#rahimthoughts

مقدمة لابد منها:

أغلبنا دلوقتي بيستغرب ليه السنين بتعدي بسرعة من بعد 2019 أو من بعد كورونا، أو من بعد تاريخ معين خاص بيه.. كأن السنوات دي بتجري بسرعة رهيب والوقت فيها بيعدي بسرعة.

من يومين:

على قناة يوتيوب اسمها "Veritasium" شوفت فيديو بعنوان: Why Life Seems to Speed Up as We Age بيناقش قضية احساسنا بمرور السنين بسرعة، وقال إن السبب هو إن عقلنا مع التقدم في العمر بيحذف أجزاء من حياتنا من غير ما نعرف، مواقف أو تجارب أو يوميات أو أشخاص، بيحذفهم من تلقاء نفسه، وتلاقي السنة مش بقيلك منها غير كام ذكرى يتعدوا ع الصوابع.

وعقلنا البشري بيقيس الزمن بعدد وكمية الذكريات اللي هو فاكرها، يعني ذكريات أكتر = زمن أطول. ذكريات أقل = زمن أقصر!

من سنتين:

يوم من أيام 2024 يعني بعد خمس سنين من السنة المشؤومة ٢٠١٩.. اللي حصل ببساطة إني لاقيت لينك في منتدى ما، ومكتوب تحته لو دوست عليه هيعرفك كل الأرقام اللي سجلتها طول حياتك سواء على فونك الحالي أو القديم. حب الفضول دفعني أجرب، قومت دايس على اللينك، لاقيت كمية أرقام لا أتخيلها ومتسجلين بنفس الأسماء اللي أنا كنت مسجلهم بيها.

ولاقيت ناس كانوا قريبين مني في وقت من الأوقات، ومبيعديش يوم غير لما يبقى فيه بيننا تواصل. بس الغريب.. إني مكنتش فاكرهم قبل ما أدوس على اللينك، بمعنى تاني.. كانوا محذوفين تماما من ذاكرتي!!!

لولا إني شوفت أسمائهم مكنتش هتذكرهم تاني بقية حياتي، من دهشتي واستغرابي حاولت أتواصل معاهم تاني وأسأل عليهم لمرة —من الوارد— انها تكون الأخيرة! في منهم اللي كان نسيني بالفعل وافتكرني، وفي منهم اللي كان فاكرني عادي.

مبتظهرش ليه؟ معلش والله أصلي كنت حرّان.

مذاكرتش ليه؟ معلش والله أصلي كنت حرّان.

مخلصتش التاسك ليه؟ معلش والله أصلي كنت حرّان.

منزلتش ليه زي م اتفقنا؟ معلش والله أصلي كنت حرّان.