cee

Isang batang nangarap, matagal ang hinintay. Ngayo’y nasa hustong gulang na at sukdulang dugo’t pawis ang inialay. Dumating na ang pinaka-inaabangang araw, subalit hindi niya mapigilang itanong sa kanyang sarili: “‘Yon na 'yon?”

‘Yon na ‘yon? 🎓

ni Christine Ann Sy

Nakatuntong sa entablado, dala ang diploma. Wala pang sampung segundo sa harap ng masa, hawak ng dalawang palad ang bunga ng halos dalawang dekadang paghihirap—ito na 'yon? Ano na? Dapat na ba akong magsaya?

Pagbalik sa upuan, nanariwa ang lahat ng pinagdaanan. Ito na 'to? Nakakatakot pala—tila bumalik ako sa pagkabata, muling nangangapa. Ang inaasahang ligaya ay napalitan ng pagkabahala at alinlangan. Panibagong pakikibaka na naman. Karerang walang hanggan.

Ngunit hawak ko ang papel na simbolo ng aking pagsisikap—aking sandata sa panibagong laban. Ito na 'to. Isa-isa kong aabutin ang mga mithiin ng dating munting paslit na minsang nangarap abutin ang matayog na bituin. Handa na akong sumabak sa panibagong hamon sa labas ng silid-aralan: ang bagong kabanata ng buhay.