Ernai Gasteiz

Atzo prentsan filtratutako berrien arabera, Eloy Velasco instrukzio epaileak Ernai gazte antolakundeko sei kide eta Periko Solabarria militante historikoa Audientzia Nazionalean deklaratzera deitu ditu ustez “terrorismoari gorazarre” egitea egotzita. Ezer baino lehen adierazi nahi dugu, ustez deklaratzera deitutako kideetako inork ez duela jaso oraingoz jakinarazpen ofizialik.

Bestetik, albistean filtratutakoaren arabera, Xabier Lopez Peñari gorazarre egitea da egozten zaien ustezko delituzko ekintza. Kausa horregatik uztaila hasieran deklaratu zuten jada Gotzon Elizburu, Mikel Button, Mikel Moreno eta Irati Sienra kideek.

Ernairen jarrera epaileen galderei ez erantzutea izan zen eta kriminalizazio saikera salatzeko elkarretaratzea egin genuen uztailaren 1ean Irungo Epaitegiaren atarian. Gerora, abuztuaren hasieran izan dugu Maialen Etxeberria, Aitor Anda eta Garazi Mugerza kideen inputazioen berri kausa berdinaren baitan, Ernaiko kide izanda, Gazte Danbadan gertatutakoen erantzule jota. Hauek ere deklaratu dute edo deklaratuko dute hurrengo egunetan Euskal Herriko epaitegietan.

Beraz, gaur gaurkoz, jakinarazpen ofizialik gabe eta zitazioaren arrazoiak zein diren jakin gabe honakoa da Ernaik Espainiako Gobernuari egin nahi dion galdera: zein da euren benetako asmoa? Zer ezkutatzen da ustez “terrorismoari gorazarre” egitearen akusazioaren atzean? Zein da azken helburua?

Udazkenean 80 Euskal Herritarren aurkako epaiketak hasiko dira Madrilen, tartean 40 gazteren aurka. Lan eskema berdinarekin jarraitzen al du Espainiako Gobernuak?

Euskal Herrian irekita dagoen joko zelai berrian konponbidearen alde urratsak eman ditzakeen edozein mugimendu zangotrabatzeko prest dagoela argi erakutsi du honezkero Espainiako Gobernuak. Eta zentzu horretan benetan larria deritzogu Ernairen aurka abian duen kriminalizazio kanpaina honi. Gazteriari dei egiten diogu, oztopoak oztopo, lan politikoarekin jarraitzeko, indarrak biltzen jarraitzeko, hori izango baita Espainiako Gobernua bere posizio atzerakoitik mugiaraziko duen berme bakarra.

Azkenik besarkadarik estuena bidali nahi diogu Periko Solabarriari.

Amaiurreko herri harresira joateko:

Larunbatean, 10:00etan Arriagako parkinean kotxe-kedada!!!

    Atzo ezagutu genuen Iruñerriako bost gazteren aurkako Auzitegi Gorenak ezarritako epaia; Maider Caminos, Aritz Azkona eta Mikel Jimenez absolbituak, Luis Goñi eta Xabier Sagardoi aldiz zigortuak. Ruleta rusa. Berri gazi gozoak. Mendeku politika ankerraren praktika. Euskal Herri aske baten alde lan egiteagatik, gazteon arazoak landu eta aterabideen eraikuntzan aritzeagatik, bestela jendarte eta herri eredu bat amestu eta haren alde borrokatzeagatik atxilotuak, torturatuak eta azkenik zigortuak.

Ehundaka gara Estatu espainiar zein frantsesaren jo puntuan izan garen eta gauden gazteak, euren mugetatik at gu geu izan nahi dugulako, gure herri eta gure eredu propioa eraiki nahi dugulako. Konponbiderako pausuak emateko aukera paregabea izanda ere, eurak jazarpenarekin jarratzeko hautua egin dute, herritarroi erabakitze eskubidea ukatu eta betirako luzatu asmo duten gatazkara kondenatuz. Badirudi ez direla ohartzen ordea euren blokeoak ez dituela gure asmoak zapuztuko. Aurrera egitea erabaki dugu. Herri honek bizi duen gatazka gainditu eta askatasunean bizitzeko determinazioa dugu.

Horren adibide dira Maider, Aritz, Mikel, Luis eta Xabier. Euren militantzia politikoarekin jarraitzeko ezkutatzea erabaki dute, atxilotzeko arriskuan baitira. Orain gure txanda da. Luis eta Xabier gurekin izateko, datozen epaiketak gelditu eta kartzelak hustutzeko herri harresia osatu behar dugu. Gazte bat gehiago ez dutela eramango argi utzi behar diegu eta horretarako lehen elkartasun eta konpromezu keinua Amaiurren izanen da, larunbatean eguerdiko 12:00etan.

Gure babes eta animoak Maider, Aritz, Mikel, Luis eta Xabierrentzat, baita euren senide eta lagunentzat. Aurrean izango gaituzte, herri harresia batera egingo dugu!

Ernai