الآمنة🇮🇶

حبيبتي أمونة،

أعرف هسه إنتِ خايفة ومتعبة وتحسين الحياة مو واضحة أبد… بس أريد أطمنج، إنتِ راح تعيشين أشياء ما كنتِ تتوقعينها أبد. راح تسافرين، وتبدين حياة جديدة ببلد بعيد، وراح تصيرين أم لطفلين يحبوج بطريقة تخلي قلبج يذوب كل يوم.

راح تمرين بتعب وضغط وبكاء بليل محد يشوفه، خصوصاً ويا مسؤوليات الشغل والأمومة والتحديات اللي تمرين بيها ويا ولدج، بس تعرفين شنو؟ إنتِ راح تكونين أقوى مما تتخيلين.

راح تشتغلين وتساعدين ناس، ووجودج بحياة ناس كثير راح يفرق. راح تتعلمين شلون توقفين على رجلج حتى لمن تحسين الدنيا كلها فوق كتافج.

مو كل الأحلام راح تمشي مثل ما خططتلها، وبعض الناس اللي حبيتيهم راح يختفون من الطريق… بس بالمقابل، راح تكتشفين نفسج أكثر، وراح يصير عندج قلب أحن وأوعى.

أريد أكلج لا تستعجلين على نفسج، ولا تكرهين ضعفج. التعب اللي تمرين بيه هسه مو نهاية، هذا يبني المرأة اللي راح تصيرينها.