Elstu félagsgjöldin
Í setningarræðu á kirkjuþingi í síðustu viku sagði Magnús E. Kristjánsson að sóknargjöldin væru elstu félagsgjöld á Íslandi. Hann sagði jafnframt að ýmsir hefðu gert ágreining um þetta efni og vildu frekar líta á sóknargjöld sem framlag ríkisins til trúfélaga.
Morgunblaðið fylgdi málinu eftir með fyrirspurn til fjármálaráðuneytisins sem vísaði á innanríkisráðuneytið. Í gær greindi blaðið frá því að ráðuneytið líti svo á að sóknargjöld séu félagsgjöld og að „engin sérstök andmæli hafa verið við því“. Blaðið á þakkir skildar fyrir að fylgja málinu svona eftir.
Þar með má öllum vera ljóst að fulltrúar stærsta trúfélags á Íslandi og fulltrúar innanríkisráðuneytisins sem fer með málefni trúfélaga hafa sama skilning á sóknargjöldunum. Það greiðir vonandi úr í viðræðum um skil á sóknargjöldum þegar fram líða stundir.
