#bernerbars

Super gäbig grad am Bahnhof gläge und are erschtklassige Location, isch ds Toi et Moi ja eigetlech zum Erfolg verdammt. Es isch hübsch dinne u dusse u bietet feins Ässe (u.a. Yumi Apéro) und e sehr gueti Uswahl bi de Getränk. 

Aber äbe: derzue gits leidr meischtens schlächti Bedienig. Nid nume ig, aber o es paar anderi Chunde hei müesse merke, das es nid immer grad gyget, wenns i däm Resti um Bedienig geit. 

Fazit: Vom Lokal u vo dr War här gseh sy si beschtens ufgstellt, nume stelle si sech sälber es Bei mit dr wenig ufgschtellte und unufmerksame Bedienig.

Bim Marta isch vil los und alles mit emne sehr britische Flair. Uf de Tische heissts zwar Bedienung an der Bar, aber meischtens isch öpper wie vo Zouberhand grad denn bi eim am Tisch, weme sech entschide hett. E breiti Uswahl a Cider, Whiskeys, Iistee, feine Drinks u interessante Bier (Aare Bier u Specials) wird ergänzt mit Länggass-Tee, Scones, u Cakes.

Drnäbe hett ds Marta o sehr vil cooli u abwächsligsrichi Aaläss ufem Programm (Pubquiz, Konzärt, Läsige, Poetry Slams, ...).

Fazit: E heimischi Atmosphäre, Cider u anderi britischi Spezialitäte wärde kombiniert mit coole Events. Top!

Klein aber oho! isch ds Les Amis. Wie bimne britsche Pub (public house) isch d Mischig vo de Bsuecher u di familäri Atmosphäre zentral. Ussertdäm: wo schüsch isch dr Endo vo Stiller Haas so hüfig z gseh wi hie? Wy u Portwy si exzellänt (und es wird generös iigschänkt), ds Bier Feldschlösschen (auso nid mi Favorit), u zu de Drinks chani nüt säge, i drum dert no keni gha. We eim e Wy passt, chame ne o no grad bir Huseigene Wyhandlig bstelle.

D Konzärt chöi o aues, öb dusse under de Loube oder dunde im Wohnzimmer. U trotz de änge Platzverhältnis u de vile Lüt fingt sech immer no ne Platz für öpper meh.