بستغرب نفسي وأنا بطمن الناس طول الوقت في الطوارئ في العناية في الحضانة مهما كانت حالة ابنهم بحاول أواسيهم وأطمنهم بس أنا مش متطمن وقلبي حزين فمين يطمني علشان أكمل ؟

ببعد عن الناس عن البيت عن كل حاجة برجع تاني أبقي في وسطهم بس مفيش فرق كبير بيحصل، طمني يارب من عندك واملأ قلبي سكينة أقدر أكمل بيها.. محتاج أنام دماغي مبتفصلش، جسمي هيموت من الإرهاق وأكل المستشفي زهدته عايز أرجع البيت.

ضاقت فلما استحكمت حلقاتها فرجت. ضاقت فلما استحكمت حلقاتها فرجت

ربما ليست الحياة بهذة السهولة التي يصورها لنا البعض. تريد الحب هاهي الفتاة الجميلة التي تصادفك مرة لتلتقي عيناكما وتلمع بريقًا يأثر قلبك وتعيش قصة الحب التي طالما راودتك. تريد الزواج هاهو بيتك الذي يطل علي حديقة واسعة والشمس تحتضنه من كل النواحي. تريد العمل هاهي شركتك التي تديرها بلا مشاكل ولا أحداث تنغص يومك.. عبثت بنا الأقدار يا صديقي ولم تكن الحياة بهذة السهولة مطلقًا وربما زادت صعوبتها في الآونة الأخيرة.

أوقات بحس إني عايز أشق صدري وأخرج قلبي من كتر الحزن والقهر اللي بحس بيه في أوقات العجز اللي بقت كتير مؤخرًا.

محتاج آخد أجازة من الشغل شهر ولا حاجة علشان أقدر أرجع أشتغل بكل طاقتي وشغفى، النوم القليل في آخر كام شهر قتلني فعلا مش هزار تركيزي بقي قليل ومحتاج أفصل بجد...

ومحتاج أذاكر علشان هل في طريقة تانية أبقي شطور ؟ لأ يبقي لازم أذاكر وطاقتي اللي بضيعها في الشغل الكتير أوفرها لتنمية نفسي شويتين الفترة الجاية.

الوحدة قاتلة مهما حاولت أتفاداها وأتجاوز كل ده، بندم إني تسرعت في قرار الخطوبة اللي عدي عليه سنتين وخطوبتي مكملتش كام شهر لأسباب كتير خلتني متردد آخد الخطوة من تاني بس لحد إمتي يعني؟ طاقتي للحب و مشاركة حد حياتي لسه زي ماهي متغيرتش وخطط كتير مؤجلة لحد ما نبقي اتنين مش أنا لوحدي بحارب وأعيط حتي لو بكسب. عادي لو خسرت بس مكونش لوحدي...

سافرت كتير من أول السنة بس للأسف كله لشغل جديد وأماكن جديدة بس خلاص محتاج أقف وأسافر استجم وأرجع طبيعي شوية يعني. ربنا ياخده السبب اللي مخلينا ندور في كل اتجاه علشان نعيش حياة منتحوجش لحد فيها، صعبة وغير آدمية والله الإجبار علي ٥ أيام شيفتات ٢٤ ساعة بفرح لو كان شيفت هادي وقدرت أنام فيه ساعتين تلاتة.

حتي ماتشات الكورة اللي كنت بستناها ممكن أعد علي صوابعي الماتشات اللي شوفتها من شهر ٨ اللى فات. الكتب اللي كنت بقرأها مش عارف أقعد أكمل ١٠ صفحات ورا بعض وأفقد الشغف وعيني توجعني.

اكتشفت إن وردة ليها حاجات حلوة تسمعها وتبقي في عالم تاني مع إنك راكب في ميكروباص جنبك أسرة بيتخانقوا مع بعض ووجودهم في الخلفية عاملة دوشة بس معمول ليها ميوت..

Why am I doing that ? I have no clue but maybe it'd help in coming years that I did work and I did save some money for the chaotic future.

أنا زهقت من الوحدة ومحاولة إني بجهد نفسي جسدياً ونفسياً في سبيل إنها تبقي أقل شوية. أتمني ده يتغير في وقت قريب والدنيا تتفتح فيها حكاوي جديدة تموت وحدتي وتنتشلني بالخفة بتاعتها.

والمثال المهم الشخص اللي عارف هو عايز إيه من شغله وحياته اليومية، مع إن كتير منا معندهمش رفاهية التغيير ده للأسف. حسيت الإحساس ده مرة من كان أسبوع لما رئيس قسمي القديم وأنا بسلم عليه فبيقول للي قاعدين معاه في العيادة إن إسلام من أذكي الناس اللي عرفتها علشان بيحسبها صح وعارف إننا هنعيش مرة واحدة، اتكسفت ومعرفتش أرد على مجاملته مع إنه مش كتير بيعمل ده

أنا مش ذكي الحقيقة زي ماهو متخيل، أنا ممكن بس الظروف اللي حكمتني باختيارات قليلة وحاولت أختار الأنسب وربنا وفقني فيه، التوفيق هو السمة اللي أتمنى أكون عليها وأنا عندي يقين بحسن تدبير ربنا لكل اختيار بناخده أو مبنلاقيش غيره علشان أكيد هو ده الخير فعلًا لينا وبيظهر ده مع الوقت لإن معندناش البصيرة الكافية لمعرفته قبل حدوثه.