Sa susunod na mga araw haharap ka sa hamon ng pagpapanatili ng katotohanan at ng mga alaala.
Isulat mo kung ano ang iyong mga nakita at narinig. Isulat mo kung ano pakiramdam sa gitna ng mga rosas. Kung sino ang mga nakasama mong lumakad at tumindig. Isulat mo ang magagandang alaala ngunit isulat mo rin ang masasama. Isulat mo kung ang mga kasinungaling sinabi nila. O kung paano sila nanahimik. Isulat mo kung paano ka nila kinutya at pinagtawanan sapagkat sa mga susunod na araw maghuhunyango sila na para bang mga santong walang sinabing masama. Isulat mo ang lahat ng iyong nalalaman at nararamdaman.
Sumulat ka sapagkat nagmamatyag lang ang mga aswang. Inaantay na ikaw ay makalimot sapagkat ang mga alaala ang liwanag na magbubunyag sa totoo nilang anyo.
Sa mga susunod na buwan babaluktutin ng mga tikbalang ang mga pangyayari. Buburahin ang alaala ng mga pinaslang nang walang kalaban laban. Babaliktarin ang kuwento upang ang masama ang maging mabuti at ang mabuti ang maging masama. Kaya mag-ingat ka. Kukuwestyunin maging ng mga kabaro mo ang katotohanan ng iyong alaala. Totoo ba na sinabi mo iyon? Totoo bang sinabi nila yon? Totoo ba na may kinatay ang mga aswang? Totoo bang ang aswang ang messiah? Lilituhin ka ng lahat ng mga boses na hindi mo mahanap ang pinagmulan. Magugulumihanan ka kung ang kaharap mo ba ay tao o hunyango. Kaya pagingatan mong maigi ang sindi ng alaala na siyang magiging gabay mo.
Sa mga susunod na taon ay patatahimikin ka rin ng takot. Maraming bulung-bulungan na pag nagsindi ka ng kandila hahanapin ka ng mga aswang. Ikaw ang susunod nilang pupunteryahin kaya mas maiging patayin mo na lang ang sindi. Ngunit hindi ba mas maiging mahuli ka na lang sa liwanag kaysa sa dilim? Hindi ba mas mainam na may nakasaksi na kinatay ka ng mga aswang kaysa unti-unti ka na lang nanghina nang walang nakakitang sinipsip na pala ng manananggal ang dugo mo?
Ilapat mo sa papel ang sindi ng iyong mga alaala at ng mga buhay ngunit nasa dilim, ng mga kinatay sa liwanag, at ng ninakawan ng dugo sa dilim. Gamitin ang tinta upang pagliyabin ang apoy kung kinakailangan. Totoong makapangyarihan ang mga aswang ngunit kakaunti lang sila. Totoong galit sila sa lahat ng may hawak na kandila ngunit wala silang laban sa taumbayang may hawak na sulo. Galit sila sa liwanag ngunit takot din sila dito. Kakaunti lang sila kaya wag kang matakot. Mas marami kayong may hawak ng kandila. Kailangan niyo lang lakasan ang loob at sindihan ito.
Kaibigan, malayo pa ang umaga. Gabayan at protektahan ka sana ng malamlam na liwanag ng mga alaala. Wag ka sanang makalimot. Wag ka sanang lamunin ng dilim.
baratheonpilled
jbbartram-illu
izzy806
dededos
