AaN56

أعلَم ..أن النفس تحب أن تشبع حاجتها ولو دون وعي..

لكن صدقيني.. هناك أنسُ بالله ولذّة بقربه تعوّض كل ذلك..

هههههههههههههههههههههههههههه وراي ما انتبهت 😭😭😭؟؟؟؟

المشكلة قبل هالآسك فيه أكثر من آسك يسولف معي عن أفلام أنيميشن أجنبية .. للحين ما جاوبت عليها ..

يعني المفروض ع طول يشبك معي ان السؤال عن فيلم أنيميشن ..

ليش ما انتبهت ؟؟ هههههه

هههههههههههههههههههههههههههههههههههههههههههههههههههههههههههههههههههه

هذي ما يبي لها يمه ... هذي يوه هههههههههههههههههه

ملاحظة لغير المتحدثين باللهجة النجدية :

ما أتابع ..

لو كنت أتابع أفلام أجنبية كان ما استمريت بمتابعة الانمي ..

ولو حصل واضطريت أتابع .. فأميل للأفلام اللي تتكلم عن قصة حقيقية

,

الفيلم الوحيد اللي عشقته من قلب هو قراصنة الكاريبي .. شفته بالسينما قبل يضرب و يصير له أجزاء .. وكانت أول تجربة لي بحياتي في السينما.. وطحت بالصدفة ع هالفيلم الخرافي اللي حقّق صيت مو طبيعي .. فلكم أن تتخيلوا الانبهار الجنوني اللي أصابني ههههههههههههههه

يمه !

كيف عرفت اني أفكر فيه هاليومين ؟؟

يب تابعته وقت نزوله .. بس غلطتي اني تابعته دفعة وحدة .. أحسه ما يصلح الا اسبوعي ..

+

كان مزاجي سيء وقتها .. فـ ما مسكت خط معه ..

مليت بمنتصف الحلقات و وقفته .. أظن عند الجزئية اللي انحبس فيها اخوه بمكان مظلم..

.

بس هاليومين طلع لي بالتويتر مقطع لزوجة أبوه وكانت خايفة عليه ومدري ايش .. و أحس يسسس ✨ وجدت الدافع لإعطائه فرصة أخرى .. ✨

اهاااااااا..

أجل تقولين زي التيس بالنسبة لي....

اووو ككككيييي ...

مثال وحده انفعلت علي بدون سبب رفعت صوتها واحرجتني قدام زميلة ورديت عليها بنبره مزاح ( شفيك معصبه ) وهدأت فوراً وحاولت تلطف الجو.. ردة فعلي الاولى دايما في اي موقف اني اكون هادية عشان لا يكبر الموضوع وفي كل مره اتضايق جدا لاني ألطف على حساب نفسي والموضوع يعدي بسرعه بدون مشكله.. دايما اتضايق لعدة ايام لان احس ما حميت او دافعت عن نفسي كويس.. ما ابي الطف الجو واعدي الموضوع ابي اي احد يكلمني بنبرة معينه تكون عندي بديهه ارد عليه بنفس النبرة واخذ حقي حتى لو صارت مشكلة بس شلون.. مشكلة مخي انه تعود على دائرة الرائحه واي افتعال ردة الفعل تكون فورا طبطبة وهذي المواقف تظل مره بنفسي لاني افكر ياليتني قلت كذا وسويت كذا.. بعد كل موقف اقول خلاص عاد اذا صار لي شيء مره ثانيه ما راح اكون لطيفة وبعدها ولا كأني وعدت نفسي بشيء مخي يصر يمنعي انفعل او اهزئ.. صح اني لو انفعلت مقابلة للانفعال راح يصير خلاف وتوتر في بيئة العمل ويمكن اكره الدوام بس عالاقل بكون مرتاحه اني رديت اعتباري… مو الطف وامشي والعلاقة تظل ودودة وهادية في العمل وانا من داخلي محترقة من موقف صارله فترة.. انصحونا

هلابك ..🩵🩵

تسمحين أضربك .؟

ههههههههههههههههههههههههههه

ياخية حرام عليك .. فيه ناس تتمنى الهدوء والراحة النفسية اللي أنتِ عايشتها ..

احمدي ربك مليون مرة ع هالطبع اللي فيك .. كره المشاكل و الوضع المتوتر و القدرة على لملمة الموضوع بسرعة .. هذي قدرة خارقة يتمناها كثير ..

أنتِ تذكريني كثير بنفسي ..

لحد يفهم اني قاعده أمدح نفسي .. لان أختنا الأنون تشوف انه طبع مو حلو .. بينما أنا أحبه ..

محد و ابن أمه اللي يقدر يفتعل مشكلة طويلة بيني وبينه .. مستحيل

لاني مثلك .. ألملم الموضوع قبل يكبر .. و أتغابى .. أسوي نفسي ما فهمت وش يقصد ..

أيام الدوام.. كان فيه بنت سوسة .. من برا تبين انها طيبة وعسل و ناضجة .. ومن داخل مريضة و حقود ... والله انها افتعلت مشاكل مع كل الموظفات .. حتى وصلت لمديرة القسم النسائي .. حتى للمدير بالقسم الرجالي ... لا لا .. وصلت حتى لزوجة المدير خخخخخخخخخ تخيلي لأي مرحلة من الشر وصلت ...

وأنا ما قدرت عليّ .. وبالعكس .. هي اللي تحمست تسوي حفلة لي بالدوام بمناسبة زواجي .. 😁

لاني ببساطة كنت أتغابى على حركاتها و أسوي نفسي ما فهمت ولا شفت ..

حاولت مرة تفتعل معي مشكلة بيوم من الأيام .. و جاية تتشكى من مهمة سويتها .. تقول المفروض مو أنتِ اللي تسوينها .. أنا اللي أسويها .. مع ان المهمة ذي مو مخصصة لأحد .. شغلنا بذاك الدوام كان حبّي وكل وحدة تعاون الثانية .. وأنا كنت أكثر وحدة أتولى هالمهمة أصلاً قبل ما تتوظف هالموظفة .. ولما جتنا هالموظفة .. حصل انها هي أكثر وحدة تسويها .. لكن المهمة حرفياً مو لها بالاسم .. فهي جتني متشرهة و منتفخ وجهها ليش سويتيها اليوم ؟؟ هذي شغلتي أنا ... خايفة أسرق منها المهام اللي تتفاخر فيها عند الإدارة .. شايفة عقليتها طفولية لأي حد ؟؟؟ المشكلة انها أكبر مني بعشر سنين ..

عطيتها وضعية الغبية اللي ما فهمت وش تبي .. وليش هي متضايقة.. وقلت لها وأنا أكتب تقاريري.. روحي للمديرة شوفي يمكن تساعدك 😁

أتخيل بس لو قعدت أتناقر معها وأقول أنتِ بزر ؟ مين قال لك ان الشغلة لك أصلاً ؟ تراها لي إذا بنجي ع الأسبقية .. الخ

كان كبرت المشكلة وتصعّدت وصار فيه تحديد وظيفة كل موظفة بالضبط و يالله كل موظفة تكتب مهامها وووالخ ..

في الوقت اللي المفروض أكون أتقهوى فيه وأتناقش مع البنات بالتمبلر ليش شبّكت هايبرا مع أكاي خخخخخخخخخخ

فـ نرجع مرة ثانية لك ..

أول شيء .. احمدي ربك انك نشأتِ في بيئة هادية , طيبة , صحية .. وبعيدة عن المشاكل و لا قد قابلتِ بحياتك ناس مرضى .. أفضل من انك تطلعين قوية ولسانك حريقة .. بسبب انك نشأتِ ببيئة قاسية و مريتِ بتجارب خذلان و غدر .. أنتِ ربي يحبك ان شاء الله ويبارك بخطاك و كان حاميك من شياطين الانس طول حياتك .. فـ افتخري بقلبك الطيب النقي اللي ما يستوعب شرور الناس .. افرحي ان حياتك ما تلوّثت بأشخاص مختلين يكدرون صفو حياتك ... افرحي انك انسانة ما تطبّعتِ على أذية الآخرين ..

والنبي عليه السلام لما سئل أي الناس أفضل .. قال : كل مخموم القلب صدوق اللسان .. قالوا: صدوق اللسان نعرفه .. فما مخموم القلب ..قال : هو النَّقِيُّ التَّقِيُّ، لا إثمَ فيه، ولا بغيَ، ولا غلَّ، ولا حسدَ

فاشكري ربك انه هيأ قلبك بدون تعب ولا جهد انه يكون كذا ..

ثاني شيء .. مين قال لك انك إذا رديتِ بترتاحين .؟ خاصة انه ع حسب قولك ان البيئة من الأساس سامة ومليانة مشاكل .. يعني تبين كل يوم مشكلة مع وحدة ؟؟؟ وجو متوتر و مشحون ..ونفسية تعبانة ..وبالعكس الناس اللي مثلك لما تتكلم كلام سيء وترد ع الناس .. ما ترتاح هههههههههههههههه إذا رجعت للبيت تقعد تلوم نفسها .. هل زوّدت العيار ؟؟ أحس اني جرحتها ؟؟ كأني كبرت الموضوع ؟؟ ليتني ما تكلمت ... الخ ..

فإذا تتوقعين انك بترتاحين إذا تكلمتِ وافتعلتِ مشكلة ..أنتِ غلطانة .. والسياسة اللي تسوينها مع البنات هي الأفضل خاصة انها بيئة سيئة .. ما ينفع معهم الا كذا .. نظام ابعد عن الشر و غنيلوو

ثالث شيء .. أعرف انه شعور سيء لما تحسين انك مو قادرة تجمعين الرد المناسب .. أو تحسين جسمك بدأ يرتجف على مشكلة تافهة .. تقولين بنفسك أنا ضعيفة بمواقف زي كذا .. وش باسوي بمواقف صعبة ؟؟ ... يب يب أنا أفكر هالتفكير .. بس أحياناً أفكر من جهة ثانية .. مين قال اني ماراح أكون صامدة بالمواقف القوية ؟؟ ليش أحرص اني أختبر نفسي عليها ؟؟ أجيب لنفسي الغثاء بس عشان أختبر نفسي للمستقبل ؟؟؟ ليش أفكّر بشيء ما صار ؟؟؟ ياما و ياما شلنا هم على أشياء توقعناها مستحيلة علينا .. آخرتها طلعت مثل شربة الموية علينا .. وسبحان الله إذا احتسبتِ عند الله هالصفة فيك .. بإذن الله ماراح يضيعك .. وماراح يخذلك بهالمواقف ..

أتذكر لما نويت للاستقالة خلاص .. قلت باحاول تجربة أخيرة مع مدير الاتش آر .. انه يوظفني عن بُعد .. يعني عن قولة اني جربت كل الطرق قبل الاستقالة .. وخليني أحكيك عن هالآدمي .. هو مدير الاتش آر و نائب المدير التنفيذي للشركة و من أسوأ الناس خلقاً بالدوام 😬 وكلن يتشكى منه ومن أخلاقه .. لدرجة سمعت ان بنت طلعت من مكتبه مرة وهي دمعتها بخدها من سوء أخلاقه .. المهم رتبت معاه لقاء ..واضطريت أداوم حول اسبوع عشان أقابله وأسمع رده .. من الآخر عطلني عشان أقابله .. مع انه كان قادر يجاوب عليّ بالايميل .. لاني أرسلت للمدير التنفيذي طلبي.. وهو اللي حولني عليه .. يعني هو عارف وشو طلبي .. وقبل ما يكون طلبي .. هو طلب المدير التنفيذي أصلاً ..قال الموضوع عندك .. عطها الجواب ... المهم .. دخلت عليه وكان سيء و قبيح معي .. ماراح أقول التفاصيل .. قال لي عشان كذا معطلتني ؟؟ توقعت عندك موضوع أهم ؟؟ كذا بكل غرور يتكلم معي .. طيب عادي تقدر ترفض بدون الرد المعفن ذا .. وأنت أساساً عارف موضوعي مسبقاً .. يومنه تافه عندك .. كان رديت بالايميل وبس ... حتى أنا تعطلت .. تحسب بس أنت اللي عندك حياة ؟؟؟

جيت باتكلم .. قال لا تتكلمين .. توي ما خلصت .. موضوعك انسيه .. بس فيه كلام مهم أبغى أقوله كنصيحة لك في حياتك المهنية ..تبين تسمعينه ؟

قلت : لا

وطلعت من مكتبه ..

ههههههههههههههههههههههههههههههههههههههههههههههههههههههه

والله ثم والله ثم والله .. انه ما كان قصدي اني أرد عليه رد شين أو أسكته .. بس اشوف انه خيّرني وقال تبين تسمعين ؟ وأنا اخترت اني مابي أسمع ههههههه وين المشكلة ؟ هههههههههههههه

وكل من قلت له الموقف من الموظفات انهبلوا ههههههههههههههههههههه كيف تجرأتِ ؟؟!!!! وما لقيتِ الا فلان تنرفزينه ؟؟!!! ههههههههههههههه

وأنا الى الحين احس موقفي عادي .. وش فيكم هههههههههههه

مبين ان ردي خلاه يحترق لدرجة اني لما داومت بكرة عشان أنهي أوراقي .. لقيت بمكتبي مكالمة فائتة من سكرتير مكتبه هههههههه شكله يبي يستدعيني يبي يفضفض ههههههههههههههههههههههههههههه

اللي ابغى أقول له ..

أبداً لا تشيلين هم المواقف الصعبة وكيف بتكونين فيها .. ثقي ان ربي معك وبينصرك و بيجري الكلام اللي يحرق كبد خصمك ع لسانك ..

وتأكدي دايم .. ان ندمك على سكوتك أهوووون بكثييييير من ندمك على كلامك ..خاصة إذا كان على ناس من الأساس راعين مشاكل..

وعليكم السلام والرحمة 🩵

الحمدلله يارب كل أموري تمام ..

أنتِ بشرينا عنك ؟🩵

ياحي هالوجه نورتِ 🩵🩵

وترى آسكاتك كلها واصلة ، بالحفظ و الصون😁..

هو هاللقطة كلها كانت كارثية .. لكن فيه كوارث تترقع .. تمشينها لخاطر العظمة اللي شفتيها قبل ..يعني تقدرين ترقعين النزوة ذي انها جت بعد شاف نفسه كثير بالمستقبل غارق بالقتل و التدمير .. ومن الموسم الأول جابه لك وهو يضرب آني و يتبوسم ابتسامة شيطانية .. فكان فيه تلميحات لتوجهه هذا ..

لكن فيه كوارث .. ما تترقع و تدمر كل شيء عظيم بُني في السابق .. مثل انه اختار موتة أمه .. هنا لا .. خلاص ياخي اسكت .. انطم .. شتب

ههههههههههههههههههههه والله صدق مالهم داعي .. نبي نتأمل الدرر حقتك هههههههههه

عاد فك الشادوباند عندي .. بس مو بعيدة يرجع .. أشوف حسابات كثيرة ..فك معها بعدين رجع ..

أما وش الحل ..

فيه قائمة كثيرة حاطتها ببالي .. وكل مالها تزيد هالقائمة خخخخ

هلابك..

فرق بين المسؤولية و الهم ..

الهم شيء مؤقت يشغل تفكيرك بشكل حاد .. فما تقدرين تفكرين أو تركزين بشيء ثاني إلا إذا عندك مهارة عالية في التعامل بالمواقف الصعبة ..

بينما المسؤولية .. شيء مدته طويلة .. و تقدرين تتكيفين معه .. مثل الدراسة .. الوظيفة .. إدارة قسم .. الزواج .. الأمومة..الخ

والحمدلله .. مسؤوليتي هي أمومة ورعاية منزل .. مانيب رئيسة دولة هههههه

و هل الأم ماعندها وسائل ترفيه بحياتها ؟

ماقد شفتِ أم بالسوق ؟ بالكوفي ؟ بالنادي ؟ تشوف تلفزيون ؟ تقرأ كتاب ؟ تجتمع مع صديقاتها ؟ تحضر دورة للفخار ؟ للخبز ؟ للمكياج ؟؟ ..الخ

عادي ..ترى عايشين حياتنا بشكل طبيعي .. وننبسط ونضحك ونطلع و نروح .. بس اللهم أوقات مرحنا صارت مقيدة و محدودة.. مو مثل قبل ..

وهذا شيء طبيعي من قبل زواجي ..

قبل أتوظف كنت أتابع انيمياتي بأي وقت يجي ببالي ..صبح ليل مغرب ظهر .. كنت فاضية ..

لما توظفت ولان دوامي مسائي .. يتذكرون أهل التمبلر وقتها.. كنت أدخل أكثر شيء بالليل .. كذا من 11:00 .. لاني أجي دايخة فأنام كم ساعة .. بعدين أقوم و أروّق ع التمبلر وانيمياتي

لما تزوجت .. برضو صرت أروق بالليل ..أصلاً النت ببيتي وقتها كان معطوب .. ما يتعدل الا بعد 12 الليل خخخخخ ..

حتى لما صرت أم .. صار وقتي المفضل هو بالليل بعد 12:00 .. بعد ما ينامون أهل البيت .. هو الوقت الخاص بي .. وهو اللي أروق فيه بالانيميات أو غيرها .. سبحان الله يمكن ذاك الدوام المسائي كان تدريب لي للمستقبل عشان أروض نفسي اني أسهر الليل باقي حياتي ههههههه لاني قبل هالوظيفة كنت انسانة صباحية ولا أسهر .. خخخ

فـ بس ... هذا اللي بيتغير بالوحدة لما تتزوج ... أوقات الترفيه عندها بتكون محددة بوقت معين فقط .. وهي اللي تحدد الوقت المناسب لها ... مو انها تنحرم منها تماماً عشان صار عندها مسؤوليات ..

مثل الفرق بين أيام الدراسة والعطلة .. وقت المرح محدود فقط .. لكن مانتي ممنوعة منه ..

وأنا من الناس اللي من يومي بالثانوي ..مهما كنت مضغوطة .. مستحييييييل أحرم نفسي من أوقات المرح ..

أتذكر صديقاتي وبنات خالاتي يقفلون أجهزتهم و يعطونها أهاليهم ويحرمون أنفسهم منها ووو ..

أنا ماكنت أسوي كذا .. لاني أقدّر لحظة الترويق ذي + أعرف كيف أقسم وقتي و ألتزم فيه ..

ولو فاتتني لحظة الترويق ذي ..ممكن يخرب مزاجي باليوم كله ...

أما ليش للحين أتابع انمي ؟ ما طفشت منه ؟

سبق جاوبت ع هالسؤال .. وهذي كانت إجابتي :

أعرف ان الأعمال الواقعية أفضل و أنضج من الأنمي ..

و قد أجد فيها متعة أكبر ..

لكن متمسكة بالانمي ، ومابي أتوسّع أكثر ..

تعرفين ليه ؟

لانها أضعف الايمان

،

أنا انسانة منذ الصغر أحب الفن .. أحب أتأمل فيه .. أحب أعرف وش يصير خلف التصوير .. أحب أنبّش عن الممثلين

و أحب المسرح تحديداً .. وهو عالمي المفضل .. مو بس بالمتابعة .. حتى بالممارسة .. لو كان حلال .. كان لقيتيني ممثلة الحين خخخخخخ

من أحلى لحظات حياتي لما أدخل مسرح و أشوف الأدوات اللي فيه .. لذلك كنت نشيطة جداً أيام المتوسط و الثانوي وحتى الجامعة و مابعدها بالأنشطة المسرحية سواء بالمدرسة أو المراكز الصيفية .. تمثيل .. إنشاد .. إخراج .. إعداد .. كتابة نصوص … تصوير … أي شيء له علاقة بالمسرح تلقيني مبدعة فيه إلا الديكور خخخخخخخخ

،

فـ اختياري للانمي وعدم توسعي لفنون أخرى كان متعمد .. لانه أقل ذنوب من غيره .. تبقى شخصيات مرسومة غير حقيقية .. فـ اذا بنتكلم عن وحدة مثلي تحب تشارك اهتماماتها بحسابها ..

لما أتغزل بالشخصية كعادتي 😁 تبقى شخصية مرسومة مو رجل حقيقي 🙃 .. لما أربلغ لأي شخصية انثوية غير عن لما أربلغ لـ أنثى حقيقية من مسلسل .. الأولى رسمة ..أما الثانية يقع ذنب أي رجل يشوفها علي أنا … لما أسخر من شكل شخصية انمي غير لما أسخر من شكل ممثل ربي خلقه كذا … وقيسي عليها أمور كثيرة

أنا انسانة -أعرف نفسي- لما أحب الشيء .. أغرق في عالمه … مثل لما غرقت بالمتوسط بالأناشيد و بالثانوي بسيَر الصحابة رضوان الله عليهم و بالجامعة بكرة القدم > ملاحظين اني كل ما أكبر أنهبل ؟ 😭😅 .. بس يبقى اني تأسست بطفولتي و مراهقتي على شيء حميد 💗.. واللي لازال تأثيرها الكبير علي الى الآن ..

ماعلينا ..

فأنا أعرف اني اذا حبيت مسلسل ما .. راح أحب ممثلينه أو مخرجه .. وبابدأ أتابع أعماله .. وووووالخ

وشيئاً فشيئاً راح ابدأ أتقبل هالمجتمع النتن القذر … النساء مع الرجال .. واللبس الخالع .. و غيره من المصايب ..

فلذلك .. قفّلت على نفسي هالباب الواسع .. واخترت الأنمي و حرصت تكون انيمياتي اللي أتابعها نظيفة قدر المستطاع .. واللي يكون فيها بلاوي أنبّه عليها ولا أشجّع ع متابعتها ..