pathei mathos

Maligayang kaarawan.

Nalalaman mo na dalangin kong palagian ang patuloy na pagbuhos ng mga magagandang bagay sa iyong buhay. Dahil dito, sa araw na ito, sa halip ng nakaaantig na pagbati, nais kong magbigay ng ilang mga bilin at paalala para sa iyo.

Pangalagaan mo ang iyong sarili. Magpahinga, huminga, at huwag hayaan na sa trabaho lamang umiikot ang iyong mundo. Mahalaga rin ang paglalaan ng oras para sa mga bagay na nagpapasaya sa iyo.

Kumain ka nang masustansya. Ipagpatuloy ang iyong page-ehersisyo. Patuloy mo sana akong pasabikin sa mga ipinadadala mong litrato.

Huwag ding kalimutan ang pag-inom ng sapat na tubig—dahil alam mo naman na (ayon sa akin) ito ang solusyon sa lahat ng sakit at karamdaman sa mundo.

Maglaan ng oras para sa iyong mga kaibigan. Bumuo ng marami pang masaya at makulay na mga alaala kasama ang mga taong mahalaga sayo.

Bigyan mo ng pansin ang iyong pamilya, lalo na si Nanay, na laging naririyan para sa iyo. Labis ang aking pasasalamat sa kanyang buhay dahil nakapagpalaki siya ng isang mabuti at kamangha-manghang tao sa katauhan mo.

Huwag ka sanang magsawang ipamalas sa mundo ang iyong husay at talento. Dahil isa kang biyaya sa maraming tao. Isa ako sa mga taong humahanga sa iyo, at nalalaman kong marami pang tulad ko na tinitingnan ka bilang isang biyaya sa kanilang mundo.

Sumubok ka ng mga bagong bagay. Huwag mag-atubiling gawin ang mga bagay na nais mo pang matutunan at maranasan. Nalalaman mong ako ay laging nakasuporta lamang.

Gayundin, bilin ko rin sana na lagi mong ipaalala sa akin na iparamdam sa iyo kung gaano ka kahalaga sa akin. Pagsabihan mo ako sa mga pagkakataong nagiging masyado akong panatag at nakalilimutang bigyan ka ng kasiguraduhan sa pagmamahal ko sa iyo. Huwag mo sanang sarilinin ang iyong mga agam-agam. Kung kinakailangan, pagalitan mo ako. Huwag mong hayaang maging pabaya akong katuwang sa iyo, sapagkat ang tanging hangad ko ay maging kabalikat mo sa lahat ng pagkakataon—sa saya man o sa mga pagsubok na hatid ng mundo.

Tandaan at isabuhay mo sana ang mga bilin na ito. Dahil ang tanging hiling ko ay ang isang maligayang buhay para sa iyo.

At tila hinahamon ang kakayahan,

Pipiliin pa ring maglingkod at magmahal—

sa bata, sa bayan—