ℛ🦋

انك توقف كنترول علي حياتَك لمدة ١٠ ايام وتخليها عقيدة عندك لبعد كده، النتايج بايد ربنا وتأتي بيها المقادير، ولان مهما حاولنا نعمل كنترول على حياتنا فا في الأول والآخر هي مبتمشيش بخططنا ولا بمجهودنا وساعات كتير الأحسن انك تبطل تحسبها، سبحان الله في حجات لما تبطل تفكر فيها كتير وتحسبها بالواحدة بتيجي من غير مجهود، خصوصاً الحجات اللي انتَ مالكش ايد فيها.

وقف استرسال افكارَك السلبية اللي في الآخر مبتحلش حاجة او مش بتخليك تنجز حاجة حقيقية، ولما تلاقي نفسك يائس خالص ومش عارف تعمل ايه او عملت كل اللي تقدر عليه ومش حاسس بنتيجة سلمها لله والأيام دي أيام فتوحات ممكن ربنا يفتحلك في حل مشاكلك، ويفتحلك في رزقك ومستقبلَك اللي انتَ مش محدد ملامحه لسة، يرزقك بفرص جديدة ويسهل ليك امورَك.

أحد الصالحين قالها "انزع عن عقلك التفكير الكثير وقلق المصير" لان المصير بيد احسن المدبرين سبحانه وتعالى.

حتى في علاقتك بالناس استسلم لأقدار ربنا، ومن ضمن تسليمك انك تتقبل ان مش كل الناس هتحبك، في ناس ممكن تكرهك، وفي ناس انتَ وهم مش مكتوب ليكوا تبقوا قريبين من بعض لان سبحان الله الارواح والقلوب في ايدين ربنا فا لو مفيش كيميا بينكوا متستهلكش نفسك في انكوا تقربوا من بعض او تنجح العلاقة، خلي علاقتك بكل الناس احسان يعني تسألوا علي بعض وتودوا بعض بس مش كل الناس ضروري يكونوا قريبين منك او صحابك.

والنقطة دي مهمة جداً عشان تقدر تحس وتستقبل روحانيات ونفحات الأيام دي، لان القلب المشغول مبيقدرش يحس بالخشوع ولا يستقبل المعاني، اللي مشغول بانتقاضات الناس ليه وان لازم يثبت ليهم عكس الكلام، وشغله الشاغل انجاح علاقة مفيش امل فيها، واللي كل همه يرد على كل حد مش راضي عنه بيضيع المهم عنده وهو رضا الله، تقبّل عادي ان مش كل الناس هتحبك او تتقبلك، وفي ناس هتنتقد نفسها فيك وفي ناس مش هتقدر تستوعب تفكيرَك، ولان اللي كل هدفة في حياته رضا الناس هيفضل متشتت وممكن يتأخر في خطواته، طول مانتَ مبتضرش حد ولا بتعمل حاجة تغضب الله في حد خليك مركز، واختار معاركك وانشغل بمعركتك مع نفسك وتزكية نفسك لان هي دي المعركة اللي تستاهل تستثمر فيها قلبك، وده طبعاً ميقللش من احسانَك مع كل الناس وانك يكون ليك اثر طيب في حياة كل اللي يعرفوك، بس احنا انهاردة مركزين علي نقطة الناس اللي بتنتقدك اكتر. "من عرف الناس استراح فلا يطرب لمدحهم ولا يغضب لذمهم، لانهم سريعي الرضا سريعي السخط الهوى يحركهم".