Mustafa's Café

و أتوجه بخالص الأسف لنفسى.. نفسى اللى نسيت أحبها و انا مشغول بحب ناس بيحبوا نفسهم اكتر..

ياما فى زماننا قلوب، رسماها اعمارنا..

زى النجوم حواديت، على ضل شباكنا..

دى مركبى فضة، وفرحى لو قضَّى..

حبيبتى تبقى معاى، من غيرها مش هرضى!!

ساعات اتوه مرات، القى القمر هدَّى..

يسقى النسيم شربات، فى ليل طويل عدَّى!!

الصعب راح ولا، الحب ده احلى..

لو وقفت الساعات، صوتى اكيد اعلى!!

لو زارنى فرحى ساعات، حواديتى ما بتخلص..

قمرى حصان فى الليل ، نجوم دى بترقص..

والحلم ويايا، والذكرى جوايا..

من بين كتير حكايات، حكايتنا دى حكاية!!

ساعات احب حاجات، ما يحبهاش غيرى..

فى الرايحة فى الجايات، اغنى مع طيرى!!

طمنى اطمن، فى القلب راح اسكن..

ما تستناش حد يفهمك..

و لا يستوعب حجم الدوشة اللي جواك، و لا يترجم التخيلات اللي بتعدّي في دماغك كأنها فيلم محدش غيرك شايفه..

كل واحد فينا بيمشى على مقاس راحته..

بيختار يسمع إمتى،

و يفهم إمتى،

و يقرّب على قد ما يطمنه هو.. مش على قد ما إنت محتاج..

الحياة ما وقفتش على حد قبل كده، و لا عمرها هتقف عشان خاطر سواد عيونك و لا طيبة قلبك..

فلو ما اتفهمتش.. ما تزعلش..

إنت مش محتاج تفسير،

إنت محتاج تبقى واثق فى كل حاجة بتحسها..

حتى لو العالم كله ما جاش على مقاسك!!

سلام

أخطر إنسان على نفسه، مش اللى الدنيا قاسية عليه..

لكن اللى قلبه حساس زيادة، عقله ماسك فى كل تفصيلة، خياله سابق خطواته بألف حكاية.. و أحلامه أكبر من احتماله..

ده مش بيأذى حد، ده بيتقن فنّ استنزاف نفسه فى صمت!!

أنا مش لغز و لا استثناء، أنا نتيجة طبيعية لعقل بيرفض السطح و بيشّك ف السهل.. دماغى ما اتخلقتش عشان تمشى مع التيار، اتخلقت علشان تسأل قبل ما تسلّم، و تحلل قبل ما توافق، و ده دايمًا بيخلينى في مساحة نصها وعى ونصها عزلة..

أنا لما بتعلق، ما بكونش بدوّر على أمان في شخص، أنا بدوّر على اتِّساق. بدوّر على حد يفهم إن اللى جوه دماغى مش تقيل علشان يتشال، تقيل علشان يتم تقبلّه.. المشكلة مش فى التوقع، المشكلة إن الوعى لما يزيد، المسافات بتزيد معاه، وبتبقى أغلب العلاقات قائمة على تفاهمات سريعة ما تستحملش عمق و لا صبر..

أنا ما بعرفش أعبّر بسهولة، مش لإنى عاجز، لكن لإن التعبير اختزال، وأنا بطبيعتى ضد الاختزال. الفكرة عندى ما بتطلعش جملة، بتطلع فى سياق متصل، تجربة كاملة، وده صعب يتحط في كلام عابر أو رد سريع.. علشان كده بسكُت كتير.. مش انسحاب.. لكن حفاظ على المعنى من التشويه..

السيجارة مش عادة، والسماعة مش هروب، والمزيكا مش تسلية.. دي أدوات ضبط نفس، طريقة بدائية لإنسان معاصر بيحاول يفضل متماسك في عالم بيسابق الزمن و مش فاضى يسمع.. أنا ما بسيبش الحياة، أنا بسيب الدوشة علشان أسمع نفسى.. يمكن أفهم..

أنا مش ضعيف، أنا مُدرك.. مُدرك إن الدرع جايز يحميك، بس مش هيعيشك.. و بختار اتوجع أحيانًا بدل ما أتحوّل لنسخة جافة ما بتحسش.. الوجع عندى مش فشل، الوجع مؤشر إن لسه فى تفاعل، و لسه فى رهان على المعنى..

الحياة مشاكل ما بتخلصش، و ده مش استثناء، ده تعريف..الفرق إن في ناس بتهرب من الأسئلة، وناس تانية بتعيش جواها.. و أنا من النوع التانى، النوع اللى بيدفع تمن وعيه توتر، وسكوت، ومسافات طويلة مع ناس أقرب من اللزوم و أبعد أكتر من المفروض..

أنا مش محتاج حد يقرا دماغى ولا يفك شفرتى، أنا محتاج حد يعترف إن الإحساس معرفة، و إن الصمت موقف، و إن العمق مش تعقيد، و إن الإنسان مش مُلزم يبسَّط نفسه عشان يتفهم..