Maa nhi aa paayi..
Maa nhi aa payi.
Aur pta nhi kyu jab se ye suna hae tab se mann baar-baar ussi baat par atak jaa rha hae.
Aaj kul milake 2 mahine 11 din ho gye hain mujhe iss naye sheher mae.
Aisa nhi hae ki ghr se phli baar itni dur reh rha hun.
Kul char saal college, fir 2 mahine Chennai, 2 mahine Pune aur abb 2 mahine 11 din se yeha.
Pr aaj pehli baar ehsaas hua hae ki sach mae bhut dur aa gya hun apne ghr se.
Maa bhi utni hi door hae jitna mae.
Aur syd mujhse jyada asahaj bhi.
Maa ko aana tha.
Yeha mausi ke paas, kyuki meri mausi bhi yehi rehti hain.
Ya fir mere se milne ka vo bss ek jariya tha.
Unhone bhi socha hoga ki chal beta ko dekh aate hain.
Usse daant lenge ki time se khana khaya kro.
Uske sir par haath pher denge.
Bas itna hi to chahti hain maayein.
Pr fir unhe ticket cancel krni padi.
Aur mae sochta hun ki kitna bura laga hoga unhe.
Phone par baar-baar bas ek hi baat kehti rhi—
"Train bhut late chala hau...
fir 3 din kaise train pe reh paibo bauaa..."
Syd unhone bahut baar mann banaya hoga ki chale jaate hain.
Fir socha hoga—
Beech mae dikkat ho gyi to?
Akele kaise rahenge?
Aur fir unhone ticket cancel kr di.
Aur fir mujhe bola ki wapsi ka ticket bhi cancel kr do.
Kahe ki jab aane ka hi cancel kr liye hain to wapsi ka ticket rakh ke ka kari.
Pta nhi kyu...
Pr iss baat ne mujhe tod diya.
Train ke late hone ne nhi.
Ticket cancel hone ne nhi.
Balki iss baat ne ki meri maa ko mere paas aane ke liye itna sochna padta hae.
Itna darna padta hae.
Itna nirbhar hona padta hae.
Aur fir mujhe papa yaad aaye.
Aur ye bhi laga ki agar papa saath hote to syd maa aa jati.
Kitni ajeeb baat hae.
Jis aurat ne mujhe poori zindagi sambhala.
Vo aurat aaj bhi itni lambi yatra akele karne ko lekar ashwasth hae.
Aur fir mujhe vo saare bhashan yaad aaye jahan mahila sashaktikaran ki baatein hoti hain.
Pr ek maa aaj bhi teen din ki train yatra ko lekar ashwasth nhi hae.
Aur pta nhi kyu mujhe laga ki kisi report, kisi file, kisi meeting mae ye baat kabhi nhi likhi jayegi.
Likha jayega—
"Train 12 ghante late."
Pr ye nhi likha jayega ki uss 12 ghante ki deri ki wajah se ek maa apne bete se nhi mil payi.
Ye nhi likha jayega ki usne ticket cancel karte waqt kitni baar socha hoga—jaun ya na jaun.
Ye nhi likha jayega ki ek ladka apne kamre mae baitha hua uss raat chup ho gaya.
Fir mae khud ke baare mae sochne laga.
Abhi to degree bhi nhi mili hae.
Abhi to naukri shuru hui hae.
Aur mae soch rha hun ki kaash...
Kaash thoda aur paisa hota.
Kaash itna kama rha hota ki maa ko flight se bula leta.
Kaash maa ko teen din ki train aur uski anishchitata ke baare mae sochna hi na padta.
Pr fir ek aur sawal aata hae.
Kya har dard ka hal sirf paisa hae?
Ya fir ye dard isliye bhi hae kyuki hamara samaj abhi bhi itna sehaj nhi hua ki ek maa nishchint hokar itni door akeli safar kar sake?
Aur pta nhi kyu mae in dono sawalon ke beech fasa hua hun.
Ek mann kehta hae—
Khub mehnat kro.
Khub kamao.
Itna kamao ki maa ko kabhi aise sochna na pade.
Aur doosra mann kehta hae—
Nhi.
Bas apni maa ke liye nhi.
Un saari maaon ke liye socho jo har roj aise hi ruk jaati hain.
Aur sach kahun...
Mujhe abhi bhi jawab nhi pta.
Pr itna pta hae ki aaj raat meri maa nhi aa payegi.
Aur duniya ke liye ye bahut chhoti si baat hogi.
Pr mere liye...
Ye pehli baar tha jab mujhe mehsoos hua ki apne ghr se bahut dur aa jana kabhi-kabhi apko apni aukat dikha deta hae.
Ki aap chaah kar bhi kuch cheezein badal nhi paate.
Aur bss phone ke uss paar baithi apni maa ki awaaz sunte reh jaate hain.
