اليوم صار اشيا كتير, كان جاي عبالي انهي يومي بتلفون معك احكيلك فيه كل شي صار و انا متحمسة, احكيلك انو ايامي فاضية بس مليانة, احكيلك اني مشغولة بس بوصل اخر اليوم فاضية, احكيلك انو ايامي بتشبه بعضا كتير, ما في حدا مكمل معي, ما في حدا عم يسألني كيفك عنجد متل ما كنت انت تعمل.
انا عندي دبل الورد من زمان, صار عندي مناعة من الورد و من الرسايل و من الحب و من كل شي.. بتصدق؟
لح تقلي انتي الي تركتي, لح قلك صح, بس لانو ما بقا في شي حلو نعيشه ما عشناه, الباقي هو عبارة عن حرب نحن خسرانين فيا كل يوم, خسرانين بعض و حالنا.
شو عامل؟ مين نساك ياني؟ نسيتني صح؟ هي اول مرة بكتبلك من وقت ما تركنا.. تخيل! اي عم امنع حالي اكتبلك لانو عم امنع حالي اتذكرك لانو عم امنع حالي فكر فيك
كل ما بفكر فيك بحسك حلم مضى عليه سنتين او اكتر, معقول صرلنا ٣ شهور ما منعرف شي عن بعض, بصراحة؟ توقعت الموضوع اصعب, بس في اوقات هيك بشتاق, بحن, بشتهي دق احكي
مبلى في كم شخص حاولوا يدخلوا حياتي بس انا ما قدرت, بحس لسا عم اتعافى, انت شو عملت؟ رحت شي دايت؟ نبسطت معا؟
بيناتنا شارعين, ولا مرة خطرلك تجي؟ تشوف مثلا اذا انا تغيرت او لا؟
ما عندي قدرة ادخل شوف صورنا ولا اسمع اغاني منحبا, عمرو دياب مثلا بطلت حسه الا انت ههه
عم اتعلم بيانو تخيل! كنت ديما قلك اعزفلي هل غنية وغنيلي, هلأ صرت اتعلم لحتى اعزفون انا
كنت الشي الوحيد الخاص فيني ما بشاركه مع حدا حاسة هلأ بطل في شي كل شي فاضي
بطلت آمن بالحب! بطلت آمن بالابدية! بطلت آمن بكتير قصص كنا نحكي فيا. تغيرت كتير قصص و نظريات. الدنيا كلا تغيرت
لهلأ بمرق من شارعك بقول يمكن المحك, يمكن تكون مارق صدفة
قولك ممكن نرجع نلتقى عادي؟
بحس انك نسيت خلص, بس انا ما نسيت, بشوفك بحلمي ديما, اخر مرة صحيت عم ابكي حتى تخيل!
ما حدا بيعرف بكل هل شي, بس اذا فيني قلك هلأ شي ما لح قول كل هاد
كون بخير هاد اكتر شي بدي ياه
لح ضل بعيدة ادعيلك تبقى بخير
turnnoffyourmind
areudirty
prguitarman
germansingergirl
theartofmadeline
s-u-f-j-a-n-s-t-e-v-e-n-s
yousharknotpass
