#chwaraeon

Bu’n fwy heriol nag yr oeddwn wedi’i ddisgwyl, ond hefyd yn llawer mwy ffrwythlon a buddiol.

Mae’r prosiect nid yn unig wedi cyflawni’r targedau gweithredol (o ran cyfranogi, gwirfoddoli, digwyddiadau, partneriaethau) ond hefyd wedi sicrhau llawer o ganlyniadau ychwanegol eraill yn ymwneud ag iechyd, troseddau, hyfforddiant ac addysg, cydlyniant cymunedol, hyder, ac arwahanrwydd sy’n mynd ymhell y tu hwnt i’r amcanion gwreiddiol.

Er enghraifft, fel weler yn y fideo uchod, daeth Heather Lewis o Gaerdydd i adnabod rhai o’r ffoaduriaid a’r ceiswyr lloches yn ei hardal a chafodd ei syfrdanu gan rai o’r pethau anodd ac ofnadwy yr oeddynt wedi bod drwyddynt. Ar ôl iddyn nhw ddangos brwdfrydedd wrth wylio ei thîm pêl-rwyd yn chwarae, sefydlwyd tîm yn arbennig i fenywod a oedd yn ffoaduriaid ac yn geiswyr lloches.

Fe wnaethom ariannu cost llogi ystafell a chymwysterau hyfforddi i Heather redeg y tîm yn effeithiol. Ers hynny mae athletwyr lleol wedi rhoi cyfarpar iddyn nhw a bellach cynigir yr ystafell i’r tîm yn rhad ac am ddim trwy’r eglwys lleol lle cynhelir y sesiynau.

Effaith y prosiect

Mae cyfranogwyr a gwirfoddolwyr wedi disgrifio gwelliant yn eu hiechyd, eu llesiant, eu hyder, ac maent yn fwy gobeithiol ynglŷn â’u llwybrau datblygu.

Mae’r gymuned BME yng Nghymru yn fwy ymwybodol o chwaraeon ac yn gwneud mwy o ymarfer corff, gan ysbrydoli cylch ehangach drwy dafod leferydd

Mae mudiadau cymunedol wedi cryfhau eu trefniadau llywodraethu a dechrau gweithredu mewn meysydd newydd, gan sicrhau mwy o gyllid i gynnal gweithgareddau, ac wedi meithrin perthynas well â Chwaraeon Cymru a Chyrff Llywodraethu Cenedlaethol

Mae tîm y prosiect ei hun wedi datblygu mwy o sgiliau a gwybodaeth, hyder mewn gwaith datblygu, hyfforddiant tiwtora, mae rhai bellach yn aelodau o fyrddau cydraddoldeb ac wedi ennill cymwysterau hyfforddi gan Gyrff Llywodraethu Cenedlaethol

Mae gan Gyrff Llywodraethu Cenedlaethol a phartneriaid ym myd y campau berthynas well â chymunedau BME yng Nghymru, dealltwriaeth well o ddiwylliannau a rhwystrau, ac wrth gwrs ystod ehangach o chwaraewyr sy’n golygu y bydd y cyfoeth o ddoniau yn parhau i gynyddu i’r Cyrff Llywodraethu!

Partneriaethau â’r Heddlu i gefnogi pobl drwy chwaraeon, gan leihau troseddau ac annog mwy i adrodd troseddau casineb

Ac wrth gwrs, mae WCVA yn cael gweithio mewn maes chwaraeon newydd ac mae ganddo berthynas well â grwpiau BME.

Rydym hefyd wedi comisiynu cwmni ymchwil UK RCS i archwilio a gwerthuso effaith ein gwaith ymhellach – bydd yr adroddiad hwn ar gael erbyn diwedd y mis.

“Ry’ ni fel teulu’n teimlo’n gymaint agosach ac wedi gwella ein perthynas ers i ni gymryd rhan yn eich prosiect”

Rhoi’r clod dyledus

Un o’r prif resymau dros lwyddiant y prosiect yw’r partneriaethau, wrth i bawb gydweithio â’i gilydd gan rannu’r un weledigaeth a rhannu adnoddau.

Felly rhaid i mi ddiolch i Chwaraeon Cymru am eu cefnogaeth a’u hymroddiad i brosiect Chwaraeon BME Cymru. Hoffwn ddiolch hefyd i’r Cyrff Llywodraethu Cenedlaethol a’r partneriaid darparu – Cymdeithas Bêl-droed Cymru, Criced Cymru, y Gymdeithas Hwylio Frenhinol, Casnewydd Fyw, adran Chwaraeon Dinas Abertawe, GemauStryd, Chwaraeon Anabledd Cymru i enwi dim ond rhai.

“Mae Clwb Nofio Cyfeillion dŵr BME yn enghraifft berffaith o weithgaredd cymunedol lleol, rhad. Mae’n amser cyfforddus, i fenywod yn unig ac mae’n rhoi’r cyfle i ni ymarfer nofio heb hijab”

Y camau nesaf

Er ein bod wedi helpu dros 3000 o unigolion i ddechrau cymryd rhan mewn chwaraeon yn rheolaidd, wedi recriwtio dros 150 o wirfoddolwyr, wedi datblygu partneriaethau â dros 80 o bartneriaid ym myd y campau, wedi cefnogi dros 60 o grwpiau cymunedol, dim ond crafu’r wyneb yr ydym wedi’i wneud ac mae angen mwy o waith.

Mae Chwaraeon Cymru yn cydnabod hynny, ac wedi ymrwymo i roi cefnogaeth bellach am y 9 mis nesaf. Bydd fy rôl i’n newid i ganolbwyntio ar 3 pheth:

Datblygu’r gweithlu – hybu sgiliau Cyrff Llywodraethu Cenedlaethol drwy ddarparu hyfforddiant ar gynnwys pobl BME a chymorth un wrth un

Ymchwil a dirnadaeth - deall beth sy’n cael ei ystyried yn arfer da ac annog pobl i ddysgu oddi wrth ei gilydd

Cydweithio strategol - helpu mudiadau i ddeall pwysigrwydd cynhwysiant BME a gweithio gyda nhw i greu newid.

Bydd timau Casnewydd ac Abertawe yn cael cyllid er mwyn parhau â’u Gwaith chwaraeon cymunedol ardderchog am y 9 mis nesaf.

Mae’r prosiect wedi datblygu’n fawr ers iddo ddechrau ac mae ganddo bellach swyddog pwrpasol ym mhob ardal, gyda fforymau yn dod â phartneriaid ym myd y campau at y gymuned, yn grymuso grwpiau cymunedol ac yn datblygu cysylltiadau ystyrlon o fewn cymunedau. Gobeithiwn gyflawni mwy fyth i’r gymuned BME dros y 9 mis nesaf.

“Mae fy mywyd wedi newid ers cymryd rhan yng ngweithgareddau’ch prosiect. Dwi ddim yn teimlo’n unig nac yn isel dim mwy”