Pagkilos sa PPM laban sa EJK
Napakaaliwalas ng kilos protesta. Walang matatayog na bandera Walang palakasan ng sigaw Ng pula o dilaw Walang malalaking plaka Ng organisasyon na nagdikta.
Ang mayron lang ay higit libong tao Kanya-kanyang dalang mga tono Ng galit at pagtanggi Sa kawalang hustisyang sila'y saksi Walang pakain. Mayroon lang iisang daing. Walang hakot Pero walang takot Na sumigaw at lumaban Sa mga naghahari-harian.
Walang naghahating kulay Mga karaniwang tao lamang na nabuhay. Ang dugo ng pagkagalit Sa katarungang tila nawawaglit.
Ang mayron lang ay simpleng trompa At laksa-laksang suporta Pinag-isa ng diwa na: Tama na! Itigil na! Ang pagpaslang At kawalang hustisya!
Napaka-organiko, Walang namilit na kahit sino, Namulat ng kusa sa totoo. Sino pa nga ba namang kaya pang pumikit? Sa mga dugong sa kalsada'y sumisirit. Sa patuloy na pagkitil Sa buhay ng maliliit. Kung ituring ay inutil.
Nawa magising na din ang mga iba’t ibang grupo. Na hindi ito panahon para mag-away-away tayo. Sa halip, damhin ang sigaw ng publiko, Ito nang matagal hinihintay nating pare-pareho. Ang mapagkaisa tayo sa iisang tono.
Sabay-sabay nating isigaw At mula sa kulay, tayo'y umigpaw, Tama na! Itigil na! Ang pagpaslang sa masa!
