Sa ating mga kasunduang panlabas, palasak na estratehiya ng gobyerno ang 'phased approach' lalo sa mga pagkakataong batid nitong hindi madali para sa kanilang tuparin ang kahingian ng kasunduang kanilang pinasok. Kasabay nito, humihingi ang gobyerno ng mas mahabang panahon o palugit, suportang teknikal (aid), at/o tulong pinansiyal sa pamamagitan ng subsidiya o moratoryo. Madalas, napagbibigyan ito sa tuwing iwinawasiwas ng gobyerno ang ating estado bilang developing economy. Ilang halimbawa:
Sa pandaigdigang kilos upang tuluyang iwaksi ang paggamit ng fossil fuels, ipinanawagan ng ating Kagawaran ng Enerhiya at Climate Change Commission ang 'just' (makatarungang) energy transition para sa mga developing economies gaya natin. Ayon sa mga ahensiyang ito, kailangan natin ng mas maraming panahon, ayuda, at suporta sapagkat wala tayong sapat na kapasidad, kakayahan at kahandaan sa kasalukuyan upang agarang ipasara ang ating mga coal power plants, putulin ang ating dependency sa krudo, at madaliin ang paglipat sa renewable energy systems.
Lagpas dalawang dekadang naligoy (at patuloy na binubuno) ng Pilipinas ang services liberalization commitments na pinasok nito sa ASEAN at WTO noon pang 1995, na may atas na buksan ang ating sektor serbisiyo sa kalakalang panlabas at payagan ang mga banyagang mamuhunan sa bansa.
Makailang ulit ding humingi ng palugit at espesyal na pagsasaalang-alang ang Pilipinas upang mapanatili ang mga taripa nito sa kinakalakal na bigas at asukal.
Regardless kung epektibong estratehiya nga ba ang phased approach sa mga halimbawang nabanggit, ito ang malinaw: isa ito sa mga mekanismong iginigiit at ginagamit ng ating gobyerno. Kaparehong pag-unawa, palugit, tulong, at/o suporta ang hinihingi ngayon mula sa gobyerno ng mga nangangailangan mula sa namamasadang sektor lalo na para sa mga walang sapat na kapasidad, kakayahan at kahandaan sa kasalukuyan upang maka-comply sa kahingian ng transport modernization program. Sa kasagsagan ng 'di pagkakasundo sa pagitan ng mga sangkot na panig, at humantong na nga muli sa tigil-pasada, sumagi sa isip ko bigla si Papa P:
gracieabrams
discoholicmusic
titsay
gamechangershow