#daluyong

Daluyong.

Binabaybay ko ang daan patungo sa iyo Mahirap, liko-liko puno ng lubak, masalimuot

Sa ilalim ng karagatan ng mga bituin Kumikislap, lumiliwanag ngunit hindi sumisilaw Nagbibigay ng tanglaw

Samahan mo pa ng simoy ng hangin Na nanunuot sa mga kalamnan Sabay sa tinig ng kapaligiran Nakabibinging katahimikan Na para bang hinehele ka sa iyong kinalalagyan

Sa aking pagtingala Nakita ko ang kadiliman Namangha sa liwanag na dala ng mga tala Ganito ko kagusto ang gabi Minahal ko na ang gabi Dahil patuloy nitong pinapaalala Ang ating pagsasama-sama

Ikaw at ako Tayong lahat Isa tayo sa mga bituin Kumikislap, lumiliwanag, sumasalamin sa inaasam na pangarap Hindi man sigurado o kabisado ang hinaharap

Walang tigil sa paghakbang, pag - awit, pag-indak pagluha, paghalakhak Pagbangon at pagtahak ng daan Hindi nag-aalinlangang salubungin Anumang ibinabato ng tadhana

Gaano man ito kabigat o gaano man kadilim Tulad ng mga tala Isa-isang lalabas, lilitaw, sisilip Sa kadilimang tila ba ating entablado

Ang tunay na tayo Magniningning, kikislap, ipapakita ang kani-kaniyang hawak Talino, talento, puso, pagkatao

Tayo mismo Ang babago sa takbo ng tadhana Tayo mismo Ang magbibigay liwanag, inspirasyon sa bawat tao.

At sa pagbaybay ko patungo sa iyo Nakita kita Nagkita-kita tayo

Katulad ng gabi Limitado ang ating oras Nakaguhit sa'ting mga palad Ang takda ng katapusan Matatapos ang kinang at kislap Ngunit hindi titigil sa pag-abot ng inaasam na pangarap

Magbubukas lang ng bagong kabanata Lilisanin ang kadilimang minsa'y naging entablado Yayakapin ang mga alaala ng tagumpay

Why?