#ewrop

Mae’n fy ngwylltio i fod cynifer o bobl yn trin yr etholiad Ewropeaidd sy’n digwydd yr wythnos hon fel refferendwm ar aelodaeth y Deyrnas Gyfunol o’r Undeb Ewropeaidd. Mae statws y DG fel Aelod-Wladwriaeth yr UE yn fater am sgwrs arall ac oes, mae yna lu o bethau i’w trafod ynghylch yr UE ac unrhyw refferendwm y’i gynhelir ar aelodaeth y DG ohono.

Ond, nid yr wythnos hon y cynhelir y refferendwm hwnnw. Yr hyn sy’n digwydd ar draws 28 Aelod-Wladwriaeth yr UE yr wythnos hon yw etholiad i benderfynu pwy sy’n cynrychioli pobloedd Ewrop yn Senedd Ewrop. Yr hyn sy’n digwydd yng Nghymru yr wythnos hon yw etholiad i benderfynu pwy fydd y pedwar person i gynrychioli Cymru yn Ewrop rhwng eleni a 2019.

Fe weles i lun a rannodd David Cameron ar Facebook yn gynharach. Yn y statws wrth ochr y llun, soniodd mai dim ond y Ceidwadwyr sy’n dymuno ac sy’n gallu rhoi refferendwm ar aelodaeth y DG o’r UE. Wel, fel rwy’ eisoes wedi dweud, nid Etholiad Cyffredinol sy’n digwydd yr wythnos hon. Dewch inni fod yn glir: ni fydd Aelodau Senedd Ewrop o’r Blaid Geidwadol yn gallu rhoi refferendwm i unrhyw un ar unrhyw beth. Ni fydd unrhyw un ar unrhyw bapur pleidleisio yr wythnos hon yn gallu rhoi refferendwm ar aelodaeth y DG o’r UE.

Yr hyn y mae gofyn inni ei wneud yr wythnos hon yw penderfynu pa lais ry’n ni am i’n cynrychioli ni yn Ewrop. A ydyn ni yng Nghymru am gael ein cynrychioli gan rywun sydd eisoes wedi ennill ei phlwyf fel cynrychiolydd cenedlaethol sy’n gweithio’n ddiflino yn Ewrop? Y ydyn ni am gael llais sydd bob amser yn dodi buddiannau ac anghenion ni a’n pobl ni’n gyntaf? A ydyn ni am gael llais sy’n gwrthod ac yn gwrthwynebu rhethreg adain dde, gul? Os felly, nid y Blaid Geidwadol sydd angen pleidleisio drosti, eithr Jill Evans ASE a Phlaid Cymru.

Rwy’n gofyn, felly, wrthoch chi bobl nad ydych wedi penderfynu pwy fyddwch chi’n pleidleisio drostyn nhw ddydd Iau eto, i feddwl yn garcus am ba fath o lais ry’ch chi am i Gymru gael yn Ewrop, ac i bleidleisio dros Blaid Cymru. Ond pa beth bynnag y gwnewch chi, da chi pleidleisiwch. Po lleiaf y nifer o bobl sy’n pleidleisio, po fwyaf y siawns y bydd rhethreg ffiaidd Ukip a’i thebyg yn profi llwyddiant.

Mae ‘da chi lais. Er mwyn dyn, defnyddiwch e.