كنبة صغيرة تمتص الحزن جيدًا

عشان كتبت هنا قبل كدا عن حبي لميسي، كل ذلك تغيّر؛ هو من الآن عدوي اللدود.. لا صباح ولا مسا ولا كلمة كويسة

من صغري بحب اللغات، بتخطفني فكرة إن الإنسان اخترع حاجة عشان يتواصل مع الآخر.. أنا بحب التواصل الحقيقي، في العادي كلامي قليل عشان بحس إن اللغة دي لازم نستخدمها بحساب.. بحب التواصل ويمكن عشان كدا حبيت الفن، الفن اني احكيلك حكاية أو ارسملك لوحة أو حتة مزيكا تخليك تحس مشاعر مجربتهاش، وبيجي في دماغك أسئلة عمرها ما جت على بالك.. يعني بالبلدي كدا أقولك من غير ما أقولك.. لعبة لذيذة، بتخلي أي حد عينه تنوّر لما اللي قصده يوصل يوصل بأقصر طريقة ممكنة..

راهنت نفسي ان الست اللي قاعدة ورايا وعمالة تتكلم ضاربة شعرها أكسجين.. طلعت بجد ضاربة أكسجين.. هضيف الموضوع دا لسلسة مواهبي الدفينة.. بعرف درجة لون الشعر من الصوت

مرة قابلت ست لذيذة اوي في شغلانة، عرفت نفسي بإني مبعرفش أقول لاء، وهي عرفت نفسها انها مبتعرفش تقول غير لاء.. وكل واحدة فينا من يومها عايزة تبدل مصائر مع التانية

النهاردة قلت لاء على حاجة في الشغل ومبسوطة أوي بنفسي.. مفيش خمس دقايق وحسيت اني بدمر مستقبلي المهني وإني هندم.. نجينا يا الله

في أغرب كوابيسي مكنتش أتخيل إني هبقى متحمسة أوي كدا عشان هاكل سلطة 🤓

بقالي أسبوع بسمع عبد الحليم حافظ، وحقيقي الراحة اللي بحسها وأنا بسمعه، بتخليني أتفهم الستات اللي كانوا عايزين ينتحروا لما عرفوا إنه مات..الرقة دي كلها ماتت، ما لازم نموت وراها طبعا

أحلى كومبليمو جالي على ريحتي لما دكتورة العلاج الطبيعي قالتلي ريحتك حبهان ، ايوه أنا جايبة البرفيوم مخصوص عشان ريحة الحبهان، المجد للقرفة والحبهان والقرنفل واللوز والبندق والمسك والياسمين في أي برفيوم