Bukowski Asturies

Despertar nuna casa desconocida sin saber cómo llegaste hasta ella. Coses que pasen...Ella siguía tirada na cama cuando marché. Demasiado sol y yo sin gafes

Yera un xueves, creo recordar, andaba’l debalu per un barriu que nun conocía bien. Entré a la bodega qu’atopé con lluz. Suelu de cementu, ampliu almacén desanxeláu ente la multitú de trastos que s’acumulaben pel suelu, un paisanu tomando una pinta vinu apoyáu nun tonel puestu en vertical cerca la puerta doble de madera, una pareya acabando la botella sidra na barruca del final del almacén, xusto embaxo d’unos xamones qu’escolingaben del techu y que teníen pinta de tar hasta’l tueru de mofu, dalgunes de les barres fluorescentes qu’allumaben la estancia ceguñando arrítmiques, dando-y al “local” un aspectu de taburdiu de los que me presten: xente demacrao, vinu perroneru, y ambiente sórdidu.

La primer vegada qu’aporto a la mio casa llevaba unos shorts d’algodón, de tela de toballa, anaranxaos, y una camiseta amplia blanca, fina. El sostén facia-y abultar más el tamañu de les tetes.  Ensin pasar del marcu de la puerta echóseme enriba a mordeme los llabios y zarró la puerta cola pierna de la que m’emburriaba pa dientro.  El tactu de la so piel rezumaba’l calor del sol del branu que-y diera color esos díes. Nun necesité convidala a un chupitu d’anís de guindes que tenia recién sacáu del armariu. Nun ye que nun necesitara…ye que directamente fízome escaecer tou rastru de bebida. Na cama enroscábase como una culiebra peles rendixes que-y dexaba’l mio cuerpu. Notábense-y les hores de ximnasia rítmica.

Depués d’una selmana zarraos nes mazmorres de la rutina toca salir a gastar les perres que nos queden. Drogues, bebides, muyeres… danos igual l’orde y la cantidá. Nun arrenunciamos a nengún d’esos planes. Darréu meterémonos na cama a facer que durmimos, unes hores… les xustes y necesaries pa que vuelvan a abrir los chigres que pesllamos.

Al meudía,ente'l fedor a resaca nel cuartu, cuélase pela ventana l'arume de la sidra esplamao del chigre d'abaxo. Ye hora'l vermú. Baxo

L' Alsa curuxa nun sal a la hora. O antes o depués, nunca a la hora. Ella quedó nel andén,gomitando. Nun s'enteró de la impuntualidá.

La única belleza que prevalez ye la de la botella sidra. Namás cuando ta llena.