frida

أنك مابتهونش .. مابتهونش .. كمان مرة مابتهونش .. في أمان مهما غلطت ..

مفهوم بدون شرح .. مالكش بديل غير قابل للاستبدال أو الاستغناء .. هو في أجمل من كده؟

ما اعتقدش إن في شيء أبداً أجمل من إنك تبقى واثق إن خاطرك هيشترى علي طووول الخط .. و إن دموعك عزيزة وهتتمسح مهما كان الظرف .. و إن إيدك مش هتتساب مهما حصل ..

ظهرت الخضرة والزرع والعصافير والسما والسحاب..والفرق بين الليل والنهار وقوة الشمس في يوم آه ويوم لأ .. وغلوشة السحاب علي القمر وهو واقف .. احساسي بالهوا البارد والهوا السخن حواليا..

روحي اتملت بالتأمل فيهم كل لحظة واحساسي بيزيد بيهم..

مش عارفة ايه السبب ! بس انا فاضية لدرجة اني ماليش حاجة في حياتي غير اننا نشوف بعض ونتأمل في بعض..

ـ انا مابنبسطش غير بـ 3 حاجات في حياتي الايام دي : ـ اني افتح البوابة الحديد بتاعت البلكونة  واقف اشوف المباني كلها وهي فوق بس شجر بيتنا طاغي عليها بلونة الاخضر والشمس مضايقاه وبتعكس الوانه الفاتحة والغامقة .

2- رؤية فرع مليان بلون الزرع الاخضر, وفي وسطيه الورد البمبي جنب العمود البيج  جنب بلكونتنا .. بحسه أكنه لوحة وعاوزة تترسم .

3- رؤية العصافير المعششة في الشجر بتاعنا وبتطير كل يوم هي ومجموعاتها وبتقرب جدًا مني وانا واقفة وبترفرف بسرعة وكأنها خايفة مني.. خايفة مني ! هي فعلًا بتخاف لأنها مابتطلعش تاني الا لما ادخل جوه واقفل السلك وكمان الدرفة بتاعت البلكونة ..اقوم استخبي ورا الكرسي وافتح الدرفة بشويش اراقبها وهما بيطلعوا واحد وارا التاني يطيروا ويتبادلوا الادوار كأنهم بيقوموا بدور الحارس ! ـ ومؤخرًا لاحظت شئ جديد.. القطة الدخيلة المتسللة لبيتنا كل يوم بداعٍ او بدون داعٍ, بتتسلق الشجر بشئ من المكر ..ولغبائها, الطيور شافتها وهربت من العش وهي واقفة مستنياه يرجع تاني! انا طبعًا ما بستناش عليها واخوفها بعصياة المقشة واهددها كل يوم “عالله تقربي منهم تاني”, ومافيش فايدة!

انا سعيدة باحساسي الجديد, وبكل الظواهر دي حواليا.. سعيدة لأني بفضفض هنا.