Esraa’s Whispers

الحياة كانت هتبقي أسهل بكتير لو كلنا عندنا ثقافة الإعتراف، وثقافة اننا منعلّقش لبعض المشانق بعد الإعتراف ونعرف نسامح … الحقيقة سهله أوي بس الكِبر بيعمي … سهل أوي تقول انا اسف، انا غلطت، انا قصّرت، انا كذبت وضعفت، سهل لكن احنا بنختار الصعب وبنلعب علي عاطفة الناس وذكائهم بإحدى الثقافتين : إما قلب الترابيزة أو المداومة في الكذب وانكار الاخطاء والصعبنة … والحقيقة ان الاعتراف اسهل بكتير خصوصاً ان محدش هيقوم يضربك .. انت انسان خطّاء وانا زيّك .. لو مغلطتش معاك اكيد غلطت مع غيرك ، وأن تعلم حق العلم أن خير الخطائين التوابون .. المعترفون .. النادمون .. الباقون .

ربنا خلقني عندي القدرة اقول اي شعور جوايا لأي شخص زي ماهو من غير تزييف، ولو حصل وقولت رأيي فيه في موقف ما من وراه لأي شخص في أي مناسبه، ده مش معناه اني جبانه … لو جه سألني هقوله اني قولت كذا ورأيي ده متسبب علي كذا بكل بساطه .. ولو زعل يتفلق .. ولو انا غلط وفهمني الصح هعتذرله .. هو ده انا .. مش بخاف وبقول للأعور انت اعور ف عينه زي ما الناس بتقولي انتي قصيره ومش بتضايق .. الدنيا سهله يا جماعه اللي يقول حاجه علي حد يقول بتخافوا ليه محدش هيضربكم، الا بقي لو انتم بتحبوا تعيشوا مظبطين اموركم مع كل الناس وتنافقوا ده وده وجواكم سواد .. ده موضوع تاني ملوش حل صراحه.

اللهم اشفني واشفِ كل مريض يتألم ولا يعلم بوجعه إلا أنت 🤲🏻

لا تصارع خنزيراً في الوحل؛ فتتسخ أنت ويستمتع هو .. بل اتركه يلعب قدر ما يشاء فهذه هي بيئته وطينته وأصله.

هتفضل في نظر الناس طيب وحنين وبتفهم في الاصول لحد ما تقول لا علي تصرفاتهم المؤذية معاك .. اول ما تاخد موقف او تاخد جنب وتسكت حتي .. هتبقي بتاع مشاكل ومؤذي ومش كويس … دايرة مفرغة ملهاش حل غير انك تسكت وتعيش في حالك ، وتعرف ان كبرت كفايه عشان تُدرك إن البعد عن الناس غنيمة، استودع عند الله كل خير عملته يتردلك خير من ناس تانيه او في الآخره .. و دع اذاهم وتوكل علي الله.

اصعب حاجه ممكن تمر بيها انك ميكونش عندك أم تدعيلك .. مفيش حضن يطمنك ولا إيد تطبطب وتداوي كل اللي بتشوفه في دنيتك .. احساس يشبه البرد ولو كنت في عز الصيف .. الوَحشه و الوِحده ولو عايش وسط مليون شخص .. مهما كان سنك .. لما امك تموت انت بتكبر وبتعجز قبل الأوان .. ولو أمك زي أمي يبقي الله يعينك من غيرها.. يارب ارحم ماما .. ويارب ولادي يفتكروني ويدعولي زي ما بدعيلها.

اللهم ارحم امي و كل أمٍ رحلت وليس لها من يدعو لها، فأنت بها أرحم، ولا تتركهن من رحمتك طرفة عين .

من بعد وفاة ماما نظرتي للحياة اختلفت تماماً .. مبقتش بفكر في بكره، ولا مستنيه منه حاجه ، ولا بعمل اي حاجه لمجرد اني اكسب منها .. بقيت بفكر ازاي في وسط كل الضغوطات ابسط نفسي ، بحاول استمتع بالرحلة حتي لو مش هوصل لأي حاجه .. اكيد لو وصلت هفرح جداً، لكن لو موصلتش مش هزعل لإني حقيقي مستمتعه.. ولاني قررت معملش اي حاجه وخلاص عشان يبقي اسمي اني بعمل .. مش لازم ارضي ولا اعجب .. لكن لازم اي حاجه بعملها اكون مبسوطه بيها وبحبها .. قررت التخلي عن كل شئ او شخص ممكن يوجع دماغي، كل شئ مش شبهي ميلزمنيش، وكل شخص مش بيتعامل معايا حباً فيا انا مش لأجل خاطر حد برضو ميلزمنيش … الحياه قصيره اوي، قررت اعيشها واسيب نفسي … هي مره ومش هترجع ، مين او ايه يستاهل اني افضل أجري فيها ! حسوا بطعم الحياة وأرضوا بالمقسوم فيها .. اليوم اللي بيخلص مش هيرجع تاني.

طول عمري بشوف الانسان المتواضع ده أهله عرفوا يربوه ويشبعوه كل حاجه .. مش بيتنطط غير الناقص .. عارف انه ناقص ف بيحاول يكمل نقصه ب أي حاجه .. مهما اتنطط ومهما اتكبر هييجي اللي اعلي منه ويكسر مناخيره .. التواضع ده حاجه مش سهله في ظل كل المغريات اللي عايشين فيها دي .. ربنا يديمها علينا نعمه ونعرف نربي ولادنا زي ما اتربينا.

كل واحد فينا شبه أهله بمميزاتهم وعيوبهم بشكلٍ ما ، حتي عيوبهم اللي بننتقدها احنا شاربينها وبنعملها من غير ما نحس .. ومميزاتهم بالنسبه لنا ثوابت عيشناها ولسه بنعيشها .. ومهما اتغيّرنا للأحسن أو للأسوأ ، فالأصل غلّاب.

‏غياب تحفظ فيه ذاتك خير من حضور تفقد فيه مقامك.

احياناً بنحب نوهم نفسنا بحاجات، بس عشان نعرف نعيش ونحس بطعم الحياة .. في حين ان الحقيقة واضحه وضوح الشمس، عارفينها وشايفينها … لكن بنتجاهلها لإن بقدر ما هي حقيقة؛ فهي مؤلمة .. إنكارها فيه حياتك، وتصديقها فيه نجاتك.