Untitled

الاسبوع ملخبط في كل حاجة بسبب الاجازة … مواعيد نوم متغيرة مع نوبات ارق ، خروجات كتير ، مقابلات لأصحاب قدام، ونظام يوم مختلف. وده عكس اللي برتاح فيه لاني بحب نظام متكرر متوقع عشان بكره احساس فقدان السيطرة اللي بيجي من العشوائية.

الثابت الوحيد في يومي هو وجع ضهري اللي بحاول اتجاهله طالما مستوعبة انه ملوش علاج، وان سبب ظهوره زي اختفاءه مليش سيطرة عليه.

من مقابلات الاسبوع كانت مقابلة لاصدقاء الطفولة واصحابنا الاقدم. كل سنة في اجازة نص السنة لازم نتقابل و نقضي اليوم كله سوا ونسلم علي الحيوانات اللي حفظناهم وحفظونا من طول العشرة. السنة اللي فاتت صديقتي التؤام (بفرق خمس سنين) اتخطبت وكانت بتعاني من كل مشاكل الخطوبة المعتادة، اما السنة دي فاتكتب كتابها واخيرا، اخيرا شفت بنفسي نسخة من الحب الجميل المبهج اللي دايما بتبشرني بيه ياسمين .عكس نسختي اللي عرفاها عن حب مزعج بيوجع القلب والروح. البنت احلوت بشكل ملفت للنظر وفتحت نفسي للحياة و ان في امل.

من ضمن قناعاتي القديمة المستمرة إن طريقة تعارف اتنين ببعض مش مهمة اوي سواء معرفة عن طريق دراسة / شغل / صالونات ، المهم الطرفين يبقوا فاهمين عايزين ايه من الطرف التاني في علاقة مشتركة ويقدروا يقدموا ايه . عارفين ايه الحاجات اللي خط احمر غير قابلة للتنازل عنها والحاجات اللي فيها مرونة. وبفتكر دايما مشهد لأليس وهي تايهة وبتسأل القط عن طريق الرجوع وإجابته لو مش عارفة رايحة فين فاي طريق هيوصلك. اظن لو الواحد مش عارف هو عايز ايه فكل الطرق غلط.

لفترة قريبة كنت بعتبر المقابلات المترتبة ( جواز الصالونات) في ديل قايمة البدايات الناجحة بين اتنين، لكن حاليا شايفة انه بيغطي جوانب كتير بتعمل صداع علي الفاضي وبيخلي التركيز بس علي اتنين بينهم توافق او لأ.

البيت اللي بصوره كل سنة ومفيش مرة حبي له قل ولا فضولي اني اعرف مين اللي ساكن فيه.