توفت وهي مافيها شي واحنا جالسين توفت قدامنا شفناها وهي تتوفى

بحيااتي ماراح انسى اللي صار قدامي بس تكفين ادعي لنا بناتها وعيالها وابوي لان صدمه والله

يا قلبي.. اسال الله في هذا اليوم وفي آخر ساعه ان الله يجبر قلبك جبرًا عظيمًا، ويجبر قلب خواتك وأخوانك وأبوك، ويربط على قلوبكم وينزل عليكم الصبر والسكينة.

كل شعور تحسين فيه الآن طبيعي، لا تستغربينه ولا تضغطين على نفسك، خذي حزنك على مهلك، وابكي وادعي وطلعي اللي بقلبك ولا تكتمين.. وإذا ضاق صدرك أو احتجتي أحد يسمعك أنا موجودة، بأي وقت تكفين تعالي كلميني ولا تشيلين كل هالثقل لحالك. ولا تنسينها من الدعاء والصدقة، والله ما يضيع برّكم فيها ولا دعواتكم لها، وأسأل الله أن يجعل كل دعوة منكم نورًا ورحمة عليها، ويرفع درجتها ويجمعكم بها في جنات النعيم.

واهتمي بنفسك وبأهلك هالفترة، وساعدوا بعض وتماسكوا، وخذوا بالأسباب اللي تهون عليكم مثل التلبينة والعصفر، وتصدقوا بهالأيام العشر.. وعسى الله يجعل بعد هالحزن جبرًا وسكينة تطمن قلوبكم.

يا حبيبتي انتي، عظم الله أجرك والله يرحمها ويغفر لها والله يجعل قبرها روضة من رياض الجنة، ويجبر كسركم جبرًا عظيمًا ويصبر قلوبكم ويثبتكم ويهون عليكم .. فقد الأم من أشد أنواع الفقد، واللي تمرين فيه طبيعي لأنك مو مستوعبة، لكن تذكري دائمًا أنها عند أرحم الراحمين، أرحم بها من الدنيا وما فيها،

وأسأل الله أن يربط على قلبك ربطًا جميلًا، ويبدل حزنكم سكينة وطمأنينة، وأن يلهمكم الصبر والسلوان، ولا تنسين الصدقة عنها ولو بشي بسيط، الله يجعلها نورًا لها

وتذكري قول الله تعالى: {إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ}