ഒരു ദിവസം എണ്ണമറ്റ ഈ-മെയിലുകൾ എഴുതുകയും വായിക്കുകയും ചെയ്യുന്ന എനിക്ക് ഒരു കുട്ടിക്കാലം ഉണ്ടായിരുന്നു. എല്ലാമാസവും തുടക്കത്തിൽ മുടങ്ങാതെ കിട്ടിയിരുന്ന അപ്പന്റെ കത്തുകൾ. അപ്പന്റെ കത്തുകളെ പറ്റി ആലോചിക്കുമ്പോൾ എനിക്ക് തോന്നുന്നു, ഓരോ കത്തുകളും ഓരോ കഥകളാണ്. ഇന്നത്തെ സാങ്കേതികവിദ്യ ഇല്ലാതിരുന്ന അന്നു കാലത്ത് അപ്പൻ കത്തുകളിലൂടെ വീട് നിയന്ത്രിച്ചിരുന്നു. അങ്ങനെ വായിച്ചതും കേട്ടതും ആയ കത്തുകളിൽ നിന്ന് പ്രചോദനം ഉൾക്കൊണ്ട് ഞാൻ എഴുതിയ, അല്ലെങ്കിൽ അപ്പൻ എഴുതികാണും എന്ന് ഞാൻ സങ്കൽപ്പിക്കുന്ന ഒരു കത്ത്.(അമ്മയാണ് ഈ കത്തുകൾ എല്ലാം വായിക്കാറ്).

പ്രിയപ്പെട്ട അമ്മയ്ക്കും കുടുംബത്തിനും,

എല്ലാവർക്കും സുഖം എന്ന് കരുതുന്നു. എനിക്കും ഇവിടെ സുഖം തന്നെ. ഇവിടെ ഇപ്പോൾ നല്ല ചൂടാണ്, ഒന്ന് രണ്ട് മാസം കൂടി ഈ കാലാവസ്ഥയായിരിക്കും. ജോലിയുടെ കാര്യം കുഴപ്പമില്ലാതെ പോകുന്നു. കമ്പനിയിൽ പ്രശ്നങ്ങൾ ഉണ്ട്, അറബികൾ കമ്പനി വാങ്ങിയതിനു ശേഷം ഒരുപാട് പേരെ പറഞ്ഞു വിടുന്നുണ്ട്. ഡ്രൈവർ ആയതുകൊണ്ടും, ബാങ്കിലെ കാര്യങ്ങൾ നോക്കുന്നത് കൊണ്ടും, എന്നോട് ഇതുവരെ ഒന്നും പറഞ്ഞിട്ടില്ല. പറഞ്ഞു വിടുകയാണെങ്കിൽ ഇവിടെ നിൽക്കാനോ വേറെ ഏതെങ്കിലും ജോലി കിട്ടാനോ സാധ്യത കുറവാണ്. എല്ലാ കമ്പനികളും പഠിപ്പും സർട്ടിഫിക്കറ്റും ഉള്ളവരെയാണ് നോക്കുന്നത്.

പുത്രന്റെ പഠിത്തം എങ്ങനെ പോകുന്നു?  ഓണപ്പരീക്ഷയ്ക്ക് നല്ല മാർക്കൊക്കെ കിട്ടുമോ?  നന്നായി പഠിക്കണം, അല്ലെങ്കിൽ എന്നെപ്പോലെ എപ്പോൾ വേണമെങ്കിലും ജോലി പോകാം. പുത്രിയ്ക്കും സുഖമെന്ന് കരുതുന്നു. വീട്ടിലെ പണികൾ എല്ലാം ചെയ്യാൻ തുടങ്ങിയോ? എല്ലാം ഇപ്പോഴേ ചെയ്തു പഠിക്കണം.

ഞാൻ കൂട്ടുകാരന്റെ കയ്യിൽ കൊടുത്തയച്ച ഡ്രസ്സ് ഒക്കെ കിട്ടിയെന്ന് വിശ്വസിക്കുന്നു, അതിൽ ഒരു കോഡ്ലെസ് ഫോൺ ഉണ്ട്. ഫോൺ എക്സ്ചേഞ്ചിലെ ആൾ വരുമ്പോൾ അത് ഫിറ്റ് ചെയ്യാൻ പറയണം. പഴയ ഫോൺ അവിടെ തന്നെ ഇരിക്കട്ടെ കോർലെസ് കോണിചോട്ടിൽ വെച്ചാൽ മതി. പറ്റില്ല എന്ന് പറയുകയാണെങ്കിൽ ഞാൻ വന്നിട്ട് ശരിയാക്കാം.

മഴയൊക്കെ തീർന്നു കാണുമല്ലോ, ഈ പ്രാവശ്യം വരിക്കച്ചക്ക അധികം ഉണ്ടായില്ലെന്ന് തോന്നുന്നു. ഞാൻ ചക്ക വറുത്തതും കായുപ്പേരിയും അധികം തിന്നാറില്ല അതുകൊണ്ടാണ് ആരെങ്കിലും ഇങ്ങോട്ട്  വരുമ്പോൾ കൊടുത്തയക്കേണ്ട എന്ന് പറഞ്ഞത്, ഞാൻ കഴിക്കില്ല വേറെ ആർക്കെങ്കിലും കൊടുക്കും.

പുളിയന്മാവിലെ മാങ്ങ വീണ് എത്ര ഓട് പൊട്ടി ഈ പ്രാവശ്യം? വല്ലാതെ പൊട്ടുന്നുണ്ടെങ്കിൽ ഓഡിന്മേൽ ചാഞ്ഞു നിൽക്കുന്ന കൊമ്പ് മുറിക്കണം. കുറെ ഓട് പൊട്ടിയിട്ടുണ്ടെങ്കിൽ ആശാരിയെ വിളിച്ച് കഴുക്കോൽ മാറ്റണമെങ്കിൽ മാറ്റണം. ചെറിയ ഓട് പൊട്ടിയതും മറ്റോ ആണെങ്കിൽ ആ കോണി വച്ച് അവനെ കൊണ്ട് മാറ്റിക്കണം, അവനും പഠിക്കട്ടെ ഇതൊക്കെ.

പാടത്തിന്റെ സൈഡിലെ പറമ്പിലെ വെള്ളം കുറഞ്ഞാൽ അത് വൃത്തിയാക്കണം, ആ തമിഴന് ഒരു ദിവസം നിർത്തിയാൽ മതി, അല്ലെങ്കിൽ തേങ്ങ ഒന്നും കിട്ടില്ല. വഴിയുണ്ടായിരുന്നെങ്കിൽ അത് ആർക്കെങ്കിലും കൊടുക്കാമായിരുന്നു, ഇതിപ്പോ വഴിയില്ലാത്ത കാരണം വിചാരിച്ച കാശ് കിട്ടില്ല, നഷ്ടക്കച്ചവടം ആകും.

അമ്മയുടെ അസുഖമൊക്കെ എങ്ങനെ പോകുന്നു? മരുന്നെല്ലാം കൃത്യസമയത്ത് കഴിക്കണം, പ്രഷറും പ്രമേഹവും കുറയുന്നില്ലെങ്കിൽ അബ്ദുള്ള ഡോക്ടറെ മാറ്റി ആശുപത്രിയിൽ പോയി കാണിക്കണം. ഇൻസുലിൻ ഇപ്പോഴും എല്ലാ ദിവസവും എടുക്കുന്നുണ്ടെന്ന് വിശ്വസിക്കുന്നു. എപ്പോഴും കട്ടിലിൽ കിടക്കരുത് നടക്കാൻ പറ്റുമ്പോഴെല്ലാം നടക്കണം. പെങ്ങന്മാർ ഓണാവധിക്ക് വീട്ടിൽ വന്നു കാണുമല്ലോ,  എല്ലാവർക്കും സുഖം എന്ന് കരുതുന്നു. എല്ലാവരുടെയും അന്വേഷണം പറയണം. എന്റെ ലീവിന്റെ കാര്യം ഒന്നും ഉറപ്പായിട്ടില്ല, ക്രിസ്മസിനോ പെരുന്നാളിനോ എത്താൻ ശ്രമിക്കാം.

നന്നായി പ്രാർത്ഥിക്കണം, കുടുംബ പ്രാർത്ഥന മുടക്കരുത്, ദൈവത്തിന്റെ സഹായമില്ലാതെ നമുക്കൊന്നും ചെയ്യാൻ സാധിക്കില്ല. എല്ലാവർക്കും സുഖം തന്നെ എന്ന് വിശ്വത്തോടെ കത്ത് ചുരുക്കുന്നു.

ഈ മാസത്തേക്കുള്ള ചിലവിനുള്ളതും അമ്മയുടെ മരുന്നിനുള്ള കാശിന്റെ ചെക്കും, നിനക്കുള്ള കത്തും ഇതിന്റെ കൂടെ വയ്ക്കുന്നു.

എന്ന് സ്നേഹപൂർവ്വം,