#dulo

Tervel of Bulgaria (675-721) was the emperor of the Bulgarians in the early 8th century.

Ako'y magsisimula sa dulo

Kung saan mga luha'y tumulo

Kung saan may galit ang puso ko

Kung saan puno ng sugat ang mundo

Babango't magsisimulang muli

Patungo sa ilaw ng iyong ngiti

Magsusulat ng bagong tula

Habang nakatingin sa mga tala

Lahat ng nakita mo rito ay produkto lang ng imahinasyon ko. May mga bahagyang totoo. Inilapit ko naman sila sa katotohanan dahil ayokong magsinungaling. Pero inilayo ko rin nang bahagya sa katotohanan dahil masakit pa rin minsan ang mga sugat kapag nasasaling.

Walang kasiguraduhan ang damdamin ng tao. Kaya siguro pinili ko ring ilapag dito ang saloobin ko. Pagod na akong makalimutan ang mga ito dahil lang nabura ang word file sa laptop ko o nanakaw ang phone ko kung saan nakalagak lahat ng kanta at kwento ko. Gusto kong matandaan kung sino ako sa iba't ibang taon o panahon. Kasi sa totoo lang, makakalimutin ang puso ko.

Paminsan-minsan, gusto ko lang maalala paano ako mag-isip sa iba't ibang bahagi ng buhay ko, o kung paano ako tinrato ng buhay sa isang bahagi nito. Sabi ko nga, pabago-bago tayo, hindi habambuhay ganito ang pakiramdam ko o ganito ang mararanasan ko. Ginawa kong huling himlayan ang blog na ito para kahit hindi undas ay madalaw ko ang mga bersyon ng sarili kong namatay, nakalimutan, at tuluyang naglaho.

Puro tungkol sa akin mga nabanggit ko, ano? Ikaw ba, kumusta naman? Hindi ko man maririnig ang sagot mo, sana mabuti ang trato sayo ng buhay. Kung hindi man, sana kahit manatili ka lang. May gantimpala ang marunong maghintay. Ang bawat pagtitiis ay may patutunguhan.

Oh siya, masyado nang mahaba ang litanya ko. Sana Nahanapan mo ng kabuluhan ang pagbabasa ng mga salita at pangungusap sa iilang pahina ng mga kuda ko rito.

Hanggang sa muli,