Callitríchius

Dakál lang sásábi ót nínánú ku kanu. Ngéni rá ku pá kanu íkit bínukadkad makaníni anting sampága. Dakál lang métúlâ, gínaligatsu, mípamulálâ. Atin mú namang mésórâ, mínggaligit at mímuâ. Ót mó kanu dépat ku pa ing anti kaníni. Té ná kú mu kanu míkagyu kétang saddiá kung aské ó ityúra. At atin mápilan naman kékayu, agyáng é yu sabian árápan, ábabásá ku king pámamalíngit yu at pámagbusángut ing é kó tutung matúlâ, at king é yu pámibuladbúlad, karin yu ku tatapúkanang sásalikbubung sumpâ. Nánú ya man ing kékóng ábabatiawan, línábis ku man ó kayá mígkúlang, óini pu ing kákung mainsak a respuesta: Kapampángan támu. Bálú tá ya ing talindó támu dikil king “perfection”, ngána: “sálang malpâ, sálang magadtû.” É ku pékálabis, é kiá naman pékádimut. Sáktú mú pû. Áku mú pú ini. É ku na pángabalánan nung mángalálú kayu. Alá káku ing prubléma.

Ausan yu ku, ausan da kayú naman. Pagmananuan yu ku at pagmananuan da kayú naman. Tanggapan yu ku at tanggapan da kayú naman. É yu ku tanggapan ó isumpá yu kó? Okay mú pû. Pángaddí ra na kayú mû. Ing bálú ku: áku pa mú rin itang anak a mainsak, a king gagáwán na, túné yang matúlâ, alang pámangabid at marók a gampâ.

Salámat pû, Ginu!