"Quezon Memorial Circle: Sentro ng Kasaysayan at Kalikasan"
Gusto n'yo ba ng budget friendly pero historical at swak na pasyalan para sa pamilya, kaibigan, kasintahan o kung solong manlalakbay ka man. Umpisahan nang bisitahin ang Quezon City Memorial Cirle na matatagpuan sa gitna ng Quezon City, partikular sa intersection ng Elliptical Road at Commonwealth Avenue.
Ang Quezon City Memorial Circle ay isa sa mga kilalang landmark ng Quezon City, na hindi lamang may malaking kahalagahan sa kasaysayan ng bansa, kundi pati na rin sa kultura at libangan ng mga tao. Matatagpuan sa gitna ng siyudad, ang lugar na ito ay puno ng kasaysayan, mga parke, at mga pasyalan, kaya’t naging paborito ng mga residente at turista.
Sa lugar din na ito makikita ang libingan ng ikalawang Pangulo ng Pilipinas, at kauna unahang Pangulo ng Commonwealth na si Manuel L. Quezon na nanungkulan mula noong 1935 hanggang 1944. Ang monumento ay itinayo bilang pag alala sa Pangulo. Ang lugar ay unang naging isang bahagi ng kanyang pangarap na magkaroon ng isang sentro para sa mga mamamayan ng bagong itinatag na Commonwealth ng Pilipinas.
At bilang parte para sa dagdag na kaalaman:
Alam niyo ba na Noong 1940, nagsimula ang konstruksyon ng Quezon Memorial Circle bilang pagbibigay pugay sa mga kontribusyon ni Manuel L. Quezon sa kalayaan at pambansang kaunlaran ng bansa. Inilaan ang proyekto bilang isang simbolo ng kanyang pamumuno.
Ngayon, ang Quezon Memorial Circle ay hindi lamang isang monumento ng kasaysayan, kundi isa ring popular na pook-pasyalan at sentro ng iba't ibang kultura at komunidad sa Quezon City. Ang parke at ang monumento ay bukas para sa publiko ng libre kung saan mayroong mga "food stall" na nag-aalok ng iba't ibang pagkain, mula sa mga street food tulad ng barbecue, isaw, at fish balls, hanggang sa mga mas malalaking kainan na nagsisilbi ng mga lokal na pagkain at inumin. Mainam itong lugar para magtanghalian o magmeryenda habang nag-iikot sa park. Nararapat lamang bisitahin ang monumento hindi lamang para pumasyal kundi para mas maging pamilyar at matuto pa tungkol sa kasaysayan at pinagmulan ng lugar na ito.
