Hawaiʻi Holomua, January 18, 1893. Honolulu, HI.
Kukala Kue a ke Aliiaimoku
O wau, Liliuokalani, ma ka lokomaikai o ke Akua, malalo o ke Kumukanawai o ke Aupuni Hawaii, Moiwahine, ma keia ke hoike paa nei i Koʻu kue i kekahi hana a mau hana paha a pau i lawelawe ia e kue ana Iaʻu iho a me ke Aupuni Kumukanawai o ke Aupuni Hawaii e kekahi poe e koi ana ua kukulu lakou he Aupuni Kuikawa no ka manawa no keia Aupuni.
Ke ae wale nei no Au mamuli o ka mana oi ikaika o Amerika Huipuia nona hoi ke Kuhina Elele Nui, ka Meamahaloia John L. Stevens, ua kauoha aku i na koa o Amerika Huipuia e hoopae ia mai ma Honolulu, a ua kukala ae e kokua no oia i ua Aupuni Kuikawa ʻla no ka Manawa i oleloia.
Nolaila, i mea e kaupale aku ai i na hookuia ana o na puali i hoolawa ia me na lako kaua, a malia paha o hoopoino ia ke ola; nolaila, malalo o keia Kuahaua Kue a i kauhola ia hoi e ua mana ikaika ʻla, ke ae wale nei no Au e panee aku i Koʻu Mana a hiki i ka manawa a ke Aupuni o Amerika Huipuia, mamuli o na mea oiaio e waiho ia aku ai imua ona, e hoololi ai i na hana a kona Luna Aupuni a e hoonoho hou Iaʻu maluna o ka mana Aʻu e koi nei ma ke ano Aliiaimoku o ka Paeaina Hawaii.
Hanaia ma Honolulu, i keia la 17 o Ianuari, M. H. 1893.
[Kakauinoaia:]
Liliuokalani, R.
Samuel Parker, Kuhina o ko na Aina E.
Wm. H. Cornwell, Kuhina Waiwai.
Jno. F. Colburn, Kuhina Kalaiaina.
A. P. Peterson, Loio Kuhina.
Ia S. B. Dole a me kekahi poe e ae o ke Aupuni Kuikawa no ka Manawa o ka Paeaina Hawaii.
