Raghda

وبها تنتهي أجمل أيام السنة

بس مش كلهم يعرفوا إن في عرفة النبي ﷺ فضل رافع إيديه الاتنين من الظهر للمغرب بيدعي ربنا، حتى لما جه يشرب نزل إيد واحدة بس وكان رافع التانية!

وفي ناس كتير أول ما يسمعوا الكلام ده يقولوا:

هو أنا أقدر أدعي كل الوقت ده؟

أو حتى من العصر للمغرب؟

طب الدعاء بتاعي مش هيخلص؟!

الحقيقة إن اللي بيفكر كده غالبًا لسه ما فهمش يوم عرفة كويس..

يا جماعة ده يوم ممكن حياتك كلها تتغير فيه بإذن الله، دنيا وآخرة..

يوم استجابة الأدعية المستحيلة، يوم العتق والمغفرة والرحمات.

النبي ﷺ قال:

«خيرُ الدعاء دعاء يوم عرفة»

يعني مش تدعي الدعوة مرة وخلاص..

لأ، ألحّ على ربنا، كرر دعواتك، وافتكر إن الكريم سبحانه يحب عبده اللحوح.

ادعي لنفسك..

ولأهلك..

ولمستقبلك..

ولرزقك..

ولفرجك..

وللجنة..

ولكل حاجة نفسك فيها.

ولو مش عارف ترتب الدعاء، امشِ بالشكل ده:

📌 ابدأ بالثناء على الله بأسمائه وصفاته

📌 ثم الصلاة على النبي ﷺ

📌 ثم احمد ربنا على نعمه واستغفره من ذنوبك

📌 وبعدها ادعي بكل اللي نفسك فيه دنيا وآخرة

📌 وأكثر من الذكر العظيم:

"لا إله إلا الله وحده لا شريك له، له الملك وله الحمد وهو على كل شيء قدير"

ومتضيعش اليوم ده أبدًا..