#wilandi

Koolslaai is so lekker maklike slaai, en verskyn met baie hoë frekwensie op ons aandete bord. Juis daarom het ons hom nou al ‘n paar variasies gegee - komkommer bygevoeg, appel of pynappel ingemeng, en sonneblomsaad werk ook baie goed. Maar dit is die nuutste byvoeging - eintlik deur my man gedoen - wat tot hierdie idee gelei het! Die oomblik toe sojasous bygevoeg word het ek geweet, hierdie kan mos werk vir soesji! Doen dit so:

Koolslaai in ‘n rol

1 klein koolkop (pers kool sorg vir mooi kleur)

3 wortels gerasper

1 groot beet (of 2 kleintjies), gerasper

mayonaise

ryspapier

sesamisaad - in ‘n platbord gestrooi

Sojasous

ingelegde gemmer (opsioneel)

Metode:

Sny die kool met ‘n skerp mes in stroke (gerasper is die tekstuur net te veel soos die wortels en beet).

Week 2 sirkels ryspapier in water vir +/- 1 minuut totdat dit begin sag word.

Plaas die ryspapiersirkels presies opmekaar in ‘n bord en vul met beet. wortels en kool deur ‘n strook in die middel te vorm - moenie te vol maak nie want die ryspapier skeur maklik, maar vol genoeg dat dit ‘n stewige rol vorm.

Draai versigtig, maar styf toe.

Rol in die sesamisaad en sny dan in skywe.

spuit ‘n blerts mayonaise op en rond af met nog saad.

Bedien met sojasous en ingelegde gemmer.

Dis Nasionale Melktertdag, en daar kan nie so dag verby gaan wat ek nie ook deel in die melktertpret nie! Ek is baie trots dat my Doilie-melktert in die Melktertversameling van Mari-Louis Guy en Callie Maritz mag pryk! Hierdie span het die manier om enige gebak net so proffessioneel en afgerond deur te gee! Ek het nog ‘n lang pad van droom om op die helde se vlak te kom, maar deel wel my lank en uitgebreide weergawe van my koffiemelktert met julle! Want wat gaan nou beter by melktert as koffie?

Koffiemelktert

OOND TEMP: 180˚C en 200˚C

Aantal Porsies: 1 melktert

ALGEMENE inligting: die melktert is nie die gebakte melktert nie, maar ‘n spoggerige weergawe van die ongebakte melktert met hemelse koffie en nartjiegeure.

Bestanddele:

Koekiebasis (Maak net ½ aan):

250ml botter

2 Koppies suiker

6 Koppies meelblom

250ml melk

½  Koppie goue stroop

2 Eiers

5ml koeksoda

½ teelepel (5ml) fyn kaneel

½  Eetlepel (15ml) gemengde speserye

½ teelepel (5ml) neutmuskaat

½  teelepel (5ml) naeltjies

1ml sout

Melkpap (resep maak genoeg vir 2 terte):

600ml melk

3 eiers

100ml bruinsuiker

60ml mielieblom

50ml koekmeel

5ml vanielje-geursel

50g botter

3 nartjies se skil (gerasper)

Sjokoladeseëllaag:

250g wit sjokolade gesmelt

Filo:

1 pak (2 rolle) tot 2 pakke (4 rolle)

250g botter

20ml koffiepoeier aangemaak met net genoeg kookwater om ekstrak te vorm

60ml bruinsuiker

Kaneelstroop (opsioneel):

¾ k bruinsuiker

60ml suiker

2.5ml kaneel

Proses:

Die koekiebasis:

Voorverhit oond op 180˚C.

Meng die botter deeglik.

Voeg die suiker by en klop tot donsig.

Sif die droë bestanddele, behalwe die koeksoda, saam.

Klop die eiers goed saam met die melk.

Voeg droë bestanddele om die beurt met vloeistof by botter mengsel.

Roer stroop in.

Los die koeksoda in klein bietjie warm melk op.

Voeg by die deeg en meng deeglik.

Rol dun uit en sny sirkel met 21cm deursnit uit.

Bak in voorverhitte oond vir 15 minute tot goudbruin en krakerig.

Laat op afkoelrak afkoel

Maak die melkpap:

Plaas die melk en nartjieskil in kastrol oor matige hitte en verhit tot net-net voor kookpunt

Klits die eiers liggies by die suiker in

Voeg die mielieblom en meel by en meng totdat dit ‘n gladde pasta vorm

Giet die warm melk by die eiermengsel en roer met sterk hale vinnig deur

Plaas die mengsel terug op die stoof en roer aanhoudend tot die mengsel dik word en begin kook

Haal van die plaat af en voeg die vanielje-geursel en botter by – meng liggies deur

verkoel in spuitsak

Wanneer afgekoel:

Spuit 1 laag op koekiebasis met groot ronde punt, en laat so stol, herhaal nog 2 keer

Filofrille:

Stel oond nou op 200˚C.

Gebruik eers slegs 1 pak filo.

Gebruik ‘n 27cm koekring om die sirkels uit te merk op die filovelle

Knip uit met skêr (jy kan al die velle gelyk knip as die boonste gemerk is)

Sny die vol sirkels uit soos moontlik en half waar die vol sirkel nie in die vel inpas nie.

Merk met ‘n koppie ‘n klein sirkel in die middel van die groter sirkel en sny die klein sirkel ook uit om ‘n ringvorm te skep.

Sny die ring op een plek deur .

Bewaar onder ‘n klam lap en gebruik soos nodig in die proses.

Bou die frille so:

Meng die koffie-ekstrak en suiker totdat al die suiker opgelos is

Smelt die botter

Meng 15-30ml botter met koffiemengsel

Neem filo en verf met botter-koffiemengsel, verf net soos nodig in proses – moenie vooruit verf..

Gebruik  die sirkels om ‘n laag frille te vorm op ‘n silpat of bakpapier op ‘n oondplaat

Bak vir omtrent 5 minute terwyl die smeer en snyproses herhaal

Vul die botter-koffie mengsel met gesmelte botter aan soos nodig – sodat die laaste lae van die 3 de filokonstruksie so te sê geen koffie in die bottermengsel het nie – die kleur gaan dus van donker bruin in die onderste konstruksielae na ligbruin in dieboonste konstruksielae.

Haal uit en pak 2de laag en bak weer vir 5 minute en herhaal 6 keer

Laat op afkoellrak afkoel

Maak 3 van hierdie konstruksies

Wanneer melkpap gestol is, plaas filofrille versigtig op

Giet dun lagie wit sjokolade

Spuit knope melktertpap rondom in sirkel

Pak filo konstruksie 2

En herhaal totdat laaste filokonstruksie gepak is.

Geroosterde neute (opsioneel):

100g amandelvlokkies

Rooster neute in oondpan in voorverhitte oond by 200˚C vir omtrent 7 minute, rond koek se voete af met die neute

Stroop:

Smelt die suiker in die water sonder dat dit kook

Bring tot kook en laat effens verdik

Voeg kaneel by en laat meng – swaai pot om hitte en kaneel te versprei

Bedien saam met melktert

Lietsjie jogurtterrien met aarbei-heuningstroop, tuisgemaakte muesli en geskroeiroosterde vrugte

Dis is vandag presies ‘n jaar terug wat ek gehoor het ek is deel van die gelukkige 10 wat in die Koekedoor ervaring gaan deel. Met daardie oproep was ek baie opgewonde! En ook baie bang! Ek het besef dat Bak101 my voorland is vir die kort tydjie wat ek het voordat ons na die stel vertrek. Maar dit is soos om voor te berei vir ‘n eksamen waarvan jy nie die klasse bygewoon het nie en dus nie ‘n idee het watter werk behandel is nie!

Ek het my bakkende skoonma-engel gepeper met vrae, en al haar boeke aangevra, net om te besef dat daar nooit genoeg tyd gaan wees om deur almal te gaan nie. Sy het vir my ‘n paar voorstelle gemaak van wat sy dink in die bakwêreld belangrik is om te weet, en ek het gou besef dat ek nie eers die terminologie onder die knie het nie - wat gaan ek maak as ek nie eers weet wat is die verskil tussen ‘n creme anglais en ‘n creme patisserie nie! My pa is ‘n kranige broodbakker, so ek het darem al daardie blootstelling aan ‘n baie goeie boerebrood gehad, maar wat as ek ‘n brood met heerlike groot gate moet bak? Ek het Carolié de Koster se ‘Rising to Perfection’ by my skoonma geleen en die basiese beginsels van die brode probeer in my kombuis (hierdie boek is nou aan my geskenk en ek pas dit soos goud op!)

Die reeks is nou agter die rug en ons almal weet dat ons toe nie die brood met groot gate gekry het nie, maar baie groter en nuwer uitdagings wat ek in my wildste drome nie sou kon voorstel nie! Die hoeveelheid kennis wat ek in hierdie ervaring opgedoen skep ‘n leerkurwe van hoër as Kilimanjaro!

Die ander boek waarna ek selfs as my handboek verwys het is Christine Capendale se ‘Bak vir pret en profyt’ - ‘n boek met so ‘n groot verskeidenheid resepte - en vir elke kombuisliefhebber ‘n moet!

Noudat ek gewoond geraak het om nie net die resep te aanvaar nie - maar baie verder te dink en doen (seker maar iets van Kanya wat aan my afgesmeer het), bly elke resep onder my eksperimentasie in die slag. Ek weet selfs nou al wat is ‘n terrien! Ek het hierdie resep in Christine Capendale se “Elke dag Koningskos’ raakgeloop, en hom aangevat! Christine se weergawe is baie goed - so ek hoop hierdie een kan haar goedkeuring kry! Die muesli kom van ‘n goeie vriendin, Lucy Vosloo - maar selfs hierdie resep het ‘n paar aanpassings...

Lietsjie Jogurtterrien

20ml gelatienpoeier

60ml lietsjie sap - gedreineer uit die lietsjies

1 blik (567g) lietsjies

500ml volroom gewone jogurt

50ml strooisuiker

250ml vars room geklop

Voer ‘n broodpan met kleefplasiek uit, en verf effens met water sodat dit nat is - dit maak die uitkeer makliker.

Dreineer die lietsjies en maak fyn in voedsel verwerker - moenie verpulp nie - die effense stukke in die terrein sal lekker wees.

Wanneer dit uit die voedselverwerker kom, plaas in ‘n sif en dreineer - gebruik hierdie vloeistof as die 60ml lietsjiesap.

Strooi die gelatienpoeier oor die lietsjiesap en laat spons.

Sodra benodig, plaas vir 40 sekondes in die mikrogolf om op te los - moenie laat dit kook nie!

Meng die jogurt, strooisuiker en lietsjies saam.

Meng die opgelosde gelatien by.

Vou alles by die styfgeklopte room in en laat oornag in die yskas om te stol.

Aarbei-en-heuningstroop

250g aarbeie gekap

85g heuning

80g bruinsuiker

Meng die aarbeie, suiker en heuning saam in ‘n pot.

Kook saam - pas hitte aan sodat reëlmatig kook.

As dit te sapperig is kan die temperatuur verhoog en andersom.

Kook totdat die vloeistof dik is - roer gereeld. Die aarbeie sal nog stukke wees - dit maak dit lekker.

Kan tot 1 week in die yskas in ‘n lugdigte houer gestoor word.

Tuisgemaakte Muesli

(die mengsel maak nogal ‘n groot hoeveelheid)

8 koppies hawermout

250ml bruinsuiker

500ml koringkiem

250ml gekapte neute van keuse

250ml klapper

250ml sonneblomsaad

125ml heuning

Meng al die bestanddele saam.

Plaas n ‘n oondpan en rooster in die oond vir 45 minute by 180°C - roer elke 10 minute goed deur (dis baie belangrik anders vorm daar klonte).

Stoor in ‘n lugdigte houer.

Geskroeiroosterde vrugte:

(net genoeg vir die hoeveeheid porsies wat vir die opdiening benodig word)

Gebruik enige harde/stewige vrugte soos appel, pynappel en peer.

Voorverhit ‘n groefpan tot baie warm. Spuit effens met kleefwerende baksproei.

Sny die vrugte in dun skywe  en braai op die pan sodat die groewe roostermerke maak.

Vir opdiening:

Haal die terrien uit die pan en sny in skywe.

Botterskorsie Croissants

 In Grahamstad het ek die geleentheid gehad om ‘n produk voor te lê vir goedkeuring om vir die tuisnywerheid te bak. Die komitee van die tuisnywerheid is almal baie ervare bakkers – meeste het al saam met hulle oumas gebak en is nou self oumas (en selfs ouma-grootjies!). Ek het vir vir my – soos enige onervare bakker maar doen – ‘n hoop resepteboeke by die boekwinkel gaan aanskaf en op hierdie een met botterskorsie croissants uit Hein Scholtz se boek, Munch, afgekom. Die feit dat dit goedgekeur is spreek vanself… probeer dit en laat weet my hoe jy dit ervaar?

 Botterskorsie Croissants

(24 broodjies)

(Enige pampoen kan gebruik word – ek het net gevind dat botterskorsie iets vir die geur doen.)

 Bestanddele:

250g gaar botterskorsie (of pampoen)

1 opgehoopte eetlepel botter

1kg koekmeel

10g kits suurdeeg

70g bruin, sagte bruin of Demerara suiker (hoe donkerder hoe beter vir die geur)

1 teelepel sout

150g botter

2 eiers, geklits

400ml louwarm water

 Metode:

1.      Druk die pampoen saam met die 1 opgehoopte eetlepel botter fyn, en laat eenkant om af te koel.

2.      Sif al die droë bestanddele in groot mengbak, en gebruik jou vingerpunte om die botter in te meng.

3.      Voeg die eiers en water by die pampoen en voeg by die meelmengsel. Meng om ‘n deeg te vorm.

4.      Knie die deeg vir ‘n paar minute en laat dan in die mengbak, bedek, en in ‘n warm plek totdat verdubbel in grootte.

5.      Knie weer die deeg af en verdeel in 3 gelyke dele.

6.      Rol elke stuk uit tot omtrent die grootte van ‘n groot pizza (nie te dun nie).

7.      Sny elke ‘pizza’ in 8 stukke. Rol elke stuk op in ‘n croissant vanaf die breë kant na  die punt kant.

8.      Plaas die croissants op bakplate – 2cm spasie tussenin – en laat weer op warm plek om te verdubbel in grootte.

9.      Wanneer amper reg om te bak, voorverhit die oond na 200˚C.

10.   Bak die croissants vir omtrent 20 minute of totdat goudbruin.

  Moenie vergeet om te laat hoe jou resultaat was nie:

[email protected]

Die Ontembare Eier