الزُّمُرْ

من حوالي 4 سنين كده، و تحديداً في الويلكم بتاعة دفعة 2018، كانت مسيطرة عليا الفكرة دي، فكرة السراب، و جملة لولا السراب لما كنتُ حيّاً إلى الآن... مش هأكتب كتير هنا، بس هأخد حوار بيني و بين هندا من كام يوم على تويتر

هندا:  بيصعب عليا الناس اللي بتعافر فى حاجة ميتة عايزة اقولهم الميت مبيصحاش احنا بس اللي مش عايزين نصدق

الفكرة هنا إن الموضوع فعلاً صعب، فكرة التصديق و الإيمان بحاجة معينة ، و جعلها هي محور حياتك، مع مرور الوقت بتلاقي إن حياتك كلها ممكن تتدمر لو حصل أي غياب للشيء ده.. أياً يكن الشيء ده إيه بقى، شخص، هواية، مكان.. أي حاجة.

قلت لهندا إن الأرض برضه بتبقى ميتة، و لما ربنا بينزل المطر بيحييها تاني و يطلع منها الشجر، فقالت بس إن احنا بشر، و اللي بنديه للميت من روحنا، بيموّتنا إحنا.. قلت لها إن إحنا بنعافر على أمل إن الميت ده يصحي تاني، سواء بقى كان هيصحى ولا ده سراب..  

و ختمت هندا الحوار قائلة:  و المعافرة دي برضو هي اللي بتدمر لو مجبتش نتيجة.... 

في ٦ ابتدائي قريت نائب عزرائيل للسباعي، الرواية كان فيها حاجات صادمة جدا بالنسبة لسني و تربيتي و بالنسبة للحاجات اللي اتعودت أقراها ،  مثلا تحرش البطل بالبنت في الآخر لما كان راكب العربة البويك ، أو حكاية اختبائه و صديقه في غرفة تغيير ملابس البنات في المصيف ، و الوصف لحالة الفتاة و هي تخلع ملابسها الداخلية قبل ان تنطلق عطسة صديقه مُفسدة الأمر عليهم ..  و الموقف الأفظع بالنسبة لي ، لما تقمص توحة ، البنت اللي جسمها فاير ، و مد إيده في صدرها و قعد يوصف فيه حوالي نص صفحة.. فضلاً عن فكرة الرواية في حد ذاتها و ما بها من أفكار غريبة عن عزرائيل ، لا تكاد تناسب طفل في العاشرة من عمره تقريباً 

خرجت من تجربة السباعي دي و مادخلتهاش تاني غير بعدها بفترة طويلة لما قرأت له أرض النفاق ، بعيداً عن السباعي بقى و جدلياته، ابتديت أتسلل لعالم نجيب محفوظ ، عالم سحري بكل ما تحمله الكلمة من معاني.. مش فاكر بالظبط أول حاجة قرأتها ليه كانت إيه ،  بس فاكر إني لما كنت بألعب طايرة ف تالتة إعدادي ، كنا بناخد القبض بتاع الشهر، لازم أعدي على الهيىة العامة للكتاب اللي في رادوبيس و أشتري له حاجة.. كان بيبقى عليها خصم ، و فاكر إن الحرافيش كانت ب 18 جنيه و جبتها ب 16 و نص تقريباً طبعة دار الشروق..  اشتريت من هناك قشتمر و الحرافيش و حديث الصباح و المساء تقريبا، و من مكتبة مصر اشتريت ليالي ألف ليلة و فتوة العطوف..

مرحلة تانية اتسحلت فيها كانت مسرح علي أحمد باكثير ، الاندونيسي المولود في اليمن و عاش في مصر.. أنا طول عمري بأهتم باللغة في حد ذاتها ، تركيبات باكثير اللغوية و لغته نفسها المسرحية كانت شدّاني جداً.. أذكر مثلاً جملة قريتها و أنا في إعدادي (غالباً تانية إعدادي) في مسرحية حرب البسوس ، و فضلت ساحلاني فترة لا بأس بها ، كانت بتقول ( فليبؤ امرؤ القيس بن إبان بشسع نعل بجير ) و قعدت أدور و أسأل المدرسين على معناها، هي معناها مُرتبط بالمسرحية و بسير أحداثها، و فضل حلم من أحلامي إني أعمل/أشوف مسرحية السلسلة و الغفران على المسرح .. و طبعاً مسرحية إله إسرائيل ، و الملحمة الإسلامية الكُبرى (عمر) المكونة من 18 مسرحية ، غير المقدمة و الخاتمة .. بيحكي فيها بداية من موت أبي بكر إلى موت عُمر بن الخطاب.. كان بيقول إنه أخد حوالي سنتين إجازة عشان يقدر يتفرغ للعمل ده..  اشتريت له و استعرت له كتير ، و كذلك توفيق الحكيم ، كل دول كانت اللغة محافظة على نفسها من الابتذال في الجنس أو البذاءة .. فيه نقطة مهمة كده ناس كتيرة بتغفلها عامدة أو غافلة ..  مش المفروض كروائي لما أكتب مشهد جنسي إني أهيجك ، التفاصيل المبالغ فيها دي مقرفة و بتنقل الكتاب لخانة تانية من الروايات ، الكتابة الجنسية برضه ليها روّادها و ليها قرّائها 

بعد نائب عزرائيل في ٦ ابتدائي ، كانت عودة الروح في أولى ثانوي لتوفيق الحكيم.. واحدة بتوصف جارتهم فبتقول ( سنية الشرموطة ) ، قبل ما نتكلم عن الموضوع ده أنا حابب أتكلم عن الرواية دي عشان هي فعلاً من أحبّ الروايات لقلبي ، و فيها عبارة عظيمة جداً اتقالت على لسان البطل اللي كان مُراهق ، و كان بيحب جارتهم اللي أكبر منه .. و كان مستغرب جداً إنه ليه متضايق عشان هي مشيت و سابته 

“ نعم ، لقد عشت من غير حب و عشت سعيداً، و لكنّها سعادة الأعمى الذي لم يرَ النور و لم يرَ الجمال و لم يرَ الحياة. و لكنّكِ فتّحتِ أعين الأعمى، و جعلتِه يُبصر و ينبهر. فهل تحسبينه إذا أرجعتِه بعد ذلك إلى ظلامه الأول ، مُستطيعاً أن يجدَ سعادته الأولى؟ “

و فضل الرد ده في دماغي فترة طويلة جداً لجماله اللغوي..و في وقت من الأوقات قدرت أفهمه فعلاً و حسيت ساعتها بعبقرية الحكيم في التشبيه و الوصف.

نرجع للست سنيّة ، أنا كنت مستغرب الشتيمة جدا ، و إزاي دار النشر تمرر الكلمة دي عادي كده و ما اتشالتش خالص على الرغم من إن الرواية مكتوبة في الأربعينات ، و المفروض دي طبعات مُنقّحة (طبعة دار الشروق) .. و كملت مع الحكيم فترة في اوديب و الطعام لكلّ فمّ ، و الورطة ، و أرني الله ..و رائعته عصفور من الشرق

عصفور من الشرق تعتبر أشبه بالسيرة الذاتية لتوفيق الحكيم نفسه لما كان مسافر فرنسا في بداياته، للأسف أنا ما قرأتهاش من ثانوي ، كنت مستعيرها من مكتبة المدرسة ، و كان فيه حوار بينه و بين جاره الروسي و هو على فراش الموت عن الأديان.. أنا من كتر إعجابي بالحوار بينهم ، كتبته في نوتة كانت معايا .. بس النوتة اتبهدلت طبعاً ، و لكن الرواية عظيمة جداً و تكاد تكون من أحلى الحاجات اللي قرأتها له برضه.

و رجعت أدوب تاني في عالم نجيب و اتهوست بالقاهرة الجديدة ، و خان الخليلي و أفراح القبة .. قريت برضه الكرنك و أمام العرش و الباقي من الزمن ساعة ، و حكاية بلا بداية ولا نهاية .. و جه ميعاد أولاد حارتنا.. مخزون من اللغة و التراكيب و الألفاظ و الصور و الخيال ، أنا مش من الناس اللي بتندمج بكل روحها مع اللي بتقراه ، بس مع نجيب كان بيحصل لي ده غصب عني .. و رغم إني ما قرأتش خان الخليلي من ثانوي ، بس فيها منظر مش قادر أنساه لما كان أخو البطل المصاب بالربو بيتمشى ع الكورنيش مع جارتهم اللي كان بيحبها و بتحبه ، و هي لابسة لبس المدرسة و حاضنة الكتب  المنظر حاضر في دماغي بكل تفاصيله ، بالضباب اللي مغلفهم في الصبحية و مسكتهم في إيد بعض .. الرواية قريتها تقريباً بالتزامن مع عودة الروح (هما تقريباً اتكتبوا في نفس الفترة الزمنية لما كان الربو مُنتشر جداً) و رغم توقعي لإصابة الأخ بالربو ، ماقدرتش أمنع نفسي من الاندماج تماماً في الحزن على وفاته. و طبعاً مش هأتكلم عن القاهرة الجديدة ، و تعدد أصوات الروائيين في أفراح القبة مثلاً.

بعدها عالم عبد الحميد جودة السحار ، باللغة التقيلة اللي تكاد تقارب لغة باكثير ، و بالصور و الخيال الحلو جدا.. قريت له المسيح عيسى بن مريم و كان بيعجبني أوي رسمه بالقلم لمنظر الشروق و منظر يوحنّا المعمدان بلبسه القاسي و لهجته القوية الواثقة ، و منظر السوق .. قريت له برضه رواية جسر الشيطان و حكايات من الكتب المقدسة ، و لكن تبقى رواية المسيح عيسى هي المُفضّلة عندي.

رغم عدم حبّي للأشياء القصيرة(رواية/مسرحية/فيلم) ، محمد عبد الحليم عبد الله كسر عندي الموضوع ده .. و رغم إني ما قرأتلوش غير مجموعة قصصية واحدة (النافذة الغربية) و لكن برضه فيه جملة علّقت معايا جداً بيقول فيها “إن طولَ الأُلفةِ للمكروه، تُقرّبه من أن يكونَ في نظر الضُعفاءِ حقًّا” و لسه فاكرها رغم ابتعادي عن المجموعة دي من ثانوي برضه تقريباً.

طبعا كنت بأحس بملل رهيب و أنا بأقرأ الحاجات المترجمة في الأدب العالمي للناشئين أو غيرها، بس هي ضافت لي رصيد عظيم الحقيقة .. آلة الزمن ، أول رجال على سطح القمر ، الرجل الخفي لهربرت جورج ويلز.. رحلة إلى مركز الأرض لجول فيرن.. كنوز الملك سليمان و هي أو عائشة و نجمة الصباح للسير هنري رايدر هاجارد.. مزرعة الحيوان و 1984 لجورج أورويل.. أوقات عصيبة لديكنز.. مسرحيات شكسبير.. و غيرهم 

كل ما مضى كان في ما قبل الكلية..  مرحلة الكلية تزامنت مع الثورة ، و ظهور أجيال جديدة من الروائيين/الشعراء اللي أنت غصب عنك لازم تحبهم عشان دول أعظم حاجة في المجرات، و طبقاً للتريند السائد، أنت مش من حقك تعترض على الصفّ الأول من الروائيين الموجودين طبعاً نظراً لشعبيتهم الرهيبة على السوشيال ميديا.

مثلا تامر إبراهيم ، ده أحمد خالد توفيق بس مع شوية تعديلات.. أنا بأحب أسلوب خالد توفيق كوني اتربيت عليه ، فتامر بالنسبة لي لطيف ، كتاباته فيها جو لطيف ، لغة خفيفة سلسة .. 

أحمد مراد ده أفشخ كاتب ظهر في تاريخ المجرات و يكاد يتفوق بالساسبنس بتاعه على كونان دويل و اجاثا كريستي مع بعض .. أنا قريت له تُراب الماس ،  مش عارف و الله إيه اللي خلاه يسيب شغلانته و يكتب فعلا.. مجموعة أحداث غير مترابطة ، مشاهد جنس فج ، شتايم ، مطاردات و ساسبنس ، بلوت تويست هبلة

كان نفسي أكتب عن محمد صادق صاحب هيبتا و انستا حياة الصراحة بس للأسف ربنا بيحبني و ما قدرتش أكمل أول فصل في انستا حياة ، و طبعاً فيه ماسورة و ضربت من الروائيين أو أصحاب الكتب .. زاب ثروت و نفيسة أبو بكر و معرفش مين تاني .. طبعاً لا مجال إني أذكرهم أصلاً في البوست ده.

طبعا لا مجال للحديث عن الأفلام و المسلسلات و الأغاني ، أنا حابب بس أرجع للكتب ، بمناسبة كتاب بليغ اللي لسه بادئ قراءة فيه

" رسالة إلى السيد أمل مصر في الموسيقى "

من فترة صديقي محمود كان بيقرأ كتاب عن بليغ حمدي و كان مبهور بيه جداً ، سواء من طريقة السرد و الحكي ، أو من المعلومات و الأحداث اللي بيقراها ، اللي تزامنت مع أحداث عنده هو شخصياً.. في حفلة مدّاح القمر اللي كتبها محمد حمزة مبنية على التراث الحلبي السوري ، بيقدّم حليم الأغنية قائلاً (الأغنية من كلمات الشاعر الشاب الأستاذ محمد حمزة، و ألحان أمل مصر في الموسيقى.. بليغ حمدي)

طالما سمعنا عن هذا النوع من العلاقات ( الثقيلة على القلب ) التي لا يملّ طرفٌ منها من الشكوى و التذمّر بسبب عدم السؤال من الطرف الآخر ، أو عدم الحضور لموعدٍ ما .. بعبارة أخرى ، عدم الاهتمام.

طالما سمعنا و طالما تهكّمنا و انتقدنا هذه العلاقة المُستنزِفة لطاقة كلا الطرفين. و لكن ألم تكن في يومٍ ما الطرف الشاكي في أي علاقة؟

يقول صلاح عبد الصبور على لسان الحلّاج في مسرحيته ، حين كان أحد السجناء يتمنى الحصول على سيف ليقتل الأشرار دفاعاً عن المظلومين .. “ المظلومين؟ أين المظلومون و أين الظلمة ؟ أو لم يظلم أحد المظلومين جارًا أو زوجًا أو طفلًا أو جاريةً أو عبدًا؟ “ فحدّثني الآن عن شعورك و أنت تطلب اهتمامًا و لو مُزيّفًا من صديقك/صديقتك و قد كنت فيما مضى تهاجم و بكلّ ضراوة من استجدى ما تستجديه الآن.

لا أحد مُلام ، و إنما تلهو بنا الحياة و تسخر.. حتى جرداق نفسه استجدى حبيبه قائلًا ( فتعالَ أحبّك الآن أكثر ) 

كنت دوماً أنتظر حضور أصدقائي في الصفوف الأولى لأي من عروضي المسرحية ، و كانت غضبتي لا تبقي ولا تذر إذا عرفت أن فلانًا لم يحضر ، و بدون قبول أي أعذار .. يبقى ذاك الموضوع عالقاً في ذهني و إن مرّ عليه ما مرّ. و ظللت على هذا الحال و حتى فترة قريبة جدًا.

و ما لُمتُ على من لم يحضر عرض موسيقى جامعة القاهرة ، في محاولة مني للتخلّي عن دور الصديق اللائم دائمًا، و محاولة أخرى لتقبل أعذار الآخرين ، و أنني لست محور هذا العالم

 كنت أثناء الحديث مع صديقة ، أقول لها فيما مفاده أنّ بعض الأشخاص لا يعرفون قيمتهم الحقيقة إلّا من خلال أعين أحبائهم ، و لهذا السبب فقط كنت دومًا مُطالبًِا بحضور جميع أصدقائي لأيّ من عروضي سواء في المسرح أو الموسيقى ، و لكن مع مرور الوقت ، ذبلت تلك الرغبة كما تذبل ورود الخريف بعد ابتعادها عن الربيع بأشهر ، فأصبح كلّ ما في الأمر هو عبارة عن عرض لمدة معينة من الدقائق ، تُخرج فيها ما قد اختزنته ، و تحاول قدر جهدك الاستمتاع بما تحب ، ثم بابتسامات منهكة تحيي من حضر من الأصدقاء ، و تذهب لتنام معلناً انتهاء فصل و بداية فصول أكثر مآساوية.

لفترة ما عادت تلك الرغبة في الظهور بقوة بداخلي ، و أصبحت أتحرك بحثًا دائمًا عن الأفضل ، و أبحث عن أماكن أعزف فيها ، و ازداد الشغف في صوتي .. ثم أخيرًا .. انهار كلّ شيء مرّة أخرى لنعود نجرّ أقدامنا لتلك الابتسامة المنهكة التي احتلّت الحياة بكاملها ليس فقط ما بعد العروض

قمت لبست و روحت فطرت معاهم ، آية و بسمة و سارة و خلود و رضوى و مروة و نهى ، و ناجي و طيار و أسامة صلاح .. و بعد الفطار و قعدة المزيكا بين كيبورد آية ، و كمانجا مروة و عود زمر :D 

انطلاقة إلى أرض المعارض ، استاد القاهرة عشان نتفرج على الأستاذ حامد ( ابن أختي ) في بطولة السفير الصيني للكونغ فو .. بعتّ لياسر عبد الله و أنا رايح ، قال لي إنه مش فاضي، بعدها بشوية قال لي إن مشوراه اتلغى فبقى فاضي.. قعدت شوية مع حامد و اتكلمت معاه و مشيت على 4 و نص كده روحت على الكوربة لياسر 

على قهوة أسوان فضلت قاعد أنا و ياسر عبد الله و معانا عودين ، عزفنا و اتكلمنا في حاجات كتيرة و عزفنا تاني و حكينا :D لمدة حوالي 5 ساعات تقريباً.. بعدها ( بعد ما عضمي نشف ) قررت إني لازم أروّح ( أسافر ) ناهيا بقى عشان فيه عسكرية بكرة. وصلنا لحد المترو و فضلنا نحاول نتصور ماعرفناش :”D فواحد كان معدي فأشفق علينا غالباً فجه و صوّرنا بموبايله ، و بعتّ لي الصور ، و نزل المترو.

ركبت المترو و معايا كتاب بأقرأه ، و جنبي العود على الأرض.. و أنا مركز في الكتاب و المترو صامت كعادته ( من مترو الأهرام ) كان قاعد قدامي ولدين صغيرين (سيف ، و يوسف ) أكبرهم في تانية إعدادي، قبل ما المترو يتحرك ، فجأة لقيت الولد ده بيقول لي ( عمو ، هو الكتاب اللي بتقراه ده حلو ؟ ) لوهلة كده سكتّ ، السؤال باغتني الصراحة :D فقلت له آه حلو ، فحسيته قاعد بيلوي رقبته عشان يقرأ الغلاف ، روحت قافل الكتاب و مديهوله.. سألته بتحب القراءة ؟ قال لي اه ، و قرأت كذا و كذا و كذا ( تقريباً ماعرفتش ولا أي حاجة منهم ) قلت له تعالى اقعد جنبي ، جه جنبي و قعدنا نتكلم شوية عن الكتب ، فجأة أخوه الصغير اللي كان قدامي قال لي ( عمو هو ده جيتار اللي في الشنطة ؟ ) قلت له لأ.. ده عود ، عارفه ؟  سكت كده شوية و قال لي لأ ، فرحت فاتح الشنطة و مطلعه موريهوله.. حسيت كأن الناس ما صدقت ( ما تعزف لنا حاجة و النبي يا أستاذ ، انت بتدرس مزيكا ؟ ) و بدأت حركة القطر ، و بدأت ألحان عبد الوهاب في لقاء السحاب ترن في المترو.

الناس اللي حواليا كانوا مبسوطين جداً ، الولدين الصغيرين ، و كان فيه ناس قدامي حوالي خمسينات مثلاً، و واقف جنبي الولد اللي صوّرني أنا و ياسر فوق :D و فيه واحدة واقفة على استحياء في نص المترو كده .. شوية و جت وقفت في وشي. من ألحان عبد الوهاب لألحان فوزي لمنير مراد لعبد الوهاب تاني للشيخ سيد درويش ، و ختاما بالسنباطي.. أنا كنت مبسوط جداً بانبساط الناس، و إن كان الموقف الأبرز لما وصلنا العباسية ، البنت دي كانت نازلة ، فقربت مني و وطت على ودني و قالت لي ( Thank you ) للحظة كده حصل لي إيرور في دماغي :”D اللي هو أنا اللي المفروض أشكركم يا جماعة مش العكس ، عموماً البنت دي أنا مدين ليها بجرعة من السعادة و الانبساط مكملة معايا حبة كتير.. شكراً ليكي يا حلوة أينما تكونين دلوقتي :”)

بعد ما وصلت العتبة ركبت مع الولدين الصغيرين دول و الولد اللي صوّرني أنا و ياسر .. و فضلنا نتكلم شوية عن السفر و الكتب و الدراسة ، إلى أن وصلت إلى التحرير ، و منها لعبد المنعم رياض ، إلى ناهيا... و عديت حلقت دقني و التهبت جداً و طلعت نمت أخيراً لأعلن انتهاء يوم من أحلى الأيام اللي عدّت عليّا مؤخّراً.. شكراً ليوسف و سيف ( الولدين الصغيرين ) و شكراً للبنت الجميلة ، و شكراً لحامد ابن أختي اللي ما خيّبش أملي و أخد مركز أول.. شكراً للمة الحلوة بتاعة واي ,, و طبعاً نشكر الأستاذ ياسر عبد الله :”)

جزء من الفيديو اللي صوره يوسف في المترو

بعد عرض مسرحية اليوم الأخير في مايو 2015 ، و بعد المجهود اللي بذلته فيها جسدياً و نفسياً كنت قررت خلاص أبطل مسرح عشان هو فعلاً محتاج نَفَس .. و أنا اكتشفت إن بعد الترييحة الكبيرة اللي ريحتها من ساعة ما دخلت الكلية ، إن مابقاش عندي نَفَس للمسرح و بروفاته... بس حصل بعدها إسماعيل أخرج عرض ( بيلبيوس ) و حصلت فيه اعتذارات كتيرة ، فنزلت مثّلت فيه قبل العرض بأسبوعين تقريباً كسدّ خانة... اعتذرت عن الشغل في الحضيض ، و لحد دلوقتي مش عارف أنا ندمان على كده ولا لأ ، بس يمكن دي كانت حاجة من ربنا عشان يظهر أيمن أو يظهر إسماعيل ، بحبهم للمسرح ، و يتفوقوا على الجامعة .. و ده اللي بتّ متأكد منه يعني

مع بداية السنة دي كنت قررت أخرج - زي كل سنة - الاسكتش بتاع الويلكم بارتي في زايد ، بدون دخول في تفاصيل كتيرة ، الورق خلص متأخر ، الناس مالحقتش تحفظ ، عملنا بروفة واحدة تقريباً.. الاسكتش كان فاشل بكل ما تحمله الكلمة من معاني ! مافيش إفيهات بتضحك ، مافيش رسالة وصلت.. اللي ظهر ع المسرح شوية ناس بتستظرف و خلاص ، و أنا أعتذرت و بأعتذر تاني للناس اللي وافقت إنها تشتغل في الاسكتش ده إني طلّعتهم ع المسرح بالشكل ده...

نرجع قبلها بكام شهر ، هبة الكومي لما قررت تخوض التجربة الرهيبة في إعداد رواية ( أولاد حارتنا ) لنجيب محفوظ و تجسيدها على خشبة مسرح الجامعة ، كان في دماغها خط درامي مرتبط بالعود ، قعدنا كذا قعدة و اتفقنا على كام مود مزيكا ، و خلاص أنا هأشتغل عليهم ، و هيبقى ليّا دور كممثل و عازف  في العرض ، ثقة هبة كانت كبيرة جداً فيّا ، و الموضوع كان محمسني جداً ، و كنت قررت أبذل قصارى جهدي عشان أبقى على قد ثقة هبة و كلامها اللي قالته لي قبل كده بعد عرض بيلبيوس، إني من الممثلين الكويسين اللي اشتغلِت معاهم..

مرّت الأيام ، و بدأنا بروفات ، و أخدنا الورق ، و من الجدير بالذكر إن معظم المسرحية أنا بأبقى ساكت ، و الموضوع ده كان تاعبني جداً ، فكرة التمثيل في الصمت بالنسبة لي مرهقة أكتر بكتير من التمثيل بالكلام ، عشان كده كنت خايف جداً ، مع الوقت الناس ابتدت تقول لي إنت كويس في الصمت..

بدأنا في رسم المشهد التالت و كلامه ، و من هنا ظهرت مشكلتي الكبيرة في الشغل ، أول مرة أمسك مونولوج و أبدأ أشتغل عليه من حوالي سنة و نص تقريباً ، أنا فاهم الكلام ، و عارف المفروض يتقال إزاي ، بس مش قادر أطوّع أدواتي إني أوصّل ده.. كنت بأشوف في عينين هبة صدمة ، اللي هو  “ مالك يا زمر ؟! “و كنت بأشوفها و أحاول أعدّل الأداء ، و أفشل.. فشل ورا فشل ورا فشل.. الأداء مش راضي يتعدّل.. و كل ما نقعد و نظبط حاجة ، تاني يوم تبوظ تاني.. و فضلنا ع الحال ده تقريباً لحد قبل العرض بأسبوع.. قعدت اتكلمت شوية مع إسماعيل و قررنا نكسّر كل حاجة في الأداء بتاع المونولوج ، و نعيد البناء من الأول و جديد، و قد كان.

جه يوم العرض ، و عرضنا الحمد لله ، و بعد العرض قعدنا و بأتكلم مع هبة 

- المونولوج كان حلو يا هبة ؟

= المشهد كله كان حلو يا زمر

- المونولوج يا هبة ، أنا مالي بالمشهد :D

= المشهد كان حلو

و بكده تأكدت إن المونولوج اتقال بطريقة سيئة ، أو على أقل تقدير ، بطريقة أقل من اللي كانت مطلوبة منه.. و اكتمل الإحساس بفشل التجربة بالنسبة لي.. فكرة إني أرجع أمثّل تاني مع كل بروفة من العرض كانت بتبقى أصعب و أصعب.. النهاردة في التقييم الموضوع كان خلاص وصل للنهاية بتاعته، أنا صعب تاني أرجع أمثّل ، أو علشان أرجع ، محتاج كذا عرض ورا بعض ، و محتاج أرجع أتفرج على مسرحيات في كل حتة ، و أرجع أقرا تاني كتير.. بس خلاص الموضوع بالنسبة لي انتهى