حاسة الوقت مش بيعدّي، بل بيتشكل على هيئة طبقة تقيلة من القطران، تعلو رئتيّ.. وبتمنع الهوا من إنه يتّخذ مجراه الطبيعي.

المفروض إني ​مش متضايقة من حاجة.. خنقة بلا نسَب، بلا علّة واضحة يمكن غفرانها أو حتى لعنها، مجرد ثقل كأن جسمي كله قرر يعيد إكتشاف وزنه فجأة، فا يشعر بكل جرام من العظام واللحم كأنه عقوبة ممتدة، كأني حرفياً.. قاعدة على قلبي.

وإني حياتي مزيج سخيف من الموات والشغل

وإني تملّي غريب.. لأني بنتمي للملكة الليلية

عالم رايحة وجاية، وأنا مين وفين مكاني؟

وإيه آخر الحكاية وإيه اللي رماني

بعد إنتهائي وأخيراً من رواية "الغريب"، وبعد العقود الطويلة اللي قضاها النقّاد في تحليل العبثية في تلك الرواية، أقدر أقول إن كل التحليلات دي تتهدم تماماً أمام الحقيقة المجردة: "ميرسو" لم يقتل لدوافع إجرامية أو إنتقامية أو حتى عبثية، هو بس الشمس كانت ساطعة بشكل مجنون عن الطبيعي، والعرق نازل على وشه، وفوق ده كله، الراجل هو اللي إستفزه و طلّع السكينة، والشمس ضربت في نَصلها وعكست الضوء في عينه، فا فيوزات عقله ضربت.

الراجل ماقتلش بعقله ولا بمشاعره، هو قتل بحواسه اللي ساحت من الحرارة.. وفي درجة الحرارة دي أقدر أقول إن ده عذر قانوني منطقي جداً. والغريب بحق مش ميرسو بل المحكمة اللي إستغربت موقفه.