na gawing sahog sa tinola si JR. Pagkatapos kong ayusin ang aking hinigaan, ay dali-dali ko namang ihahanda ang almusalan ng aking pamilya. Madalas, sardinas at tatlong gatang ng bigas ang aming almusal. Kung tutuusin, hindi ito sapat sa labindalawang miyembro ng pamilya. At syempre, ako rin ang maghuhugas sa huli. Hays! Ang hirap maging panganay! Sunod ko namang tutulungan ang aking ermat na maghanda ng kanyang ititindang pandesal, at sasamahan ko rin siyang ilako ang mga ito. Si Nenoy, ang kasunod sa aking pinakamatanda ang siya namang magbabantay sa walo ko pang kapatid habang kami ay wala sa bahay. Kami ay naglalako sa sakayan ng dyip doon sa tokan, kung saan din nag-aabang ng mga pasahero ang aking erpat. Mula alas siyete hanggang alas diyes ay naglalako kami roon. Bago sumapit ang alas onse, nakabalik na kami sa aming tahanan dahil maghahanda na ng tanghalian si ermat at habang ako naman ay maglilinis ng mga ginamit sa pagtitinda ng pandesal. Adobong pinagpag nga pala ang aming ulam noong nakaraan hanggang ngayon.
Matapos naming mananghalian, syempre ako muli ang maghuhugas. Si ermat naman ay pupunta na kila Aling Isabel upang maglaba. Bale mula ala una hanggang alas singko ay naroon si ermat, at mula alas tres hanggang alas singko ay binabantayan ko ang aking mga kapatid. Nasaan ako nung ala una hanggang alas dos? Naghahanap at nagtatanong-tanong ako kung saan maaaring mamasukan bilang katulong. Sa katunayan anomang trabahong ibigay sa akin ay gagawin ko. Nais ko kasing makapag-ipon hangga’t bata pa ako, at para na rin matulungan ang aking pamilya. Gusto ko ring mapag-aral ang aking mga kapatid, kahit hindi na ako. At sa oras na ako’y nakapag-ipon na, balak kong umalis dito sa Pilipinas, at sa ibang bansa kami maninirahan. Ang hirap kasi sa Pinas! Mas lalo lamang humihirap ang mga mahihirap! Marami pang mga tiwaling opisyal sa gobyerno. Nga pala ang paghahanap ko ng trabaho ay nilihim ko sa aking mga magulang. Kaya ikaw, ilihim mo rin sana ah? Bago mag-alas sais ay dapat nakapaghanda na ako ng aming hapunan dahil pauwi na ang aming magulang. Tulad ng aming umagahan, sardinas at tatlong gatang ng bigas ang madalas naming hapunan. Isang linggo na naming umagahan at hapunan iyon, pero dahil matumal ang kita ngayon ng aking erpat at ermat, baka saging na lamang ang aming kakainin sa susunod na linggo. Pagdating ng aking mga magulang ay maghahapunan na kami. Sabay-sabay, magkakalapit at kumpleto man kaming kumakain, ang aming mga loob sa isa’t isa ay magkakalayo at malabo.
Matapos ng hapunan, ako pa rin ang maghuhugas syempre. Si ermat at erpat, at ang aking mga kapatid ay magpapahinga na. Mga alas nuwebe ng gabi ay tahimik na ang aming bahay, ngunit maingay sa labas dahil may mga nag-iinuman, nag-aaway at marami pa. Ngunit, mga alas diyes, ay magsisimula nang mag-away sina erpat at ermat. Pinag-aawayan nila gabi-gabi ang pera, ang masama pa ay para bang kinasusuklaman na nila kaming mga anak nila. Para bang pabigat kami sa kanila. Hindi nila alam na naririnig namin lahat iyon. Noong una naming narinig silang mag-away tungkol doon, kami ay humahagulgol sa takot, lungkot, at sakit. Ngunit, tumagal ang panahon at kami’y nasanay na lamang. Ibinubuga ko na lamang sa hangin, at sabay pikit ng aking mga mata. Isang tilaok na naman ni JR ang aking maririnig.”
https://www.google.com/url?sa=i&url=https%3A%2F%2Fwww.philippines-expats.com%2Ftopic%2F21239-laundry-in-metro-cebu-city%2F&psig=AOvVaw0t5bKgOIp9n0JdWat34f8B&ust=1608346287310000&source=images&cd=vfe&ved=0CAMQjB1qFwoTCNiQ6oDD1u0CFQAAAAAdAAAAABAJ
https://www.google.com/url?sa=i&url=https%3A%2F%2Fwww.children.org%2Fsee-the-impact%2Fwhere-we-work%2Fasia-philippines&psig=AOvVaw2OLaiZX7x7i0F9wqCEw2cy&ust=1608346128807000&source=images&cd=vfe&ved=0CAMQjB1qFwoTCIDTif_E1u0CFQAAAAAdAAAAABAD
https://www.google.com/url?sa=i&url=https%3A%2F%2Fwww.ucanews.com%2Fnews%2Fthe-philippines-struggle-for-power-in-2016%2F74902&psig=AOvVaw0gkQT_bvELJO535_x49CDB&ust=1608345763674000&source=images&cd=vfe&ved=0CAMQjB1qFwoTCJCLnYnF1u0CFQAAAAAdAAAAABAD
https://www.google.com/url?sa=i&url=http%3A%2F%2Fwww.hardrainproject.com%2Fhrpl%3Fn%3D5648&psig=AOvVaw096fWi97wUxsf9sTlaIKpi&ust=1608345589332000&source=images&cd=vfe&ved=0CAMQjB1qFwoTCPDx5JrF1u0CFQAAAAAdAAAAABAD
https://www.google.com/url?sa=i&url=https%3A%2F%2Fwww.afd.fr%2Fen%2Factualites%2Fbreath-hope-street-children-philippines&psig=AOvVaw2ot3E0Et7k-r74xXv3ZrGU&ust=1608346955589000&source=images&cd=vfe&ved=0CAMQjB1qFwoTCMCi_bjF1u0CFQAAAAAdAAAAABAD
https://www.google.com/url?sa=i&url=https%3A%2F%2Fwww.facebook.com%2Fmanilatodaydotnet%2Fposts%2Ftignan-mga-jeepney-drayber-sa-tondo-manila-nakiisa-sa-busina-para-sa-pasada-upan%2F2617956508470939%2F&psig=AOvVaw345jN8i8-_co6y50uES76D&ust=1608346980550000&source=images&cd=vfe&ved=0CAMQjB1qFwoTCMCsrMTF1u0CFQAAAAAdAAAAABAD
https://www.google.com/url?sa=i&url=https%3A%2F%2Fwww.licas.news%2F2020%2F03%2F16%2Fmass-online-is-not-enough-philippine-parish-reaches-out-to-poor-under-quarantine%2F&psig=AOvVaw1cqg-npBoLoDCb4Ksh-aRA&ust=1608347119564000&source=images&cd=vfe&ved=0CAMQjB1qFwoTCPC7pojG1u0CFQAAAAAdAAAAABAD
https://www.google.com/url?sa=i&url=https%3A%2F%2Fit-it.facebook.com%2FMga-Isyu-at-Problema-sa-Pilipinas-Bunga-ng-mga-Pagbabago-sa-Asya-356984524332716%2Fphotos%2F&psig=AOvVaw3Vi_mmP67xEwLB1U_GEPMY&ust=1608347299410000&source=images&cd=vfe&ved=0CAMQjB1qFwoTCNDCwdzG1u0CFQAAAAAdAAAAABAD