صاخِب المَخِل

أفلامه تمشي على مهل، كإنسان يفكر بصوت خافت، لا يصرخ ولا يوعظ. وفي عوالمها، الحقيقة لا تُعطى جاهزة، والإنسان هو اللغز الأجمل والأقسى في آن واحد. شخصياته لم تكن أبطالًا ولا ضحايا، بل كائنات تبحث عن معنى. تتعثر، ثم تكمل الطريق.

وداعًا لسينمائي جميل آمن بالعقل دون أن يقتل الشعر، ليجعل من السينما مساحة للتأمل دون خوف من الأسئلة التي لا إجابة لها، كي نخرج من الفيلم ونحن نفكر، لا ننسى.

مع السلامة يا أستاذ ❤

It's my 12 year anniversary on Tumblr 🥳

= إسكندرية ليه.. هو ده اللي خد جوايز

- لأ الأرض

مشهد ربما يلخص بعضا من إشكالية يوسف شاهين مع الآخر، بين ما يراه هو وبين ما يريده أو يراه الآخرون.. فيلم الأرض جميل ومهم جماهيريا من وجهة نظره، لكن إسكندرية ليه فيلم عظيم ومهم في تجربته الخاصة كمخرج، من منطلق قناعاته تجاه السينما التي يريد أن يقدمها، لأنه بيحقق المعادلة اللي طالما بحث عنها في أفلامه: (فيلم جيد، يعبر تماما عن ذاته وتجربته ورؤيته الخاصة، التي يريد دائما أن تتحرك في إطارها الأحداث والشخصيات).

لا يؤمن شاهين بذات الممثل، ولا خروج الشخصيات عن إطار ذاته وقناعاته، وده جانب تاني من إشكالية شاهين مع الآخر. يعترف ضمنيًا بذلك في حوار سابق مع سلمى الشماع، اللي انفعل عليها لما حاولت تقوله إنه بعد السنين دي أكيد يعني اقتنع بأنه لازم يحترم ذات الممثل، فقالها "انتم معندكمش وسط، هو يا مقتنعش خالص يا اقتنع، خلينا في النص"، في إشارة إنه مقتنعش ولا حاجة، بس بيحاول.

وفي حوار آخر، يشير إلى إن لهذا السبب يبدو الممثلين جميعا بيمثلوا كيوسف شاهين. وفي مشهد من فيلم إسكندرية كمان وكمان، بيصارح نفسه بالحقيقة دي، لما بيوجّه عمرو عبدالجليل في مشهد علشان يمثل بنفس طريقته، وفي النهاية يقول "قفشتهااااا" في صرخة انتصار، من منطلق إنه حقق ما أراده تماما، بينما عمرو بيبص له باستنكار، لأنه حاسس إن في المشهد ده مش أنا اللي بمثل، ده انت. وطبعا المقصود هنا في الفيلم هو توضيح جانب بسيط من إشكاليته مع محسن محيي الدين، بغض النظر عن الإشارات الأخرى داخل الفيلم اللي بتشير إلى جوانب أخرى (حساسة ومهمة جدا) في الإشكالية دي، بس ده مش موضوعنا دلوقتي.

العشق زين بس الهموم سبّاقة

والشوف حديد..

وفي سنة 1992، أي بعد 3 سنوات من عرض المسرحية، اقترح يحيى الموجي على مدحت صالح إعادة توزيع الأغنية، وأقنعه إن الأغنية دي بالتحديد خسارة تتوه في الزحمة، وإن عنده فكرة مختلفة لتقديمها للجمهور.. وقد كان فعلا، علشان تنضم لألبوم "ولا تسوى دموع" وتكسر الدنيا، وتبقى واحدة من أشهر أغاني مدحت وأنجحها، وتتحول مع الوقت لأيقونة من أيقونات التسعينيات.

بالمناسبة، الصوت اللي بيرد على مدحت صالح في الأغنية بكلمة "مجنون" في النسخة الأشهر، هو يحيى الموجي مش شريف منير.. وطبعا محدش بيلاحظ ده لأنها كلمة واحدة، ولأن شريف هو بطل الفيديو كليب وحرك شفايفه معاها.

جدير بالذكر كمان إن على غلاف ألبوم "ولا تسوى دموع" مكتوب إن الأغنية ألحان يحيى الموجي، ودي أعتقد كانت غلطة لأنه فقط أعاد توزيع اللحن الأصلي بتاع فاروق الشرنوبي، وسرع التيمبو شوية.

أثر داوود يزيد المصري لا يزول، ولن تنقطع سيرته من الابن إلى الأحفاد، سيبقى حتى في أسمائهم وطبائعهم.

سيتزوج نجله، عبدالعظيم داوود، من سيدة تدعى فريدة هانم حسام، وينجب منها "لطفي"، الذي يرث ذكاء جده داوود، ويعجب بحفيدة نعمة المراكيبي، مطرية، المغرمة بشخصيته وأفكاره، وكأنها ورثت قلب جدتها المكتوم بحب داوود لسنوات وسنوات.

ترث «مطرية» أيضًا ظلم الأيام لهذا الحب، بعد أن يرفضه بيت عبدالعظيم باشا بسبب فارق المكانة الاجتماعية، لتنتهي بذلك قصة حب أخرى خرجت من نسل نعمة وداوود.

تتزوج «مطرية» من محمد أفندي إبراهيم، ويتناسى «لطفي» قصة حبه الأولى، ليتزوج -بعد دراسة الطب على خطى جده- من «آمال» خريجة الميردي دييه، ذات الجمال الفريد. ويخرج من رحم هذه الزيجة -التي يصفها نجيب محفوظ بأنها من أسعد الزيجات- طفلاً سيحمل اسم «داوود»، يدرس الطب أيضًا، ويتزوج من سويسرية.

فهيمة -ابنة عبدالعظيم داوود- فازت بطبع جدها الحنون، قلبه الطيب وسيرته النقية. لكنها لم تقع في الحب مرةً، وتزوجت زواجًا تقليديًا، أسفر عن طفل يحمل اسم «داوود»، يموت صغيرًا من التيفود. ورغم أن سوء بختها صار مضربًا للأمثال، إلا أن ميراث صلابة جدها بقيت آثاره في شخصها، لتتحمل وفاة بقية أولادها، الثاني بالكوليرا والثالثة بروماتيزم القلب.

في النهاية، تقرر "فهيمة" أن تسير على درب جدها داوود باشا. تعود إلى أصلها وأهلها، حيث بيت العائلة في الحارة، لتنتهي حكايتها كما انتهى، وتدفن بجواره.

أثر داوود يزيد المصري لا يزول.

بحاول ألاقيني، وبحاول أتصالح مع نفسي.. مع نفسي تحديدا لأني فشلت في إني أتصالح مع العالم كله.

اعتقد إني محتاج أفكر في حياتي بشكل مختلف، ومحتاج أهرب من شيء، ايه هو بالظبط بردو مش عارف، بس حاسس إني مطارد أو في حاجة مكتفاني لسه، وإني مش عارف لحد دلوقتي أخرج من أزماتي.. أزماتي اللي كنت فاكر إنها مرتبطة بمكان شغلي والناس اللي فيه، والناس اللي حوليا عموما، لكن يبدو إنها مرتبطة بحاجات أكتر من كده، يبدو إنها بقت جزء مني أنا من كتر ما تغلغلت جوايا، أو من كتر ما أنا تجاهلتها سنين طويلة فبقت حتة مني، علشان كده لازم أستئصل الحتة دي، مش عارف إزاي بس لازم أعرف.

ما علينا، المهم إني دلوقتي بكتب.. بقالي كتير مكتبتش عن نفسي ولنفسي.. يمكن ده جزء من الأشياء اللي محتاج أستعيدها.. محتاج كمان الناس تقرأها، أكتبها وأعملها (بابليك) لأي حد يشوفها ويتفاعل معاها، كأني عايز أصرخ والناس تسمع، مش مجرد صرخة في غرفة مغلقة.

المهم كمان إن صوت محمد فوزي جميل جدا، خصوصا وهو بيغني "تملي في قلبي"، ولما بيقول بالذات "لا في ماضي أقولك كان ولا فاكره ولا نسيته.. ولا مرة جمعنا مكان عشان تقرأ اللي آسيته.. بقلبي لك أنا كلي وشاغلك عني إيه قولي!" يا سلام على العذوبة والرقة يا سلام.

It's my 11 year anniversary on Tumblr 🥳

من يومين، انتشر فيديو جديد من أحداث أرضنا الطيبة، عن أم فقدت ابنها اللي عنده سنة ونص، وكانت حضناه وبتبكي وتشكي وجعها اللي لخصته في جملة حزينة لا تكفيها الدموع، بتقول فيها «والله تعبت فيه، أخدت فيه 580 حقنة هيبارين».

كالعادة، وبعد تألقه في متابعة قصة «روح الروح»، سعى الصديق الصحفي أحمد مصطفى، وبذل كل جهده علشان يوصل للأم بطلة الفيديو، لعل تسمح لنا نعرف قصتها كاملة، ونساعد ولو بجزء بسيط في توثيق جرائم عدو لا يرحم، وفعلا قدر يوصلها، وحكت عن صغيرها، ورحلة صبرها معاه من يوم حملها فيه، وحتى بعد ولادته لأنه كان هزيل ومريض.

ومش بس كده، قدر كمان يخلي للحكاية بُعد تاني من منظور الأب الذي لم يظهر في الفيديو، لكن وجعه لا يقل عن وجع الأم، ويمكن اختصاره في جملة «ياريته ضل عايش وأنا اللي موت» اللي أنهى بها كلامه.

ولكي تكتمل المأساة، وتتضح الرؤية أكثر وأكثر، تواصل الزميل كمان مع خال الطفل، واللي كان شاهد على رحيله وآخر مشهد له في الحياة، في لحظة دراماتيكية كان عائدًا فيها الخال إلى المنزل، بينما الطفل بيجري عليه لاستقباله في الخارج، وإذ بالقصف يحصل على باب البيت، يسقط الطفل والخال، يرحل الأول ضعيف البنيان لأنه لم يتحمل الإصابة، وينجو الثاني مع إصابات في أنحاء متفرقة لم يلتفت إليها لأن ما في القلب أكبر وأصعب.

شكرا للصديق العزيز أحمد مصطفى على مجهوده.. وده لينك القصة للي حابب يقرأ تفاصيل أكتر.