La lhéngua/léngua mirandesa

Publicaçon: Diairo de la República númaro 167/1999, Série I-B de 1999-07-20 Eimisson: Menistério de la Eiducaçon/Anducaçon Tipo de diploma: Çpacho normatibo Númaro: 35/99 Páiginas: 4487 – 4487 Eidenteficador Ouropeu de la Legislaçon: https://data.dre.pt/eli/despnorm/35/1999/07/20/p/dre/pt/html

Resume Facelita la daprendizaige de l mirandés als alunos de ls stablecimientos de ls ansinos básico i secundairo de l cunceilho de Miranda de l Douro

Testo Çpacho normatibo númaro 35/99

La lei númaro 7/99, de 29 de janeiro, recoince l dreito a perserbar i pormober la lhéngua mirandesa, anquanto patrimonho cultural, strumiento de quemunicaçon i de refuorço d’eidentidade de la tierra de Miranda.

Ne ls termos de ls artigos 3.º i 5.º de la miesma lei, cabe reglamentar l dreito a la daprendizaige de l mirandés, bien cumo l neçairo/ançairo apoio logístico, técnico i científico.

Assi, tremina-se:

1 – Als alunos de ls stablecimientos de ls ansinos básico i secundairo de l cunceilho de Miranda de l Douro ye facultada la daprendizaige de l mirandés, cumo bertente d’anriquecimiento de l curriclo/currículo.

2 – La biablizaçon de la oufierta referida ne l númaro passado cumpete als stablecimientos de ls ansinos básico i secundairo de l cunceilho de Miranda de l Douro, por bias de l zambolbimiento de porjetos cun l oujetibo de perserbar i pormober la lhéngua mirandesa.

2.1 – Ls porjetos dében cuntemplar fines i metodologies pedagógicas, bien cumo la eidenteficaçon de ls meios i de ls recursos ançairos, nomeadamente ne l ámbito de la formaçon/formacion de porsores.

2.2 – Ls porjetos son aporbados puls diretores de ls Departamientos de la Eiducaçon Básica i de l Ansino Secundairo, cunforme ls nibles de ansino an que reflíten, apuis parecer faborable de l diretor regional de Anducaçon de l Norte.

2.3 – Ls porjetos puóden zambolber-se an parcerie cun antidades de la quemunidade local, an special cun l munecípio i associaçones culturales, por bias de la celebraçon de protocolos de coperaçon.

3 – Ls cumpetentes serbícios centrales i regionales de l Menistério de la Anducaçon dan l apoio logístico, técnico i científico que se apersentar ouportuno al zambolbimiento de ls porjetos a que se refire l persente çpacho.

Publicaçon: Diairo de la República númaro 24/1999, Série I-A de 1999-01-29 Eimisson: Assemblé de la República Tipo de diploma: Lei Númaro: 7/99 Páiginas: 574 – 574 Eidenteficador Ouropeu de la Legislaçon: https://data.dre.pt/eli/lei/7/1999/01/29/p/dre/pt/html

Resume Recoincimiento oufecial de ls dreitos lhenguísticos de la quemunidade mirandesa

Testo Lei númaro 7/99

de 29 de janeiro

Recoincimiento oufecial de ls dreitos lhenguísticos de la quemunidade mirandesa

La Assemblé de la República decreta, ne ls termos de l’alínia c) de l artigo 161.º de la Custituiçon, para baler cumo lei giral de la República, l seguinte:

Artigo 1.º

L persente diploma quier balidar, recoincer i pormober la lhéngua mirandesa.

Artigo 2.º

L Stado Pertués recoince l dreito a cultibar i pormober la lhéngua mirandesa, anquanto patrimonho cultural, strumiento de quemunicaçon i de refuorço d’eidentidade de la tierra de Miranda.

Artigo 3.º

Ye recoincido l dreito de l nino a la daprendizaige de l mirandés, ne ls termos a reglamentar.

Artigo 4.º

Las anstituiçones públicas que quédan ne l cunceilho de Miranda de l Douro poderán eiditar ls sous decumientos acumpanhados dua berson an lhéngua mirandesa.

Artigo 5.º

Ye recoincido l dreito a apoio científico i eiducatibo, tenendo an bista la formaçon de porsores de lhéngua i cultura mirandesas, ne ls termos a reglamentar.

Artigo 6.º

L persente diploma será reglamentado ne l prázio de 90 dies a cuntar de la sue antrada an bigor.

Artigo 7.º

L persente diploma antra an bigor 30 dies apuis la data de la sue publicaçon.

Aprobada an 19 de nobembre de 1998.

L persidente de la Assemblé de la República, António de Almeida Santos.

Promulgada an 15 de janeiro de 1999.

Publique-se.

L persidente de la República, Jorge Sampaio.

Referendada an 19 de janeiro de 1999.