" إيه فايدة الحياة من غير حب ومودة "
سؤال بدور ليه على إجابة من سنين ومش لاقي ، ومقصدش بكلمة حب هنا الحب الموجود بين راجل وست ، أقصد المحبة الموجودة في قلوب الناس ما بينهم وبين بعضهم .
الناس اتحولت فجأة لأدوات من أجل البحث عن المادة ، غابة وعايشين فيها كأننا روبوتات ، قناعات غبية اكتسبناها منين معرفش وصفة الأنانية بقت سايدة عند ناس كتير !
ايه السبب اللي ممكن يخلي الواحد يدمر علاقاته بسبب شوية فلوس ، تدمر المحبة والود بسبب حاجة مادية ؟
تقدر تقولي الحضن الحقيقي طيب سعره كام ؟ وفلوسه هتفرحك وتديلك نفس الإحساس ولا لأ ؟
تقدر تقولي سعر كوباية الشاي اللي هتشربها مع أخوك وانت وهو بتحكوا همومكم لبعض وبتطيبوا خاطر بعض ولو بكلمتين ؟
تقدر تديني سعر صنية البسبوسة ولا طبق الأكل اللي بتلاقي جارك باعتهولك عالفطار في رمضان ، وسعر الضحكة والإبتسامة اللي جارك بتضحكها في وش جارك الصبح ؟!
تقدري تقوليلي سعر قعده حلوة مع جوزك في ساعه صفا وانتوا بتضحكوا على هموم الدنيا بضحكة حلوة .
تفتكر ابنك او بنتك شعورهم بحضنك ووجودك وخوفك عليهم هو نفس شعوره بأيباد هتشتريهوله وتسيبه يلعب بيه بين أربع حيطان بعيد عنك ؟
تقدر تأجر أم ؟ تقدر تشتري جدعنة صاحب ؟ تقدر تشتري أب حنين ؟
تقدر تشتري برفيوم بريحة الحارة القديمة ؟
تقدر تشتري فرحة حد بيحبك وقت نجاحك ؟
ليه بقينا ندور عالماديات وبس ، وفايدتها ايه من غير حب ؟
هي دنيا وهتتعاش مرة واحدة ، عمالين نضغط على نفسنا وأعصابنا ونكره ونحارب في بعض ، خناقات وحوادث قتل وحروب نفسية ، طلاق وبيوت بتتخرب ونفوس بتشيل من بعض .
الفلوس لعنة ، والجري وراها نقمة .
هي بطنك هتفرق ما بين لقمة سعرها بسيط بتاكلها مع حد بتحبه وما بين أكله غالية بتاكلها لوحدك ومعزول عن العالم ؟!
ماتيجي نقلع وشوش العند والكبرياء المزيف ونعيشها ببساطة ، ده العمر كله لحظة وبتعدي ، والدين بتاعنا بسيط ، إحنا اللي عاوزين نتجنن ونزعل .
خلونا نرجع اللي فات يمكن ،
يمكن الحياة ترجع تحلو من تاني
romaincrisis
tangentwithtanner
ellievsbear
discoholicmusic
andulkaphoto
prguitarman
pixelskylines
kianamaiart
theartofmadeline
