Randa's world

اني اتبسط و اكون أحسن صورة من نفسي في الأوقات دي.

أوقات الصراع، التعايش مع الأوضاع المؤلمة،

ال survival mode زي ما بنسمية.

تعبت من كتر التأجيل، تأجيل الفرح لحد ما الدنيا تظبط،

تأجيل الحياة، تأجيل الأحلام، تأجيل التواصل الصحي مع الناس.

النهاردة إتأكدت إن الدنيا مش هتظبط لمجرد إني بحاول و بعافر،

الكدبة الكبيرة اللي عايشنها و مصدقينها إن مجهودك مش هيضيع و تعبك هيتكلل بالنجاح .

ده وهم بنضيع عمرنا فيه، علشان نفضل مستنيين اللحظة اللي هتتحقق فيها السعادة الموهومة.

الحقيقة التعيسة، هي إن لو مش مكتوب مش هيحصل.

سعيت بأه مسعيتش، تعبت متعبتش، سهرت مسهرتش.

لو مش مكتوبة دموعك لو بقت أنهار غرقت العالم مش هيحصل.

إنتظارك للشئ مش هيعجل بحدوثة لو هو مش عايز.

ف علي سبيل إنك متخسرش الحاضر زي ما خسرت الماضي و غالباً المستقبل، جرب تعيش في اللحظة دي بس.

لو كل حاجة مش مثالية ، مش معاك كل حاجة، ولا أي حاجة، جرب باللي معاك تكون بتعمل حاجة أي حاجة.

خليك صاحي مش في وضع hibernating لحد ما الدنيا تظبط.

خليك عايش موجود بتعمل حاجة بتتكلم صوتك مسموع .

لو اختفيت لحد ما الدنيا تظبط هتفضل مش موجود لحد ما تتنسي.

الحياة مش هتستناك هي كده كده هتكمل، و الناس اللي انت فاكر انهم شايفين لحظتك الغير مثالية، ضعفك و نقصانك، كل ده مش واخد ٥ دقايق تفكير من يومهم. و البائس الوحيد هو إنت.

النهاردة قررت أعيش مهما الدنيا خدت مني و سابتني فاضية تماماً من كل حاجة.

قررت أعمل identity للأيام السودة دي و مخليهاش يكون شكلها فاضي و عايش علي ذكريات الماضي و بيتنشأ علي نقطة ماية يحدفهاله المستقبل.

قررت أتمرد علي الولا حاجة اللي الدنيا بتديهالي و أديها ضهري و أعيش كإني ولا شايفاها ولا عايزاها ولا مستنياها.

دايماً كانت واحده من صفاتي إني بعمل من الفسيخ شربات، و حالياً مفيش أفسخ من حياتي.

برلين

يونيه ٢٠٢٥

Even when i was alone, i was never lonely.

Now i feel lonely, alone, broke, no one gets me, no one sees me, no one even knows i am alive.