تيتو

خاصية anonymous ask معموله علشان تشارك فكره او تقول كلمه كويسه بس مكسوف مثلا او مش حابب تظهر وبتساعد بدون شو و مش معمول علشان تدخل تهاجم حد او تتنمر عليه و تقول رأيك فيه بطريقه تجرحه .

الناس هنا جايه علشان تكون براحتها و تقول اللي مش بينفع يتقال على منصات التواصل الاجتماعي التانيه فبلاش انت تيجي بعقدك و مشاكلك النفسيه تضايق الناس لانك متعرفش ان اللي بيتكتب دا الجزء السهل اللي ينفع يتشرح بالكتابه .

مفيش حد هنا على تمبلر علشان يسمع رايك فيه شخصيا لانك مهما كنت متابع بوستاته او تفاعله فانت بردو متعرفهوش شخصيا فانت مش بتعمل حاجه غير انك بتضايق الناس بمشاكلك النفسيه (اللي المفروض تتعالج منها ) و بتصدر احكام غلط على ناس متعرفهاش (و دي حاجه بردو لازم تبطلها )

رايك فيا شخصيا ميلزمنيش و مش هيفرق معايا اطلاقا لان اللي يعرفوني كويس بيحبوني و بيتقبلوني و كون شخص مجهول عايش في الضل جبان يقول رايه فيا هو حكم على نفسه اكتر دقه مما قاله في حقي .

ياريت نتعلم ثقافة نقاش الفكره و الموضوع مش نقاش الشخصيه .