ببقى عارفة ببقى مستنية بس ولا مرة كانت سهلة

واحد منهم الفرق بيني وبينه سنة وكان معايا في الجامعة وكليته وكليتي جمب بعض ويمكن عمرنا ما رمينا السلام على بعض حتى، ولكن..

وقت الجامعة انا كنت موجودة على تويتر بقوة واتكعبلت في فيه وعملتله فولو والحقيقة كانت صدمة بالظبط زي ريأكشن نعناعة لما فتّح وقالهم هي دي بوسي؟ هي دي ملاك الرحمة!

بس انا بحب الشخصيات المختلفة دي وكنت بحب اراءه لكن برضه في صمت وعمرنا ما اتكلمنا

تمر الايام ويقع قدامي الاكاونت بتاعه على ساوند وبقيت ادخل مخصوص اشوفه بيشير ايه ذوقه حقيقي كان مميز كنت بحب الحاجات اللي بيسمعها اوي

خلصنا واتخرجنا وانا بعدت عن تويتر وبعدها عن الساوند كمان بعد التغييرات اللي حصلت فيه وانا كنت رافضاها تماما لحد من كام يوم ما الاقدار ودتني للساوند واول حاجة عملتها اني جريت ع الفيد اشوف مين لسة هناك وبيشير والاقي الشاب ده اول واحد فأسمع فأحب تاني وكإن السنين معدتش واحس اني رجعت بالزمن ١١ سنة