Pride of Pakistan

پاکستانی لیکچرر ڈاکٹر مبشر حسین رحمانی کو کمپیوٹر سائنس کے شعبے میں دنیا کے بہترین 1 فیصد محققین میں شامل کر لیا گیا۔ ڈاکٹر مبشر حسین رحمانی ماہر تعلیم مہران یونیورسٹی آف انجینئرنگ اینڈ ٹیکنالوجی سے کمپیوٹر سسٹم انجینئرنگ کے شعبے سے فارغ التحصیل ہیں۔ عالمی دنیا میں پاکستان کا نام روشن کرنے والے مبشر حسین کا کام وائرلیس نیٹ ورکس، بلاک چِین، علمی ریڈیو نیٹ ورکس اور سافٹ ویئر سے متعین نیٹ ورکس پر مرکوز ہے۔ انہوں نے 100 سے زیادہ جائزہ لینے والے مضامین لکھے ہیں جن میں سے 12 کلیریویٹ کے سب سے زیادہ حوالہ جات والے مضامین ہیں۔ کلریویٹ انالٹیکس کی مرتب کردہ تازہ ترین رپورٹ میں گزشتہ دہائی کے دوران حوالے دیے گئے ہیں جبکہ منتخب کردہ فیلڈ میں نمایاں اثر و رسوخ کے ساتھ روشنی ڈالی گئی ہے۔

اس رپورٹ میں محققین کو دنیا کے سب سے اہم چیلنجوں پر کام کرنے والے شارٹ لسٹس کی فہرست جاری کی گئی ہے جنہوں نے اس سال کی فہرست میں 26 نوبل انعام یافتہ افراد سمیت21 شعبوں میں 6 ہزار 400 محققین بھی شامل ہیں۔ رحمانی اس وقت کارک انسٹی ٹیوٹ آف ٹیکنالوجی (سی آئی ٹی) کے شعبہ کمپیوٹر سائنس میں پڑھا رہے ہیں۔ اس سے قبل انہوں نے اسسٹنٹ لیکچرر کی حیثیت سے 5 سال تک کامسٹس یونیورسٹی اسلام آباد سے وابستہ رہے ہیں۔ پروفیسر ڈاکٹر مبشر حسین کے تحقیقی کام کو بین الاقوامی سطح پر تسلیم کیا گیا ہے جبکہ انہیں متعدد ایوارڈز بھی مل چکے ہیں۔

پاکستان درد دل رکھنے والے لوگوں کا ملک ہے۔ یہاں لوگ خیراتی اور فلاحی اداروں کو دل کھول کر عطیات دیتے ہیں۔ وزیر اعظم عمران خان نے درست کہا ہے کہ پاکستان میں لوگ ٹیکس دینے پر اتنا یقین نہیں رکھتے جتنا خلق خدا کی مدد کرنے پر یقین رکھتے ہیں۔ پاکستان میں فلاحی کام کرنے کے بہت مواقعے ہیں۔ ہمیں متمول طبقے کو اس جانب لانا چاہیے۔ لیفٹیننٹ جنرل (ر) محمد مصطفی خان نے المصطفیٰ ٹرسٹ کی بنیاد رکھی اور یہ ٹرسٹ کام کر رہا ہے۔ مجھے المصطفیٰ ٹرسٹ اس لیے بھی دلچسپ لگا کیونکہ زیادہ تر این جی اوز اور ٹرسٹ کی کوشش ہوتی ہے کہ وہ بڑے شہروں میں کام کریں تا کہ اس کام کو لوگوں کو آسانی سے دکھایا جا سکے۔ صاف بات ہے کہ اگر کام نظر نہیں آئے گا تو لوگوں سے مدد لینے میں مشکل ہو گی۔ اس لیے ہم نے دیکھا ہے کہ شہروں میں مختلف تنظیمیں فلاحی کام کرتی نظر آتی ہیں۔ حالانکہ کام کرنے کی زیادہ ضرورت دیہی اور غریب علاقوں میں ہے۔ 

لیکن دیہی اور غریب علاقوں میں کیے جانا والا کام لوگوں کو دکھانا مشکل ہو جاتا ہے۔ لیکن لیفٹیننٹ جنرل (ر) محمد مصطفیٰ خان کا المصطفیٰ ٹرسٹ شہروں سے دور غریب اور متوسط علاقوں میں کام کر رہا ہے، اور انھیں اس بات کی کوئی پرواہ نہیں ہے کہ ان کا یہ کام میڈیا اور لوگوں کی نظر میں ہے کہ نہیں۔ المصطفیٰ ٹرسٹ بنیادی طور پر غریب اور سطح غربت سے نیچے رہنے والے طبقوں کو پرائمری ہیلتھ اور صحت کی بنیادی سہولتیں دینے کے لیے کام کر رہا ہے۔ اس مقصد کے لیے المصطفیٰ ٹرسٹ نہایت غریب علاقوں میں میڈیکل سینٹرز، ڈسپنسریز اور موبائل ڈسپنسریز قائم کرتا ہے۔ جہاں غریب لوگوں کو مفت علاج کی سہولت دی جاتی ہے۔ ٹرسٹ اس بات کو بھی یقینی بناتا ہے کہ اس کے سینٹرز میں اسپیشلسٹ ڈاکٹرز کو لیجایا جائے اور وہ وہاں غریب لوگوں کا مفت چیک اپ کریں اور ان کا علاج کریں۔ اس مقصد کے لیے بڑے بڑے اسپیشلسٹ کے ساتھ المصطفیٰ ٹرسٹ نے معاہدے بھی کیے ہیں۔ اس کے ساتھ ٹرسٹ لوگوں کو ایکسرے، ای سی جی اور الٹرا ساؤنڈ، کی مفت سہولیات بھی فراہم کرتا ہے۔

لوگوں میں صحت کے حوالے سے شعور پیدا کرنے کے لیے غریب علاقوں میں آگاہی مہم بھی چلائی جاتی ہے تا کہ لوگوں کو اپنی صحت کا خیال رکھنے کا احساس دیا جا سکے۔ دور دراز علاقے جہاں پہنچنا مشکل ہے وہاں موبائل ڈسپنسریز پہنچائی جاتی ہیں۔ یہ سب کام ان علاقوں میں کیے جا رہے ہیں جہاں کی خبر بھی ہم تک نہیں پہنچ سکتی ایسے میں ان علاقوں میں کیے جانے والا کام کیسے ہم تک پہنچ سکتا ہے۔ مجھے المصطفیٰ ٹرسٹ کی ایک بات یہ بھی اچھی لگی ہے کہ اس میں کام کرنے والے کسی بھی شخص کو کوئی تنخواہ نہیں دی جاتی۔ سب جذبہ انسانیت کے تحت مفت کام کرتے ہیں۔ ہمارے ملک میں ایسے ادارے بھی کام کر رہے ہیں جن کے ڈائریکٹرز نے اپنی پر کشش تنخواہیں رکھی ہوئی ہیں، شاندار دفاتر بنائے ہیں اور بہترین اسٹاف رکھا ہوا ہے۔ ان سے جب پوچھا جاتا ہے کہ بھائی یہ سب کچھ کیوں تو وہ کہتے ہیں کہ دکھائیں گے نہیں تو بیچیں گے کیا۔ لیکن المصطفیٰ ٹرسٹ نے خود کو ان سب دنیاوی چیزوں سے دور رکھا ہوا ہے۔

وہاں کسی کی کوئی تنخواہ نہیں ہے۔ کسی کو مراعات حاصل نہیں ہے۔ جس میں انسانیت کی خدمت کا جذبہ ہے وہ کام کر لے جس کو نوکری کی تلاش ہے وہ کوئی اور جگہ دیکھ لے۔ اگر دیکھا جائے تو زیادہ تر فلاحی اداروں میں تنخواہوں اور مراعات میں ہی گھپلے نظر آتے ہیں۔ ایک بہت بڑے اسلامی ریلیف کے ادارے میں 2016 میں اسکینڈل سامنے آیا تھا کہ اس نے اپنے لوگوں کو ساٹھ ہزار پاؤنڈ سے زیادہ دیے جس کا کوئی حساب نہیں تھا۔ 2020 میں المصطفیٰ ٹرسٹ نے آٹھ لاکھ سے زائد مریضوں کو علاج کی مفت سہولیات میسر کی ہیں۔ اسی طرح چونسٹھ ہزار سے زائد مریضوں کو مفت لیب کی سہولیات فراہم کی گئی ہیں۔ نو ہزار سے زائد مریضوں کے مفت الٹرا ساؤنڈ کیے گئے ہیں۔ اسی طرح ہزاروں لوگوں کو دیگر طبی سہولیات بھی فراہم کی گئی ہیں۔ آجکل پاکستان میں ڈینٹل علاج بہت مہنگا ہو گیا ہے۔ میرے لیے یہ خوشی کی بات تھی کہ ضرورت مند اور انتہائی غریب لوگوں کو فری ڈینٹل علاج کی سہولیات فراہم کی گئی ہیں۔ اس طرح 2020 میں دس لاکھ سے زائد لوگوں کو المصطفیٰ ٹرسٹ کی جانب سے پرائمری ہیلتھ کی سہولیات فراہم کی گئی ہیں۔

میں سمجھتا ہوں پاکستان میں فلاحی اداروں کو صحت کے شعبہ میں کام کرنے کی ضرورت ہے۔ ہمارے مخیر حضرات بھی دینی درسگاہوں کی مدد کرنے کو بہت افضل سمجھتے ہیں۔ میں دینی درسگاہوں کی اہمیت سے انکاری نہیں ہوں۔ مجھے ان کی اہمیت کا بخوبی اندازہ ہے۔ لیکن پھر بھی سمجھتا ہوں پاکستان میں صحت کی سہولیات کی بہت کمی ہے۔ ویسے تو تعلیم کی سہولیات کی بھی بہت کمی ہے۔ لیکن صحت انسانی جان کا مسئلہ ہے۔ اس لیے انسان کی جان بچانا سب سے افضل ہے۔ جان ہے تو جہان کی مصداق جان بچانے کی اپنی اہمیت ہے۔ اس لیے اگر ہم صحت کے شعبہ میں کام کرنے والوں کو ترجیح دیں تو مجھے امید ہے کہ پاکستان میں ہر غریب کو علاج کی سہولت مل سکتی ہے۔ ہمیں سمجھنا ہو گا کہ جس نے ایک انسان کی جان بچائی اس نے پوری انسانیت کی جان بچائی۔ اس لیے انسانوں کی جان بچانے سے افضل کوئی کام نہیں۔ مجھے امید ہے کہ لیفٹیننٹ جنرل (ر) محمد مصطفیٰ خان کی قیادت میں المصطفیٰ ٹرسٹ ایک نیک کام کر رہا ہے۔ وہ اس ملک کے محروم اور غریب طبقہ کی فکر کر رہے ہیں۔ 

ان کا الیکشن لڑنے کا بھی کوئی ارادہ نہیں ہے۔ ان کا کوئی انتخابی حلقہ بھی نہیں ہے۔ وہ کسی سیاسی جماعت کے لیے بھی کام نہیں کر رہے۔ ان کا کام پورے پنجاب میں پھیلا ہوا ہے۔ اور وہ اس کا دائرہ کار پورے پاکستان میں پھیلانا چاہتے ہیں۔ وہ گاؤں گاؤں کام کرنے کی چاہت رکھتے ہیں۔ میری رب کریم سے دعا ہے کہ اللہ ان کی مدد کرے اور ان کے تمام اہداف ان کے لیے آسان بنا دے۔ ہمارے ملک میں ایک عجیب کلچر ہے کہ ہم غیر ملکی این جی اوز اور فلاحی اداروں کو بہت قدر کی نگاہ سے دیکھتے ہیں۔ جب کہ اپنے اداروں کو وہ عزت اور احترام نہیں دیتے جو ہمیں دینا چاہیے۔ میں سمجھتا ہوں پاکستان میں المصطفیٰ ٹرسٹ جیسے کئی ادارے جو کہیں نہ کہیں انسانیت کی خدمت کر رہے ہیں ہمیں ان کی قدر کرنی چاہیے۔ یہ ہمارے اصل ہیرو ہیں۔

مزمل سہروردی  

عمومی طور پر جو خبریں پڑھنے سننے کو ملتی ہیں وہ کوئی اچھی نہیں ہوتیں۔ آئے دن کے سانحات اور واقعات کے بارے میں سن کر دل دکھی ہوتا ہے۔ ایسا بہت کم ہوتا ہے کہ کچھ اچھا سننے کو ملے اور جسے سن کر دل باغ باغ ہو جائے۔ اس ماحول میں اگر کوئی فرد اپنی زندگی کو واقعتاً دکھی انسانیت کی خدمت کے لئے وقف کرتا ہے تو وہ کوئی عام آدمی نہیں ہو سکتا۔ اُس کے پاس خوب پیسہ کمانے اور اپنے کام کی وجہ سے بہت شہرت حاصل کرنے کا بھی موقع ہو لیکن وہ ایسا نہ کرے بلکہ چپ چاپ اپنا کام کرتا جائے تو وہ واقعی کوئی بڑا شخص ہے۔ آج میں آپ کو ایک ایسے ہیرو سے ملواتا ہوں جنہیں میں کبھی نہیں ملا۔ بلکہ اس کالم کو لکھنے سے پہلے اُن سے بات کرنا چاہتا تھا لیکن پتا چلا کہ وہ تو موبائل ہی نہیں رکھتے۔ ویسے تو ہمارے ہاں ہیروز کی بہت کمی ہے کیوں کہ معاشرہ میں تربیت اور کردار سازی کے نہ ہونے کی وجہ سے ہمارے ارد گرد جہاں دیکھیں آپ کو ولن ہی ولن ملیں گے لیکن سر راشد جن کا پورا نام راشد چیمہ ہے، بہت کمال کے آدمی ہیں۔ 

اُن کا تعلق درس و تدریس ہے اور وہ راولپنڈی میں صدیق پبلک اسکول کے نام سے نجی تعلیمی اداروں کو چلاتے ہیں جن میں ہزاروں بچے اور بچیاں تعلیم حاصل کر رہے ہیں۔ پرائیوٹ اسکول بہت سے ہیں اور کئی پرائیویٹ اسکول اس لئے اہم بن جاتے ہیں کہ اُن کا رزلٹ بہت اچھا ہوتا ہے۔ اگرچہ سر راشد کے اسکول کے بچے بورڈز میں اہم پوزیشنز لینے اور اچھے رزلٹ دینے کی وجہ سے جانے جاتے ہیں جبکہ ان کی فیس بھی دوسروں کے مقابلہ میں بہت کم ہوتی ہے لیکن جس بات نے مجھے متاثر کیا وہ سر راشد کے اسکول میں غریب یتیم بچوں کو مفت تعلیم کی فراہمی ہے۔ بس شرط صرف یہ ہے کہ بچے میں قابلیت اور پڑھنے کا شوق ہو۔ ایک نہیں دو نہیں، دس نہیں بیس نہیں بلکہ سینکڑوں بچے سر راشد کے اسکولوں میں بالکل فری تعلیم حاصل کر رہے ہیں۔ میرے ایک جاننے والے نے مجھے بتایا کہ اُس کا کزن، جس کے بچے سر راشد کے اسکول میں پڑھتے تھے، وہ فوت ہو گیا۔ بچوں کو فیس کا مسئلہ تھا لیکن جیسے ہی سر راشد کو بتایا گیا کہ بچوں کا والد فوت ہو گیا، اُن سب کی تعلیم فری کر دی گئی۔ 

صرف یہی نہیں بلکہ مجھے یتیم بچوں کی پرورش، دیکھ بال اور تعلیم و تربیت کے لئے اپنی مثال آپ سویٹ ہوم کے زمرد خان (جو پاکستان پیپلز پارٹی کے رہنما اور سابق ایم این اے ہیں) نے بتایا کہ سویٹ ہوم کے دو سو بچے بچیوں کو سر راشد اپنے اسکول میں مفت تعلیم فراہم کر رہے ہیں۔ ان میں سے کئی بچے بچیاں میٹرک اور ایف ایس سی کر رہی ہیں۔ یہاں میں بتاتا چلوں کہ زمرد خان صاحب اُن لوگوں میں سے ہیں جن کی میرے دل میں بہت قدر ہے اور اُس کی وجہ صرف یہ ہے کہ اُنہوں نے اپنی زندگی کو سویٹ ہوم میں بسنے والے یتیم بچوں کے لئے وقف کر رکھا ہے۔ ان یتیم بچوں بچیوں کو وہ ایک باپ کی طرح Treat کرتے ہیں جو میں نے خود بھی دیکھا۔ زمرد خان کو سیاست کی وجہ سے پہلے ہی جانا جاتا تھا، وہ مشہور آدمی تھے لیکن جب سے اُنہوں نے سویٹ ہوم کی ذمہ داری سنبھالی اور جس شوق اور جوش سے وہ یتیم بچوں بچیوں کا خیال رکھتے ہیں اور اُن کی تعلیم و تربیت پر توجہ دیتے ہیں، اُس کے بنا پر میری نظر میں وہ ایک بہت بڑے آدمی ہیں جو اپنے اس عمل کی وجہ سے قابلِ تقلید ہیں۔ 

سر راشد کے متعلق میری زمرد خان صاحب سے بات ہو رہی تھی تو اُنہوں نے مجھے بتایا کہ اس سال سے وہ یتیم بچوں کے لئے گجر خان کے علاقہ میں ایک کیڈٹ کالج شروع کر رہے ہیں جس کی بلڈنگ تیار ہو چکی، ہوسٹل بھی تیار ہے اور اس کیڈٹ کالج کے ایڈمشن ہونے جا رہے ہیں۔ اس کیڈٹ کالج کی تمام تعلیم کا بندوبست سر راشد نے کیا اور اس کے لئے وہ ایک پیسہ بھی نہیں لے رہے۔ زمرد خان نے بتایا کہ یتیم بچوں کی کیڈٹ کالج میں تعلیم اُن کا ہوسٹل اور کھانا پینا سب کچھ فری ہو گا جس میں سر راشد کا بہت اہم کردار ہے۔ پانچ ستمبر کو یتیموں کے لئے مختص اس پہلے کیڈٹ کالج کے ایڈمشن کے لئے سر راشد کے ہی ایک اسکول میں ٹیسٹ لئے جائیں گے اور جو میرٹ پر پورا اترے گا اُسے فری تعلیم فری رہائش ملے گی۔ میرے سوال پر زمرد خان کہنے لگے کہ سر راشد ایک درویش آدمی ہیں جنہوں نے واقعتاً اپنی زندگی درس و تدریس کے لئے وقف کر دی اور اب تک ہزاروں یتیم اور غریب بچوں کو مفت معیاری تعلیم دی۔ نہ کوئی لالچ نہ تعلیم کو کاربار بنانے کا رجحان۔ 

میرا ایک کزن سر راشد کا کئی سال پہلے سٹوڈنٹ رہا۔ وہ بتایا ہے کہ سر راشد کے پاس تو گاڑی تک نہیں۔ وہ ٹیکسی میں اسکول آتے ہیں اور ٹیکسی میں ہی رات گئے اسکول سے واپس جاتے ہیں۔ پرائیوٹ اسکول تو بزنس اور پیسہ کمانے کا بہت زبردست ذریعہ ہیں لیکن سر راشد بقول زمرد خان ایک مختلف قسم کے آدمی ہیں، اُن جیسے لوگوں کی معاشرہ میں بہت کمی ہے۔ میرا کزن بتاتا ہے کہ سر راشد کے اسکولوں میں تربیت اور کردار سازی پر بھی بہت زور دیا جاتا ہے اور یہ ممکن نہیں کہ اسکول کے احاطہ میں کوئی بچہ سگرٹ تک پی لے۔ افسوس کہ ہمارا میڈیا فلموں ڈراموں اور شو بز کے افراد کو ہیروز بنا کر پیش کرتا ہے اور ہماری حکومتیں بھی اُنہی کو سول ایوارڈ کے لئے نامزد کرتی ہیں جبکہ سر راشد جیسے اصل ہیروز پر نہ میڈیا کی نظر پڑتی ہے نہ ہی حکوتیں ایسے ہیروز کی قدر کرتی ہے۔ ویسے سول ایوارڈز جس جس قسم کے جعلی لوگوں کو مختلف حکومتوں نے دیے اُنہیں دیکھ کر مجھے نہیں لگتا ہے کہ سر راشد جیسا شخص کوئی ایوارڈ لینے میں دلچسپی لے گا۔ ایسے ہیروز معاشرہ کے لئے قابل تقلید ہیں، اُنہیں اور اُن کے عظیم کام کو سراہنا چاہئے۔

انصار عباسی

سال 2020 کی طرح 2021 بھی ابھی تک کورونا کا شکار ہی رہا ہے۔ ساری دنیا پریشان ہے اور پاکستان کی بات کی جائے تو حالات اِن دنوں بہت زیادہ تشویش ناک ہیں۔ کورونا کے باعث لوگوں کے کاروبار متاثر ہوئے، لاکھوں کی نوکریاں چلیں گئیں، آمدنیاں کم ہو گئیں۔ جب ملکی معیشت کا بُرا حال ہوا تو اُس سے عام لوگ بھی متاثر ہوئے، اُن کو پیسے کی کمی کا سامنا کرنا پڑا جس کا اثر فلاحی اداروں بشمول اسکولوں، اسپتالوں اور یتیم خانوں کے ساتھ ساتھ مساجد و مدارس کی امداد پر بھی پڑا۔ اِن حالات کے باوجود بہت سے فلاحی ادارے جس فعال انداز میں کام کر رہے ہیں، اُنہیں دیکھ کر بہت خوشی ہوتی ہے۔ جماعت اسلامی اور اُس کا فلاحی ادارہ الخدمت فاؤنڈیشن، اخوت فاؤنڈیشن، شوکت خانم، ایدھی، سیلانی، سویٹ ہوم اور دوسرے کئی ادارے اِن حالات کے باوجود بہت زبردست کام کر رہے ہیں۔

اِن بڑے فلاحی اداروں کی فنڈنگ پر بھی کورونا کی وجہ سے ضرور منفی اثرات پڑے ہوں گے لیکن چھوٹے اور عام یتیم خانوں، مدرسوں، فلاحی طبی مراکز اور انسانیت کی خدمت کے لئے بنائے گئے دوسرے اداروں کو زیادہ مشکلات کا سامنا کرنا پڑ رہا ہے۔ اِن حالات میں صاحبِ استطاعت افراد پر ہمارا دین یہ ذمہ داری عائد کرتا ہے کہ وہ غربا، مساکین اور بےآسرا لوگوں کی مدد کے لئے زکوٰۃ و صدقات دیں، ایسا کرنے والوں کے لئے نہ صرف آخرت میں بڑے اجر کا وعدہ ہے بلکہ دنیا میں بھی اُن کے مال میں برکت ہوتی ہے اور یہ عمل زندگی میں آنے والے مصائب اور تکالیف سے تحفظ کا بھی ذریعہ بنتا ہے، جس کی ہم سب کو اس وقت اشد ضرورت ہے۔ سب سے پہلے اپنے قریبی رشتہ داروں، جاننے والوں، ساتھ کام کرنے والوں اور ملازموں وغیرہ میں موجود مستحق افراد آپ کی مدد کے حقدار ہیں، غربا و مساکین کو کھانا کھلائیں، مریضوں کا علاج اور یتیموں کے سر پر ہاتھ رکھیں، اُن کی تعلیم و تربیت میں حصہ ڈالیں، پانی کی فراہمی، مسجد و مدرسہ کی تعمیر جیسے دوسرے بہت سے صدقۂ جاریہ کے کاموں میں اپنا حصہ ڈالیں۔ 

رمضان المبارک کے پاک و بابرکت مہینے میں صدقہ، زکوٰۃ اور خیرات دینے کا اجر بہت زیادہ ہے، اس لئے عموماً لوگ اسی مہینے میں اپنی زکوٰۃ، صدقہ اور خیرات نکالتے ہیں۔ جہاں یہ ضروری ہے کہ ہم الخدمت فاؤنڈیشن، اخوت فاؤنڈیشن، ایدھی، سیلانی، شوکت خانم، سویٹ ہوم وغیرہ جیسے بڑے فلاحی اداروں کے ساتھ تعاون کریں وہاں یہ بھی لازم ہے کہ ملک بھر میں پھیلے اپنے آس پاس انسانیت کی فلاح کے چھوٹے پروجیکٹس کا بھی خیال رکھیں جن کا تعارف عام نہیں ہوتا۔ منو بھائی مرحوم کے حوالے سے جانی جانے والی سندس فاؤنڈیشن جو تھیلے سیما اور ہیموفیلیا کے مرض میں مبتلا بچوں کا فری علاج کرتی ہے، ایک جانا پہچانا فلاحی ادارہ ہے لیکن گزشتہ سال اسی فاؤنڈیشن سے منسلک ہمارے ایک صحافی دوست کا کہنا تھا کہ اس ادارہ کو بھی اپنا کام جاری رکھنے کے لئے امداد کی اشد ضرورت ہے۔ میری قارئین کرام سے گزارش ہے کہ جن کو اللہ نے توفیق دی ہے، وہ سندس فائونڈیشن کی کھل کر امداد کریں۔

پچھلے دو تین سال سے میں اپنے کالم کے ذریعے ڈاکٹر خلیل الرحمٰن جو خود نیفرالوجسٹ ہیں اور کافی عرصہ سعودی عرب میں رہنے کے بعد اب اسلام آباد میں رہائش پذیر ہیں، کی تنظیم کے لئے بھی امداد کی درخواست کر رہا ہوں۔ ڈاکٹر صاحب اور اُن کے ساتھیوں نے جدہ میں 2005 کے زلزلہ کے بعد پاکستانی کمیونٹی کی مدد کے لئے وہاں ایک پاکستان ویلفیئر سوسائٹی قائم کی تھی۔ ڈاکٹر صاحب کے آئیڈیا پر اس سوسائٹی نے ایبٹ آباد حویلیاں میں ایک کڈنی سنٹر بنانے کا فیصلہ کیا تاکہ غریب شہریوں کو مفت ڈائلیسز کی سہولت فراہم کی جا سکے۔ 2012 میں اس پروجیکٹ پر کام شروع ہوا اور 2015 میں پاکستان کڈنی سنٹر ایبٹ آباد کی بلڈنگ مکمل ہوئی جہاں اس وقت پندرہ ڈائلیسز مشینوں کیساتھ ساتھ، لیبارٹری اور فارمیسی بھی قائم ہے۔ ڈاکٹر صاحب کے مطابق یہاں تقریباً 70 فیصد مریضوں کا مفت ڈائلیسز کیا جاتا ہے۔ اس سنٹر نے موبائل یونٹ کا بھی آغاز کیا ہے جو دیہی علاقوں میں جاکر لوگوں کی اسکریننگ کر کے کڈنی کے مرض کی تشخیص اور اسٹیج کا تعین کرنے کیساتھ ساتھ متعلقہ بیماریوں کا بھی پتا لگاتا ہے۔ 

اِس کڈنی سنٹر کی توسیع کر کے اب 50 بستروں کا ایک اسپتال بھی بنایا جا رہا ہے۔ ڈاکٹر صاحب ہر سال سعودی عرب فنڈ ریزنگ کے لئے جاتے تھے لیکن کورونا کی وجہ سے نہ اِس سال وہ سعودی عرب جا سکے اور نہ ہی گزشتہ سال گئے جس کی وجہ سے اُن کے ادارہ کو شدید مالی مشکلات کا سامنا رہا۔ ایسے افراد جو ڈاکٹر صاحب کے ادارے کی مدد کرنا چاہیں، وہ ان سے موبائل نمبر 03005598569 پر رابطہ کر سکتے ہیں۔ اپنا اطمینان کر لیں اور مطمئن ہونے پر اگر مدد کرنا چاہیں تو پاکستان ویلفیئر سوسائٹی ٹرسٹ جس کے زیر نگرانی یہ کڈنی سنٹر چلایا جا رہا ہے، کا اکائونٹ نمبر 0010019963110010 ہے۔ Swift code: ABPAKKISL, Allied Bank of Pakistan, G-10 Markaz Branch (0750) Islamabad.

 اسی طرح اسلام آباد کے علاقے گولڑہ میں یتیم بچیوں کے لئے قائم ’’ہمارا گھر‘‘ بھی مخیر حضرات کی امداد کا منتظر ہے۔ بےسہارا اور یتیم بچیوں کی دیکھ بھال کے لئے قائم ’’ہمارا گھر‘‘ کے منتظم طارق ستی اور اُن کی اہلیہ نے 2005 کے زلزلہ کے بعد بچ جانے والی تین یتیم بچیوں کو اپنے گھر میں رکھنے کا فیصلہ کیا۔ بعد میں ایسی اور بھی یتیم اور بےسہارا بچیاں اُن کے پاس آ گئیں کیونکہ اُن کا خیال رکھنے والا کوئی نہ تھا۔ جب بچیاں زیادہ ہونے لگیں تو علاقہ میں ایک گھر کرائے پر لے کر ’’اپنا گھر‘‘ بنا دیا گیا اور اب طارق صاحب اور اُن کی اہلیہ ماشاء اللہ اسّی یتیم بچیوں کی دیکھ بھال کر رہے ہیں۔ امداد دینے یا اپنی تسلی کے لئے طارق ستی صاحب سے اُن کے موبائل نمبر 03217928888 پر رابطہ کر لیں۔ ہمارا گھر ویلفیئر ٹرسٹ کا اکائونٹ نمبر درج ذیل ہے۔ #0010078692110019, Branch code 1055, IBAN# PK15ABPA0010078692110019, Allied Bank Ltd D-12 Markaz, Islamabad. 

انصار عباسی

دنیا میں جہاں بھی اردو پڑھی جاتی ہے وہاں لوگ مختار مسعود کو جانتے ہیں‘ مختار مسعود بیورو کریٹ تھے‘ ملک کے اعلیٰ ترین عہدوں پر رہے۔ لاہور کا مینار پاکستان ان کی نگرانی میں بنا‘ یہ اس وقت لاہور کے ڈپٹی کمشنر تھے‘ چار کتابیں لکھیں اور کمال کر دیا‘ یہ کتابیں صرف کتابیں نہیں ہیں‘ یہ تاریخ‘ جغرافیہ اور پاکستان کے عروج وزوال کی کہی ان کہی داستان ہیں‘ مختار مسعود 91 سال کی بھرپور زندگی کے بعد 2017 میں انتقال فرما گئے لیکن یہ دنیا سے رخصت ہونے سے پہلے ایک عجیب کام کر گئے‘ آپ نے 2002 میں اپنی عمر بھر کی جمع پونجی اکٹھی کی‘ یہ دس کروڑ روپے بنے۔ آپ نے یہ دس کروڑ روپے آزاد کشمیر کی ایک فائونڈیشن کے حوالے کیے اور اسے چوکی گائوں میں اسکول بنانے کا فریضہ سونپ دیا‘ فائونڈیشن نے اسکول کھڑا کر دیا‘ مختار مسعود کو اسکول کے افتتاح کی دعوت دی گئی‘ مختار صاحب نے تین شرائط کے ساتھ یہ دعوت قبول کر لی‘ ایک‘ افتتاح کی کوئی تقریب نہیں ہو گی‘ دو‘ یہ چھٹی کے دن چوکی آئیں گے اور تین‘ ان کے ڈونیشن کی کوئی تشہیر نہیں کی جائے گی‘ فائونڈیشن کے پاس شرائط ماننے کے علاوہ کوئی آپشن نہیں تھا یوں مختار صاحب 2003 کی ایک سہ پہر اتوار کے دن چوکی پہنچے‘ خالی کلاس روم میں گئے‘ چاق سے بلیک بورڈ پر بسم اللہ الرحمن الرحیم لکھا اور چپ چاپ واپس آ گئے۔

مختار مسعود کے اس اسکول میں آج ہزار طالب علم پڑھ رہے ہیں اور اس ایک ادارے نے پورے علاقے کا مقدر بدل کر رکھ دیا‘ میں نے جب یہ واقعہ سنا تو میں نے پوچھا ’’مختار مسعود نے لاہور چھوڑ کر چوکی میں اسکول کیوں بنایا تھا‘‘ وہ بولے‘ ہم نے بھی ان سے یہ پوچھا تھا‘ مختار صاحب نے جواب دیا تھا ’’میرے دادا کشمیر سے چوکی کے راستے پنجاب داخل ہوئے تھے‘ یہ رات وہاں رہے تھے‘ گائوں کے لوگوں نے مسافر کی حیثیت سے ان کی بہت خدمت کی تھی‘ دادا نے اپنی یادداشتوں میں چوکی کے لوگوں کی بہت تعریف کی‘ میں اسکول بنوا کر اس گائوں کے لوگوں کا وہ احسان اتارنا چاہتا ہوں‘‘۔ مختار مسعود کا یہ اسکول ریڈ فائونڈیشن نے بنایا تھا اور یہ اسے چلا بھی رہی ہے‘ یہ میرا ریڈ فائونڈیشن سے پہلا تعارف تھا‘ میں نے اس کے بعد فائونڈیشن کے بارے میں کھوج شروع کیا‘ پتا چلا یہ ادارہ آزاد کشمیر کے ایک عام سے شخص محمود احمد نے 1994 میں بنایا تھا‘ محمود صاحب چکار کے رہنے والے تھے‘ والد سرکاری ملازم تھے‘ یہ والد کے ٹرانسفر کے ساتھ ساتھ بڑے ہوئے‘ دس جماعتیں دس مختلف علاقوں اور دس مختلف اسکولوں میں پوری کیں‘ میٹرک کے بعد کراچی چلے گئے‘ یہ وہاں دن کو مزدوری کرتے تھے اور شام کو ایوننگ کلاسز لیتے تھے‘ پی آئی اے کی نوکری ان کی زندگی کی سب سے بڑی خواہش تھی‘ یہ گرتے پڑتے پی آئی اے میں بھرتی ہو گئے لیکن پھر انھیں اچانک محسوس ہوا یہ زندگی کوئی زندگی نہیں‘ آپ پیدا ہوئے‘ بڑے ہوئے‘ نوکری کی اور فوت ہو گئے‘ انسان کو زندگی میں کوئی بڑا کام کرنا چاہیے‘ یہ بڑے کام کے بارے میں سوچنے لگے تو ان کے ذہن میں غریبوں کے لیے اسکول کا آئیڈیا آگیا۔

محمود صاحب نے دوستوں کے ساتھ آئیڈیا شیئر کیا‘ 25 ہزار روپے اکٹھے کیے اور آزاد کشمیر کے دور افتادہ گائوں میں ایک کمرے اور ایک استاد کے ساتھ اسکول کھول لیا‘یہ چھوٹا سا اسکول آگے چل کر ریڈ فائونڈیشن بن گیا‘ مخیر حضرات شامل ہوتے چلے گئے اور فائونڈیشن ملک کا بڑا تعلیمی ادارہ بنتی چلی گئی‘ آج ریڈ فائونڈیشن کے 390 اسکول ہیں‘ ان میں ایک لاکھ 12 ہزار طالب علم پڑھ رہے ہیں‘ یہ لوگ 12 ہزار یتیم طالب علموں کو مفت تعلیم‘ یونیفارم اور کتابیں بھی دیتے ہیں‘ فائونڈیشن سردست آزاد کشمیر اور گلگت بلتستان تک محدود ہے لیکن یہ بہت جلد اپنا نیٹ ورک پورے ملک تک پھیلا دے گی۔ میں جوں جوں فائونڈیشن کے بارے میں پڑھتا گیا میں حیران ہوتا گیا لہٰذا میں نے ان کے اسکول دیکھنے کا فیصلہ کیا‘ میں پچھلے ہفتے میر پور اور بھمبر گیا اور ان کے چار اسکول وزٹ کیے‘ آپ یقین کریں میں اسکولوں کی کوالٹی‘ صفائی اور ڈسپلن دیکھ کر حیران رہ گیا‘ یہ تمام اسکول مختار مسعود صاحب کی طرح مخیر حضرات نے بنوائے تھے‘ بھمبر میں بھڑنگ نام کا ایک گائوں ہے‘ یہ آزاد کشمیر کا سب سے بڑا گائوں ہے‘ یہ دشمنیوں اور اشتہاریوں کی وجہ سے پورے علاقے میں بدنام ہے‘ اس بدنام گائوں میں برطانیہ میں مقیم چوہدری عبدالغفور کے خاندان نے ریڈ فائونڈیشن کے ذریعے اسٹیٹ آف دی آرٹ اسکول بنوا دیا‘ اسکول دیکھنے لائق ہے۔

گائوں ڈھیری وٹا میں کراچی کے حبیب خان نے اسکول بنایا اور کمال کر دیا‘ حبیب خان چارٹرڈ اکائونٹنٹ تھے‘ کراچی میں رہتے تھے ‘ یہ کبھی کشمیر نہیں آئے‘ کراچی میں بیٹھ کر اسکول بنوایا اور آج اسکول کی بچیاں ہر صبح حبیب خان اور ان کے خاندان کے لیے دعا کرتی ہیں‘ اسی طرح سکاسن میں عرفان اسلم اور اشتیاق فاروق کے خاندان نے اسکول بنوا دیے اور ان اسکولوں نے پورے گائوں کی حالت بدل دی‘ مجھے بھمبر میں ریڈ فائونڈیشن کا کالج دیکھنے کا موقع بھی ملا۔ میں ہرگز یہ دعویٰ نہیں کروں گا یہ کالج گورنمنٹ کالج یا ایف سی کالج سے اچھا ہے لیکن یہ ان دونوں سے کم بھی نہیں‘ کلاس رومز‘ لیبارٹریاں اور لائبریری ہر چیز صاف‘ ستھری اور خوب صورت تھی‘ مجھے یہ جان کر حیرت ہوئی وزیراعظم راجہ فاروق حیدر اور کشمیری وزراء کے بچے بھی ریڈ فائونڈیشن کے اسکولوں میں پڑھتے ہیں۔ ریڈ فائونڈیشن کے تین منتظم میرے ساتھ تھے‘ میں نے ان سے ان کا ماڈل پوچھا تو پتا چلا یہ لوگ کرائے کی عمارت میں اسکول شروع کر دیتے ہیں‘ بچے پڑھنے لگتے ہیں‘ اس دوران کوئی نہ کوئی ڈونر مل جاتا ہے اور یہ لوگ زمین خرید کر یا پھر ڈونیشن لے کر اسکول کی عمارت کھڑی کر دیتے ہیں اور یوں بچے نئی عمارت میں شفٹ ہو جاتے ہیں‘ ریڈ فائونڈیشن کی تمام عمارتیں ایک جیسی ہیں‘ اسکول کے لیے دو کنال جگہ اور ایک کروڑ 30 لاکھ روپے درکار ہوتے ہیں‘ یہ رقم ایک شخص بھی دے سکتا ہے اور خاندان اور دوست مل کر بھی اسکول بنوا سکتے ہیں‘ اسکولوں میں 12 ہزار یتیم بچے پڑھ رہے ہیں‘ ان کے لیے سالانہ 30 کروڑ روپے چاہیے ہوتے ہیں۔

فائونڈیشن ان 30 کروڑ روپوں کے لیے ہر سال چیریٹی فنکشن کرتی ہے اور مخیر حضرات سے مالی امداد کی درخواست کرتی ہے‘ میں نے ان سے عرض کیا‘ آپ اس رقم کے لیے اللہ کے نام پر شیئر کیوں نہیں لانچ کر دیتے‘ یہ حیرت سے میری طرف دیکھنے لگے‘ میں نے عرض کیا‘ لوگوں کے لیے پچاس ساٹھ ہزار یا لاکھ روپے دینا مشکل ہوتا ہے‘ آپ اگر تین ہزار روپے کا شیئر لانچ کر دیں اور ہم سب مل کر ایک لاکھ لوگ تلاش کر لیں تو 12 ہزار یتیم بچے پورے وقار کے ساتھ تعلیم حاصل کر سکتے ہیں‘ میری بات سے تمام لوگوں نے اتفاق کیا یوں میں نے فوراً پہلا شیئر خرید لیا‘ اب صرف 99 ہزار نو سو 99 لوگ باقی ہیں‘ مجھے یقین ہے یہ لوگ ملتے دیر نہیں لگے گی۔ ہمیں 22 کروڑ لوگوں کے ملک میں صرف ایک لاکھ ایسے لوگ چاہییں جو ہر سال صرف تین ہزار روپے دے دیں‘ یہ تین ہزار روپے 12 ہزار یتیم بچوں کو اپنے قدموں پر کھڑا کر دیںگے‘ مجھے اللہ کی ذات پر پورا بھروسہ ہے‘ اللہ تعالیٰ یقینا ایسے لوگوں کا بندوبست کر دے گا‘ کیوں؟ کیوں کہ میں جس وقت یہ سطریں لکھ رہا ہوں اس وقت ربیع الاول کا مہینہ شروع ہو چکا ہے اور اس مہینے میں ہمارے رسولؐ دنیا میں تشریف لائے تھے‘ آپؐ پیدائش سے پہلے یتیم ہو چکے تھے‘ والد کا انتقال آپؐ کی پیدائش سے چھ ماہ قبل ہو گیا اور آپؐ ابھی چھ برس کے تھے کہ آپؐ والدہ کے سائے سے بھی محروم ہو گئے۔

آپؐ کی کفالت شروع میں دادا حضرت عبدالمطلب نے فرمائی اور ان کے انتقال کے بعد آپؐ کی ذمے داری آپؐ کے چچا حضرت ابوطالب نے اٹھا لی‘ آپؐ یتیمی اور غربت کی وجہ سے تعلیم حاصل نہ کر سکے‘ امی رہ گئے لیکن آپؐ جب جوان ہوئے تو آپؐ جہالت اور ظلم کے شکار اس معاشرے کے صادق بھی تھے اور امین بھی‘ اللہ تعالیٰ نے چالیس سال کی عمر میں آپؐ پر وحی کا نزول شروع فرمایا اور یوں آپؐ پوری دنیا کے لیے ایمان‘ علم اور ترقی کا نقطہ آغاز بن گئے۔ ہمارے رسولؐ بھی یتیم تھے اور ریڈ فائونڈیشن کے بارہ ہزار طالب علم بھی یتیم ہیں چنانچہ میری آپ سے درخواست ہے آپ رسول اللہ ﷺ کے نام پر 12 ہزار یتیم بچوں کا آسرا بن جائیں‘ آپ ریڈ فائونڈیشن کی مدد کریں اور آپ اگر یہ نہیں کر سکتے تو بھی آپ سال میں صرف تین ہزار روپے ادا کر کے ایک لاکھ معاونین کے قافلے میں ضرور شامل ہو سکتے ہیں‘ میں آپ کو یقین دلاتا ہوں آپ نبی رسالتؐ کی محبت اور توجہ کے مستحق بن جائیں گے۔

نوٹ: آپ ان نمبروں 0314-5025767, 051-111 323 424 پر ریڈ فائونڈیشن سے رابطہ کر سکتے ہیں‘ ای میل ایڈریس [email protected] ہے۔ آپ اپنے عطیات وصدقات درج ذیل اکائونٹ میں بھی جمع کرا سکتے ہیں۔ فیصل بینک لمیٹڈ‘ اکائونٹ ٹائٹل‘ ریڈ فائونڈیشن اکائونٹ نمبر: 3048308900031361 آئی بین: PK21FAYS3048308900031 سوئفٹ کوڈ: FAYSPKKA بینک ایڈریس:گرینڈور آرکیڈ‘ کری روڈ‘ چک شہزاد‘ اسلام آباد

جاوید چوہدری  

ہمارے لئے میڈیا چینلز ہیروز تراشتے ہیں۔ میڈیا کا زیادہ زور تو ناچ گانے والوں کو ہی ہمارے لئے ہیرو بنا کر پیش کرنا ہے لیکن بعض اوقات ایسے افراد اور اداروں سے بھی عوام کو روشناس کروایا جاتا ہے جو خلقِ خدا کی خدمت کا کام کرتے ہیں، جو بہت اچھی بات ہے۔ ایک بڑی تعداد ایسے ہیروز کی ہے جن کا نام آپ میڈیا پر زیادہ نہیں سنتے لیکن اُن کا کام بولتا ہے۔ محمود احمد صاحب بھی ایک ایسے ہی ہیرو ہیں جنہوں نے وہ کچھ کر دکھایا جس کا ہم جیسے لوگ سوچ بھی نہیں سکتے، ان کے کام کی سب سے بڑی خوبصورتی یہ ہے کہ اُن کا کام اُن کی اپنی آخرت کو سنوارنے کے لئے بڑا اہم ہے تو وہ جنت کو تلاش کرنے والوں کو بھی پورا پورا موقع دیتے ہیں کہ اس نیک کام میں اپنا حصہ ڈالیں۔ تعلیم کے میدان میں سرگرم READ فاونڈیشن پاکستان کو میں محمود صاحب ہی کی وجہ سے جانتا ہوں جنہوں نے اس ادارے کی اپنے پانچ ساتھیوں کے ساتھ 1994 میں بنیاد رکھی۔ 

اگرچہ محمود صاحب کی زیادہ توجہ اب کردار سازی کے لئے بنائے گئے اپنے ایک اور ادارے کی جانب مرکوز ہے لیکن اُن کے لگائے گئے پودے ریڈز فائونڈیشن کے 390 تعلیمی اداروں میں اس وقت ایک لاکھ بارہ ہزار بچے تعلیم حاصل کر رہے ہیں۔ فائونڈیشن کے کام کی خاص بات ان کا یتیم بچوں کی کفالت کا پروگرام ہے۔ فاؤنڈیشن کے جنرل منیجر محمد شفیق خان کی طرف سے دی گئی معلومات کے مطابق نرسری سے ایف ایس سی تک ان بچوں کو 6000 اساتذہ کرام تعلیم دے رہے ہیں۔ گزشتہ برسوں میں ایک لاکھ سے زیادہ بچے تعلیم حاصل کر چکے ہیں اور آج ملک و قوم کی ترقی میں اپنا کردار ادا کر رہے ہیں۔ ہر سال بورڈ کے امتحانات میں پہلی 20 پوزیشنز پر فاؤنڈیشن کے طلبا و طالبات، براجمان ہوتے ہیں جبکہ 50 فیصد سے زیادہ طلبا و طالبات پوزیشز حاصل کرتے ہیں۔ فاؤنڈیشن ضرورت کے تحت کمیونٹی کی خواہش پر کشمیر اور شمالی پاکستان میں تعلیمی ادارے بناتی ہے۔ 

تعلیمی ادارے کے لئے مخیر حضرات کو تلاش کرتی ہے اور ان اداروں کی مکمل مانیٹرنگ اور اساتذہ کی ٹریننگ کے ذریعے تعلیم و تربیت کے کام کو آگے بڑھاتی ہے۔ فاؤنڈیشن اپنے 390 تعلیمی اداروں میں سے 150 اداروں کی اپنی عمارتیں تعمیر کر چکی ہے۔ اس وقت فاؤنڈیشن کے تعلیمی اداروں میں 12 ہزار سے زیادہ یتیم بچے مفت تعلیم حاصل کر رہے ہیں۔ سالانہ 36 کروڑ روپے کفالت ایتام پراجیکٹ پر خرچ کیے جاتے ہیں۔ ہر سال 1200 سے 1500 نئے یتیم بچے تعلیمی اداروں میں داخل ہوتے ہیں۔ اس سال میٹرک کے امتحان میں پہلی 20 پوزیشنز پر 36 یتیم طلبہ و طالبات بھی شامل تھے۔ فاؤنڈیشن نہ ہوتی توشاید یہ بچے زندگی کی دوڑ میں پیچھے رہ جاتے اور کسی منفی سرگرمی یا منفی گروہ کا حصہ بن کر معاشرے میں فساد کا ذریعہ بنتے۔ فائونڈیشن ایک یتیم بچے کی کفالت 30 ہزار روپے سالانہ سے کرتی ہے اپنی آخرت سنوارنے اور جنت کے طلب گار 30 ہزار روپے سالانہ ادا کر کے ایک بچے کے کفیل بن سکتے ہیں۔ 

فاؤنڈیشن آپ کے زیر کفالت بچے کی مکمل تفصیلات اور آپ کی ڈونیشن کی رسید آپ کو ارسال کرے گی۔ اور سال گزرنے پر آپ کو بچے کا رزلٹ مع تازہ تصویر ارسال کرے گی۔ فائونڈیشن کو اس وقت 5500 یتیم بچوں کی کفالت کے لئے اہل خیر کے تعاون کی ضرورت ہے۔ میں خود بھی فائونڈیشن کے کفالت پروگرام کا حصہ بن رہا ہوں اور میری آپ سے بھی اپیل ہے کہ آپ بھی اس کار خیر میں اپنا حصہ ڈالیں اور ایک یا ایک سے زیادہ یتیم بچوں کے کفیل بنیں۔ صرف 30 ہزار روپے سالانہ سے کسی ایک بچے یا بچی کی تعلیمی کفالت کی جاسکتی ہے ۔ آپ یہ رقم ماہانہ اقساط میں بھی دے سکتے ہیں ۔ یہ یتیم بچے آپ کی معاونت سے تعلیم حاصل کریں گے اور معاشرے میں باوقار مقام حاصل کریں گے۔ آپ کا یہ عطیہ صدقہ جاریہ کا ذریعہ بنے گا۔ یتیم بچوں کی کفالت کرنے والے کے لئے اسلام میں بڑا اجر اور انعام ہے۔ ڈونر اپنی رقم کا چیک بنام READ فاؤنڈیشن بنا کر فاؤنڈیشن کے ایڈریس پر اپنے نام فون نمبر اور پتہ کے ساتھ بھیج دے یا فائونڈیشن کے اکاؤنٹ میںجمع کروا کر نیچے دیے گے واٹس ایپ نمبر پر اپنی معلومات بھیج دیں۔ فائونڈیشن کا نمائندہ آپ سے رابطہ کر کے آپ کو بچے کی تفصیل اور رسید ارسال کر دے گا۔ فائونڈیشن کے ہیڈ آفس کا ایڈریس اور دیگر تفصیل ذیل میں دی گئی ہے۔

فیصل بینک اکائونٹ ٹائٹل:READ FOUNDATION اکائونٹ نمبر:3048308900031361 انٹرنیشنل بینک اکائونٹ نمبر ـ:PK21FAYS3048308900031361 سوفٹ کوڈ:FAYSPKKA بینک برانچ : گرائونڈ فلور ، گرینڈ جور پلازہ ، مین کری روڈ ، اسلام آباد موبائل نمبرز + 92 (0) 309 8880 811 واٹس ایپ نمبر +92 (0) 334 9272 523 ای میل ایڈریس [email protected] ویب سائٹ www.readfoundation.org ہیڈ آفس: تھرڈ فلور الفاروق پلازہ بحریہ انکلیو روڈ چک شہزاد اسلام آباد

انصار عباسی 

ڈاکٹر طاہر شمسی نے 1996 میں ملک میں بون میرو ٹرانسپلانٹ متعارف کروایا، انہوں نے بون میرو ٹرانسپلانٹ کے 650 آپریشن کیے اور 100 سے زیادہ تحقیقی مضامین لکھے۔ کورونا وائرس کی پہلی لہر کے دوران ڈاکٹر طاہر شمسی کو وائرس سے صحت یاب ہونے والوں کے پلازما کے ذریعے کووِڈ 19 کے مریضوں کے علاج کا خیال بھی انہیں ہی آیا۔ امریکا میں ڈاکٹروں کی ایک غیر سرکاری تنظیم ’ڈاؤ گریڈیٹس ایسوسی ایشن آف نارتھ امریکا‘ نے ڈاکٹر طاہر شمسی کو ان کی خدمات کے اعتراف میں 2016 میں لائف ٹائم اچیومنٹ ایوارڈ دیا۔ ڈاکٹر طاہر شمسی نے 2011 میں خون سے متعلق بیماریوں کے علاج کے لیے نیشنل انسٹی ٹیوٹ فار بلڈ ڈیزیز قائم کیا۔ ڈاکٹر طاہر شمسی این آئی بی ڈی میں اسٹیم سیل پروگرام کے ڈائریکٹر بھی تھے اور وہ رائل کالج کے پیتھالوجسٹ فیلو بھی تھے۔

معروف سماجی شخصیت، نعت خواں اور سابقہ گلوکار جنید جمشید کو ہم سے بچھڑے ہوئے سال بیت گئے لیکن سوشل میڈیا دیکھ کر اندازہ ہوتا ہے کے وہ اپنے پرستاروں بلکہ تمام پاکستانیوں کے دل میں اب تک زندہ ہیں۔ جنید جمشید 7 دسمبر 2016 میں ایک طیارے کے حادثے میں اس جہاں سے کوچ کر گئے تھے۔ ان کی اہلیہ بھی اس حادثے میں ہلاک ہو گئی تھیں۔ اس واقعہ نے پاکستانی عوام کو افسردہ کر دیا تھا اور اس کا اندازہ بخوبی اس بات سے ہوتا ہے کہ آج بھی لوگ جنید جمشید کو انہماک سے یاد کر رہے ہیں۔

جنید ستمبر 1964 میں پیدا ہوئے اور آپ نے لاہور کی ایک جامعہ سے انجینیئرنگ کی تعلیم حاصل کی لیکن کچھ عرصہ فضائیہ میں برسر روزگار رہنے کے بعد آپ نے موسیقی کو اپنا لیا۔ 1994 میں آپکی پہلی گانوں کی البم منظرِ عام پر آئی۔ البتہ، 2004 میں آپ نے موسیقی کو خیر آباد کہہ کر مذہبی تعلیمات اور تبلیغ کا راستہ اختیار کر لیا۔ انکو یاد کرتے ہوئے محمد اویس نامی ٹوئٹر کے صارف نے لکھا ہے کہ ’تین سال تو گزر گئے لیکن جنید اب تک دلوں میں زندہ و جاوید ہیں۔‘

 دنیا کے اے مسافر !منزل تیری قبر ہے طےکر رہا ہے جو تو، دو دن کا یہ سفر ہے  

قدرت اللہ شہاب کی ایک تحریر سے ایک جملہ مستعار لینے کی جرات وجسارت کرتے ہوئے میں بھی یہ کہنا چاہتا ہوں کہ جب مجھے جنید جمشید مرحوم سے محبت اور عقیدت ہوئی تو اسے دنیا سے گئے ہوئے کئی دن گزر چکے تھے۔ کہتے ہیں کہ اللہ تعالی نے دنیا اور آخرت کے تقابل میں تمام انسانوں کو چار ترتیبوں پر پیدا کیا ہے اول درجے کے لوگ وہ ہیں جن کی دنیا تو اضطرارات نہیں اختیارات مسکینوں جیسی لیکن آخرت شہنشاہوں جیسی ہوتی ہے۔ دوسرے درجے کے لوگ وہ ہیں جن کی دنیا بھی بادشاہوں جیسی اور آخرت بھی بادشاہوں جیسی ہوتی ہے، تیسرے درجے کے لوگ وہ ہیں جن کی دنیا بادشاہوں جیسی لیکن آخرت فقیروں اور تباہ حالوں جیسی ہوتی ہے اور چوتھے درجے کے لوگ وہ ہیں جن کی دنیا بھی فقیروں مسکینوں جیسی ہوتی ہے اور آخرت بھی برباد اور تباہ حالوں جیسی ہوتی ہے۔ ہم جنید جمشید کو بلا ججھک دوسرے درجے کے کامیاب تر لوگوں میں شمار کر سکتے ہیں۔

کیا آدمی تھا وہ ! سن اسی کی دہائی میں وائٹل سائنز نامی ایک بینڈ کے تحت لیڈ سنگرکی حیثیت سے شعیب منصور جیسے تخلیقی جینئس کے زیر ہدایت ہمارے ممدوح نے ایک ایسا نغمہ دل دل پاکستان گایا جسے اب پاکستان کا دوسرا قومی ترانہ کہا جائے تو بے جا نہ ہو گا۔ بی بی سی کے ایک سروے کے مطابق اسے پچھلے سو سال میں ساری دنیا میں سب سے زیادہ سنے جانے والے نغموں میں تیسرا نمبر دیا گیا۔ وائٹل سائنز کے عروج کے سال اور پاکستان میں پوپ سنگنگ کے عروج کا وائٹل سائنز سے آغاز، گروپ ٹوٹنے پر سولو پرفارمنسز اور اس میں بھی وہی عروج حاصل۔ خود بیان کرتے ہیں کہ ایک دفعہ سن بانوے میں انگلینڈ کے ویمبلے اسٹیڈیم میں ایشیائی فنکاروں کے ایک کنسرٹ میں درمیان میں سب سے بڑے اسٹارکا خیمہ لگایا گیا جوکہ اس کنسرٹ کی روایات میں شامل ہے کہ مرکزی اور سب سے بڑے اسٹارکا خیمہ درمیان میں لگایا جاتا تھا تو اس سال مرکزی خیمہ امیتابھ بچن کو دیا گیا تھا۔ 

جب بطور پاکستانی شریک فنکار جنید بھائی امیتابھ بچن سے ملے تو واپسی پر یہ سوچ رہے تھے کہ کیا کبھی ایسا ہو گا کہ میرا نام بھی مرکزی خیمے کی نیم پلیٹ پر درج ہو اور خدا کی شان کہ آٹھ برس بعد اسی ویمبلے کے اسی سالانہ ایشیائی فنکاروں کے کنسرٹ میں جنید جمشید کے نام کا مرکزی خیمہ لگا ہوا تھا۔ جیند جمشید خود بیان کرتے ہیں کہ وہ بطور سنگر میرے پروفیشنل کیریئر کے انتہائی عروج کا زمانہ تھا اور جب یہ ویمبلے والا واقعہ پیش آیا اور میری خواہش پوری ہوئی تو میں نے خود سے سوال کیا کہ جنید ، اب تو تم خوش ہو؟ توکہتے ہیں کہ میں نے جب اپنے اندرجھانکا تو ہر دنیاوی نعمت، عزت ، دولت، شہرت ، نام و مقام کے باوجود میں اندر سے بے چین تھا۔ اندرکی اسی بے سکونی کو دورکرنے کے لیے وہ مذہب کی جانب متوجہ ہوئے اور پھر ایک بالکل نئی شخصیت میں ڈھلتے چلے گئے۔ علماء، بزرگان دین ، مبلغین کی صحبتیں اختیار کیں اور تبلیغی جماعت کے رگڑے لگنے شروع ہوئے۔ کبھی یہ مسجد کبھی وہ مسجد ،کبھی ایک تبلیغی سفرکبھی دوسرا سفر، کبھی اس شہرکبھی اس شہر، بقول شاعر:

کبھی عرش پر کبھی فرش پر، کبھی ان کے در کبھی دربدر غم عاشقی تیرا شکریہ میں کہاں کہاں سے گزر گیا

کوئی آدمی اور وہ بھی دنیاوی اعتبار سے ایک بڑا آدمی اور پھر ایک ایسے شعبے سے وابستہ جسے محتاط ترین الفاظ میں ہم دینی مزاج کے بالکل برعکس شعبہ کہیں تو غلط نہیں ہو گا ، جب اپنی شہرت اور دنیاوی مقام کو ترک کر کے دین کی طرف آتا ہے تو یہ سنت الہی ہے کہ اس پر آزمائش آیا ہی کرتی ہے، تو بالکل ایسا ہی جنید جمشید کے ساتھ ہوا۔ خود بتاتے تھے اور یہ سب باتیں ان کے بے شمار ویڈیو بیانات اور انٹرویوز میں موجود ہیں کہ جب انھوں نے اپنی شہرت کے بام عروج پر اور اس حالت میں میوزک کی دنیا کو چھوڑا کہ جب ان کی قدروقیمت آمدنی کے اعتبار سے لاکھوں کروڑوں روپوں میں پہنچ چکی تھی اور وہ اپنے شعبے کے بے تاج بادشاہ بن گئے تھے توکہتے ہیں کہ ’’ مجھے میوزک کے سوا تو کچھ آتا ہی نہیں تھا اور اسے میں نے اللہ کے دین کے لیے ترک کر دیا تو ایک وقت ایسا بھی آیا کہ گھر اور گاڑیاں بک گئیں ، بینک بیلنس ختم ہو گیا، گھر کی بجلی بل نہ دینے کے سبب کٹ گئی اور یہاں تک کہ روزمرہ کے اخراجات کے پیسے بھی ختم ہو گئے ، کیونکہ ان کا نام اور مقام اور سحر انگیز آواز ان کے ساتھ تھے۔

اس لیے میوزک ورلڈ سے ایک سے بڑھ کر ایک پر کشش پیشکش ابھی بھی ان کے قدموں میں پڑی تھی اور پھر سب سے بڑا امتحان اس اعتبار سے تب آیا جب ان کے ایک طرح سے استاد ، ابتدائی رہنما اورگاڈ فادر شعیب منصور نے ایک فلم ’’خدا کے لیے‘‘ جنید جنشید کو ذہن میں رکھ کر لکھی اور ان سے اس فلم میں کام کرنے کے لیے ضد کی حد تک اصرار کیا جب کہ جنید بھائی یہ مصنوعی رنگوں اور روشنیوں کی دنیا کو چھوڑ چکے تھے۔ اس لیے وہ نہ مانے اور اپنی توبہ پر جمے رہے یہاں تک کہ شعیب منصور ان سے ناراض بھی ہو گئے۔ جنید جمشید کو اللہ پاک کے وعدوں پر یقین تھا اور پھر ان کے اس جمے رہنے اور استقامت دکھانے پر مالی بد حالی کے اس مختصر ترین امتحانی دور کا اختتام ہوا اور وہ جو محاوروں کہتے ہیں نا کہ اللہ نے کسی کا ہاتھ پکڑ لیا یا چھپر پھاڑکر دے دیا تو بالکل یہی معاملہ جنید جمشید کے ساتھ ہوا اور اللہ پاک نے انھیں اس سے بہت زیادہ دے دیا جتنا وہ اپنے موسیقی کے دور میں کمایا کرتے تھے۔

ان کی وہ سحر انگیز آواز جوکبھی گل وبلبل کے نغمے گایا کرتی تھی ، اب تلاوت اور حمد ونعت جیسے عالی مرتبت کاموں کے لیے مخصوص ہو گئی اور وہ سنگر جنید جمشید کی جگہ نعت خواں جنید جمشید کہلانے لگے۔ خود بیان کرتے ہیں کہ ایک دفعہ ایک انٹرویو میں ان سے پوچھا گیا کہ آپ کی زندگی کا سب سے یادگار لمحہ کونسا تھا تو انھوں نے کہا کہ جب ہم نے دل دل پاکستان گایا تھا تو میں ایک جگہ کھڑا تھا اور دو لڑکے آپس میں کہہ رہے تھے کہ یہ دیکھو یہ وہ ہے جس نے پاکستان پاکستان گایا ہے۔ میری آنکھوں میں آنسو آگئے کہ مجھ جیسے گمنام سے لڑکے کی پہچان پاکستان پاکستان ہو گئی اور پھر بعینہ یہی واقعہ آٹھ دس برس بعد دہرایا گیا۔ کہتے ہیں کہ میں مدینے شریف کی گلیوں میں کسی کام سے پھر رہا تھا اور میرے پیچھے دو نوجوان کہہ رہے تھے کہ ’’ارے یہ دیکھو یہ تو وہی ہے جس نے مدینہ مدینہ پڑھا ہے تو پاکستان پاکستان سے مدینہ مدینہ تک کے سفر کا سوچ کرمیں دھاڑیں مار مار کر رونے جیسا ہو گیا تھا۔

تو جنید ! ہنگامِ زندگی میں محض ایک دو دفعہ آپ کی ماہیت قلبی اورکایا پلٹ کے بعد سرسری طور پر مختلف اجتماعات اور مواقعے پر آپ کو دیکھنے کی حد تک ملاقات رہی اگر اسے ملاقات کہا جاسکے تو، چھ دسمبر دو ہزار سولہ کو اے ٹی آر کے حادثے میں دیگر مسافروں کے ساتھ آپ کی شہادت کی اطلاع جیسے ایک بجلی بن کر لاکھوں افراد کی طرح مجھ پر بھی گری لیکن جلد ہی غم دنیا میں پھنس کر اور دکھوں کی طرح یہ المیہ بھی وقتی طور پر فراموش ہو گیا لیکن پھر ایسا ہوا کہ آہستہ آہستہ آپ کی خصوصیات عوام و خواص سے میرے علم میں آنا شروع ہوئیں اور مجھے آپ سے عقیدت اور محبت کاتعلق پیدا ہوتا چلا گیا۔ دسمبرکا مہینہ آپ کی شہادت کا مہینہ ہے۔ اس میں کوئی شک نہیں کہ آپ ایک سچے پاکستانی اور بہترین مسلمان اور بہت اچھے انسان اور اپنے ہر دو ادوار میں دلوں کے فاتح تھے۔

خرم علی راؤ