فضل يضحك على نفسه ومش عارف بيضحك ليه

سكّر إتعرفت على قط جميل ونغش ومرح ودلوع جداً وكانت مرعوبة منه أول ما جه البيت من حوالي أسبوع، فضلت يومين كدة لحد ما اتطمنت إنه لا يشكل أي تهديد وقربوا من بعض وكان الغرض الأول والأخير من زيارته المؤقتة دي هو التزاوج لا غير. ولكن الموضوع تطور عن كدة بالغلط.. إمبارح نزلناها العيادة وأنا كنت معاه في البيت وأول ما نزلت قعد يدور عليها في كل حتة وينونو بصوت عالي ومزعج، ولما رجعت من برة جري عليها وماضربوش بعض، ولما بينام في مكان بتروح تنام جنبه.. هي مش قادرة لسة تلزق فيه وهما قاعدين بسبب شوية خوف جوّاها، لكن مستحيل تنام في مكان غير اللي هو نايم فيه، ولما يروح يقعد في حتة وهي مش عارفة فين بتقعد تدور عليه لحد ماتلاقيه وتقعد جنبه -والعكس صحيح-، كنت فاكراها هتنفر منه بعد ما غرضهم يخلص ونمشيه نرجعه لصاحبه، بس المفاجأة انهم اتعلقوا ببعض وعلطول بيلعبوا وبيجروا ورا بعض أول مرة أشوف سكّر متونسة بالشكل ده، كان فيه قط قبله بس ماكانش بينهم أي كيميا وماقربوش من بعض خالص لأيام لحد ما مشيناه.

توم قرّب يمشي ويرجع لصاحبه وأنا خايفة على سكّر من الوحدة وكسرة القلب، والأمومة..