Progreso Ibaenyo

Part 2 of 2: Desisyon ng Energy Regulatory Commission na nagsasabing nagkaroon at nagsagawa ang Ibaan Electric Corporation ng sobrang singil sa kuryente na nagkakahalaga ng P31,313,600.41.

Ang Ibaan Electric Corporation ay pagmamay-ari ng pamilya ni EDRALYN JOY SALVAME na tumatakabo bilang Vice Mayor ng bayan ng Ibaan para sa May 9, 2016 election.

Base sa nakasaad sa larawan sa itaas, nag-apply ang Ibaan Electric na payagan sila ng ERC na magsagawa ng dagdag singil na may halagang P19 milyon. Ito umano ay UNDER RECOVERY o kulang ang kanilang singil sa kuryente, o di kaya ay lugi sila ng nasabing halaga.

Pero sa masusing pag-aaral at pagsusuri ng ERC, napatunayan na sa halip lugi ang Ibaan Electric ng P19 milyon, sobrang paniningil pa ang kanilang walang pangingiming ginawa. At umaabot ito ng P31 milyon. 

Kasama sa tiket ni Edralyn Joy Salvame si Reming Hernandez bilang Mayor ng bayan ng Ibaan. Kasama din nila ang primera konsehal ng bayan na si Juvy Mendoza na hindi pumirma sa resolusyon ng Sangguniang Bayan na humihiling sa ERC na hingan ang Ibaan Electric ng paliwanag sa deklarasyon ni Edralyn Joy Salvame sa Front Page Weekly Newspaper na matagal ng bayad o matagal na nilang naibalik sa pamamagitan ng pagbibigay ng REFUND ang nauna nilang sobrang singil, o OVER RECOVERY na nagkakahalaga ng P6.7 milyon. Bakit kaya hindi pumirma si Juvy Mendoza? Kinukunsinti ba niya ang ginawang sobrang paniningil ng Ibaan Electric? Sa paningin ba niya ay tama ang ginawa ng Ibaan Electric? Mas mahalaga ba sa kanya ang kapakanan ng Ibaan Electric kesa sa kapakanan ng mamamayan ng Ibaan?

Part 1 of 2: Desisyon ng Energy Regulatory Commission (ERC) na nag nagsasabi na nagkaroon at nagsagawa ang Ibaan Electric Corporation na pagmamay-ari ng pamilya ni EDRALYN JOY SALVAME ng halagang P31,313,600.41. Walang kamalay-malay ang mamamayan ng Ibaan na labis-labis na pala ang kanilang binabayaran sa kuryente.

Personalidad Sa Huling Hantungan Ni Ka Roger

Dumating na sa huling hantungan ang rebolusyunaryong anak ng bayan ng Ibaan na si KA ROGER ROSAL na nagsilbing Spokerperson ng New Peoples Army (NPA) sa mahabang panahon. Namatay siya noong isang taon, subalit nanatili sa kabundukan ang kanyang labi, hanggang sa ipina-abo na ang kanyang labi na siyang ibinaba sa bayang ng Ibaan.

Matapos ang misa, isang necrological service ang isinagawa sa Fr. Guido Gym ng Saint James Academy kung saan nagtapos siya ng high school. Pinangunahan nito ng mga sumusuporta sa adhikain ng NPA. At bilang pagpupugay, ilang personalidad ang nagsalita. Sabihin na nating "protocol", inasahan ng magsalit ang Punong Bayan ng Ibaan na si Mayor Danny Toreja na nagsabi na "kasama at kaisa siya ng pamilya ni Ka Roger. Si Mayor Danny Toreja ang nagsaayos at nakiusap sa SJA upang mapayagan na maisagawa ang necrological service dito. Nagsalita din ang Kapitan ng Brgy. Talaibon, ang barangay na pinagmulan ni Ka Roger, na humingi ng paumanhin sa anumang naging kakulangan ng kanilang barangayan sa pag-asikaso sa mga naghatid ng abo ni Ka Roger.

Nagsalita din si Ka Mati Guerra. Masasabi natin na, bukod sa mga kaanak ni Ka Roger at sa naunang dalawang nabanggit na nagsalita bilang mga may katungkulan sa bayan at barangay, isa si Ka Mati sa may karapatan na magsalita dahil na rin sa pagiging magkaklase at magkumpareng-buo nilang dalawa ni Ka Roger. Ayon kay ka Mati, "hindi ko ipinagyayabang, sa halip ay aking ikinararangal ko na kakilala ko si Ka Roger". Mula sa ibang dugo, si Ka Mati ang maituturing na pinakamalapit kay Ka Roger. Bilang patunay, nagbasa si Ka Mati ng isang liham mula kay Ka Roger na siyang nagpatotoo ng kanilang pagiging malapit sa isa't isa, ganun din ng kanilang ugnayan sa isa't isa. 

Bukod kay Ka Mati, maituturing din sa malapit kay Ka Roger si Ka Ading Tejada na, kahit sa maikling panahon, ay literal na nakasama ni Ka Roger sa pakikibaka para sa bayan. Isa pa din sa nagsalita ay si Cesar Marasigan. Ayon sa kanya, naging magkakilala sila ni Ka Roger noong panahong kumandidato si Ka Mati bilang Mayor ng Ibaan. Na may mga delikadong misyon na inuuutos sa kanya si Ka Roger na kanya namang tinutugunan. Na kahit nasa gobyerno daw siya bilang Konsehal ng bayan ng Ibaan ay tumatalima siya bilang paggalang at pagkilala kay Ka Roger. Na siya ang naging tulay upang malaman ang mga kaganapan noong namatay ang ina ni Ka Roger.