Bin Laymon The Handsome Writer

القصة بقت بايخة بصراحة بالنسبالي

بيني و بين الناس جدار علطول .. هما عارفين يهزرو مع بعض .. يحسو انهم صحاب عادي .. يعيشو حياة عادية .. لو حد فيهم قعد فترة من غير شلته يحس انه حد منهم واحشه .. لكن انا

انا اتعودت اصاحب نفسي بس ف علطول غريب

مش زعلان من دا او حاجة .. لكن الفكرة ماذا لو كنت طبيعي عادي زيهم وكل دول بقوا شبهي؟

ليه دايماً ابقى متبروز اني مختلف و مفيش حد شبهي .. مش عارف ان كان دا حاجة كويسة او لا بس هي حصلت وبتحصل و هتحصل عادي ف اعمل ايه يعني

واحد مجنون زي ليمون عشان تعرف تتعامل معاه لازم تعمله البوم صور عندك وتحاول تثبت ان الالبوم بتاعك هو اللي فيه ادق صور لبن ليمون .. اناني مبيفكرش الا في نفسه .. طموح وعايش في الوهم .. معاق نفسياً ميعرفش يتعامل بشكل طبيعي مع الناس .. هيلبسنا في حيطة لو فتح بوقه .. الخ

كل واحد معاه البوم مكون من مجرد مواقف عبيطة بيحدد عليها انا مين في الحقيقة وبمثل على الناس ازاي اني انسان زيهم عادي وهو مخبي الحقيقة جواه وبتطلع في المواقف وكدا

اللي يضحك في الموضوع ان كل البوم فيه البوم تاني عكسه مع حد تاني ..

يعني واحد شايفني اناني و مبفكرش غير في نفسي وواحد تاني شايفني مغفل و بهتم بالناس على حساب نفسي .. و غالباً بتبقى المواقف متشابهة في الالبومين بس كل واحد و روح المحقق اللي جواه يطلعها عليا وينظر بقى

الكلام دا لو من ناس عادية تمام .. هحط الالبوم في الدرج وهاخد اللي قدامي على قد عقله وخلاص

لكن لما تيجي من عيلتي .. اعمل ايه المفروض؟

الحج شايف اني اناني ومبفكرش الا في نفسي و الحجوجة تتشارك معاه نفس وجهة النظر لأسباب عبيطة حرفياً

اناني و مبفكرش الا في نفسي وانا اللي عملت فرص بنت كلب تحل مشاكل العيلة ككل ومشاكل كل واحد لواحده وعامل خطة لكل واحد حرفياً وحاولت اساعد كل واحد فينا يمشي في دنيته ازاي ويكسب اكتر والدنيا تمشي معانا كلنا عادي؟

اناني وانا الوحيد اللي اشتغلت في الشركة وعملت السيستم بتاعها وشيلت كل حاجة ستراتيجك فيها من الصفر عشان تشتغل صح وحليت كل مشكلة ظهرت فيها بنفسي .. اللحظة اللي قررت ابقى فيها اناني و افكر في نفسي فعلاً هي لما لقيت اني مبتقدرش وبالعكس بتعامل ان دي فرصة مساعدة مكنتش احلم بيها وقد ايه انا عاق لما اسيب الحج في المركب لوحده واخلع .. مع ان فيه اتنين تانيين ممكن يركبو المركب عادي جدا وانا الوحيد اللي ركبتها بس ولما سيبتها بقيت انا العاق الاناني الزبالة و هما لا يحرام .. محدش فيهم درس بيزنس او تسويق هيشتغلوا ازاي 🥺🥺

تمام انا قولت انها مركب غرقانة وحاولت اصلحها ومحاولاتي اترفضت واتقال انها مجرد تنظير وكلام كتير منغير شغل .. اوكيه مش هحرق بنزين في مركب غرقانة وانا عاق واناني وجاحد فعلاً

والمركب تغرق فعلاً بعدها ب شهرين بالظبط سبحان الله

عامةً مش جديدة القصة دي ووقتها ولا فرق معايا رأي اي حد في العيلة فيا ان كنت عاق او اناني او اياً كان رأي اي فرد هنا فهو مش هيفرق معايا بجنيه

ثانوية عامة لما حرقت نفسي و جبت اخري حرفياً ولا واحد اهتم وقتها

انت بتدلع .. بقيت الناس اللي بينزلو دروس مش زيك ليه .. حرفياً قصص عبيطة بنت كلب كتير بالشكل دا

وفي الاخر رغم اني كنت بحرق نفسي وبنهار واول مرة في حياتي اوصل للقاع نفسياً حرفياً .. ولا واحد فيه كان شايفني اصلاً

الحج عايزني مقعش زي اللي قبلي وخايف علي شكله قدام صحابه والناس هيبقى عامل ازاي

الحجوجة برضو خايفة من كلام الناس وشايفة اني جاحد ومش مقدر مجهودهم

اخواتي شايفين ان انا السبب في مشاكل العيلة كلها واني بلعب مش بذاكر مثلاً

وانا قاعد احاول الم الدنيا بأي شكل عشان مش ملاحق اجمع ساعتين نوم على بعض ولا الم المنهج مع المدرس اللي بيجري فيه ولو غبت محاضرة تضيع ولا انظم ام مواعيد الدروس اللي كلها اوفلاين ولا عارف اشوف من الاستجماتيزم اللي عندي ومخليني مش شايف بعد ٢٠ متر عدل اصلا ولا اي نيلة .. لحد ما ادركت في شهر يناير اني كدا هغرق وقولت خطتي هعمل ايه وهسيب دروس ايه واخدها اونلاين وخلاص عشان الحق المها وهاخد درس ايه اوفلاين عشان لو معملتش الخطة دي هقع وش

و سبحان الله نفس الرد برضو .. بطل تنظير و امشي زي ما الناس ماشية ومش هتعمل العبط دا .. يا جدعان كدا هلبس في حيطة .. احنا عارفين مصلحتك وانت بس بطل لعب ومرقعة واسترجل وهتنجح عادي

وفي الاخر بعد ما حرقت نفسي وخارج من ثانوي ٥١ كيلو حرفيا ولا كأني مدمن مخدرات .. عشان جبت مجموع زبالة معرفش ازاي مع ان كل حاجة كانت بتقول هجيب مجموع معين تاني .. بس ما علينا

انا اللي طلعت مسرح وشيلت كل الليلة في الاخر

حرفياً كله داس على وشي في العيلة وقرايبنا وكل حد حرفياً .. هل فيه حد من اللي المفروض عيلتي وقف قصاد دا .. لا

كلهم داسو عليا وكملو عادي وبعدها بيتعاملو معايا ان انا عدوى .. متفتحش بوقك مع اخوك الصغير وتحاول تساعده في حاجة عايزه يبقى زيك يا فاشل

ولا جملة ذاكر عشان متبقاش زيه وهي بتتقال في وشي

وبعدها يتعاملو معايا اني عليا دين لازم اسدده واتفوق في الجامعة عشان اعوضهم

الحاجة الوحيدة اللي منعاني عن اني افتح بوقي وربنا ان انا لو فتحته مش هرحم حد بعد دا كله لأني لسه فاكره لحد النهاردا من كتر الصدمة والخذلان اللي الواحد حس بيهم .. قبلها كنت الاخ الكبير اللي بيحاول يحل مشاكل اخواته وبيفكر فيهم كلهم قبل ما يفكر في نفسه

لكن .. العيلة دي متستاهلش الا واحد اناني

متستاهلش اني احاول اساعدهم تاني او افكر فيهم

كل اللي اقدر اعمله اني بعد ما اتخرج ابعد نفسي عنهم لأقصى درجة عشان منفجرش في حد بطريقة غلط هتخلينا عمرنا مانبقى زي الأول تاني

هما احسن منغيري عامةً .. انا اللي غريب عليهم ق عادي مش هفرق في حاجة لو بعدت

كدا مفيش صحاب .. كدا مفيش عيلة .. بس فيه حب .. حب نادر من نوع خاص

نتالي .. الوحيدة اللي حاولت متخسرنيش عالأقل

حرفيا الدنيا كانت بتختفي حولينا لما اكلمها وابص في عنيها وهي بتكلمني .. وكان اول مرة احس ان فيه حد عايز اعيش عشانه كان اليوم اللي سألتها فيه عن اسمها وضحكت وانا بهزر معاها

لكن لأن السبيشيل ون لازم ياخد قصة سبيشيل

ما اتحطش في فريند زون او شخص عادي او اي زون عادية ..

اتحط في خانة ارهابي القلوب زون

ليمون هو الفتنة اللي ممكن توقع نتالي لانها بتحبه وهو بيحبها ومهتم بتفاصيلها.. وهي كمان مهتمة بتفاصيله وعارفة عنه حاجة خليتها تتقلب ١٨٠ درجة من نفسها وتفتح الموضوع تاني وتتكلم وهي متأكدة اني بحبها اكتر من اي حد

الفتنة اللي تخليهم هما الاتنين بينهم نهر وكل واحد واقف على ضفة اخره يشوف التاني بس .. و المجنون فيهم اللي ينط في النهر عشان يوصل للتاني .. ولما يوصل يا ترى هيشد التاني معاه لمملكته ولا هيروح هو لمملكتها

القصة مكنش ينفع فيها مشاعر من الاول لأنها خسرانة للطرفين من الأول وكلنا عارفين

بس الفكرة .. انا بحبها برضو وانا شايفها عايشة ومبسوطة و عارف انها بتحبني

اه قلبي هيحرقني عليها وهي مع واحد غيري بس .. مش عارف والله مش هكدب على نفسي

انا نفسي تبقى ليا انا .. نفسي تبقى معايا في الجنة

نتالي هي الوحيدة اللي نفسي اموت في حضنها عشان هي الوحيدة اللي حاسس اني عايش وحياتي ليها طعم معاها

نفسي بجد اخر لحظة ليا اكون في حضنها وعيني في عنيها وتعيط عليا وانا بنزف ودمي على هدومها

هحضنها جامد .. هركز في عنيها .. هشم ريحتها .. هفتكر كل تفاصيلها وانا بموت .. لو مش هعيش منغيرها عالاقل تكمل معايا لاخر لحظة وخلاص

دي اكتر حد بجد حسيت اني عبدالرحمن بجد وانا قدامها

بس هنعمل ايه هي الدنيا كدا

عامةً نتالي هتبقى ريحتها مسكرة وفيها شوية قرفة وياسمين .. دا اللي في خيالي بصراحة 😅❤️

نتالي لو بتقرأي الكلام دا .. فأنا بحبك اكتر من اي حد بجد .. ربنا يباركلك في عمرك وتدخلي معايا الجنة انتي وعيلتك❤️❤️

99 احتمال وسيناريو مختلف .. مجنونة .. بتلعب بيا .. مهتمة .. عندها فضول .. بتكرهني .. بتغيير مني .. شايفاني منافس .. بتحسن صورتها قدام صحباتها عن طريقي ..

حرفيا كل السيناريوهات المختلفة حطيتها قدامي الا سيناريو و احتمال واحد استبعدته .. وارد يكون حقيقي لكن هو اخر حاجة هفكر فيها

من اول مرة شوفتها فيها وهي عمرها ما كانت شبه الباقي

فاكر اني شوفتها في اكتوبر 2024 الشارع وقولت بالحرف "لول دي شبه البنت اللي غرقت في بريدج اوف تيرابيثيا 😅" و مشيت .. بس وقتها كانت مألوفة ليا كأني عارفها من زمان

كان اول تيرم ليها وعمري ما شوفتها قبل كدا غالباً ف ليه حاسس اني عارفها او شوفتها في مكان تاني .. الا لو انا الولد اللي مغرقش في بريدج او تيرابيثيا مثلاً

طول عمرها كانت عسلية ولطيفة وخفيفة ومختلفة عن اي حد تاني شوفته في حياتي

الشهر دا هو اللي بدأت فيه القصة كلها .. كل يوم نروح في نفس الباص الصبح و نرجع في نفس الباص بعد الضهر .. طول الشهر كدا حرفياً

هي كانت فاكراني ستوكر مجنون غالباً .. وانا كنت فاكرها جثة اتقتلت في الباص وطالعالي اجيب حقها او هتدمر حياتي كلها .. او هي عضو في الماسونية وبتحاول توقعني وانضملهم مثلاً (اقل باك ستوري بعملها لحد معرفش عنه حاجة لسه)

من وقتها والقصة بدأت وكملت بالعبث اللي بعد كدا كله

طول عمرها كانت عسل و محترمة وجميلة و قصيرة وشبه شخصيات الكرتون لما بتمشي بسرعة بصراحة .. كأن رجلها وايدها بيتحولو لدواير زي الانمي 😅😅 .. بس مع الوقت طلعت هي احلى واحدة بالنسبالي بجد

مع تطور القصة وتفاصيلها المختلفه .. حلوها بمرها بكل حاجة .. كل اللي قابلتهم قالولي نفس الرد

هي عمرها ما حبتك .. انت عايش في الوهم .. هي بتلعب بيك .. الحوار كله في دماغك بس .. هي بنت عادية وانت اللي مجنون بس

الفكرة ماشي ممكن ابقى مجنون شوية .. بس انا مش غبي او موهوم خاصةً في جزئية الذكاء الاجتماعي والتعامل مع البشر .. دي حتتي حرفياً ف ازاي اقع فيها بالسهولة دي

من اول اسبوع شوفت فيه ناتو ومنغير ما اعرف عنها اسمها حتى .. انا قولت ان شكلها لطيفة وهادية بس دماغها فيها ماتور ١٢ سلندر شغال ٢٤ ساعة ولو خططت تدمر حد تعرف تعمل دا بسهولة .. وقولت عليها رغم انها في مبنى هندسة الا انها بتحب الادب بشكل عام والقراءة او الكتابة جزء من شخصيتها

انا مش شيرلوك هولمز بس المجنون مش هيعرف هيخبي جنانه على مجنون شبهه .. وهي كانت شبهي .. ومع الوقت بكتشف انها اقرب حد ليا وشبهي في حاجات كتير جداً

لكن كل مرة بتعامل معاها واقرب شوية .. هي بتبعدني عنها بطريقة غريبة

لو كنت مجرد شخص بالنسبالها ليه هتبعدني بالطريقة اللي عملتها اول مرة وتعدي الشارع مع واحد تاني قدامي و تقعد تهرب مني بعدها

ليه هتتعامل معايا اني مختلف عن اي حد في الباص او الجامعة طول الوقت

ليه لما اكلمها واشرحلها الموقف كله واعرض عليها نتعامل عادي .. تهرب برضو بعدها رغم انها كانت لطيفة ومتفهمة في الشات

ليه لما اقفل الموضوع وابعد نفسي واستنى منها بلوك عادي بس .. تبعتلي رسالة عبيطة تقول اني مجرد شخص ومتعرفش اسمي والكلام دا في دماغي بس والعبط الطفولي دا .. ليه مبلكتش بس وتكون هي اللي كسبت .. ودا العادي والمتوقع عامةً مش اللي هي عملته

وليه بعدها لما القصة تتقفل خالص ترجع هي تعمل معايا Eye Contact وتفتح القصة تاني وتقرب وهي صافية تجاهي خالص ولا كأني عملت حاجة

ليه تنزل تقف في الشارع و متتهربش المرادي كأنها مستنياني وواثقة من نفسها وواثقة فيا اكتر من اي وقت قبل كدا

ليه لما اكلمها تقولي اظن مفيش اوضح من كدا .. هي شالت الجملة اللي قولتها من ٦ شهور في قلبها كل دا

ليه لما لعبت الكرت بتاعي و كان واضح اوي يعني .. تقبله هي ونتقابل فعلاً ونتكلم سوا

كل الأسئلة دي وقعت في اللحظة اللي اتكلمت معاها وعيني جت في عنيها

انا مش فاكر انا كلمتها قد ايه بصراحة بس اللي فاكره ان العالم كله اختفى وقتها بالنسبالي

مش فاكر اسألتها ليا بس فاكر قد ايه انا كنت طفل وعايز اخليها تبقى فخورة بيا ومقدرتش اسيطر عالطفل دا قدامها

فاكر نظرتها ليا اللي كل شوية كنت بحاول اطول في الكلام معاها عشان تبصلي ونكمل وقت اطول كدا

فاكر ابتسامتها ليا وهزاري معاها وكل حاجة

انا دا اجمل وقت عدى عليا من 2020 مثلاً

بس اكتر لقطة خدت بالي منها لما خلصنا كلام و كانت هتسلم عليا واترددت ف سحبت ايدها و عملت سلام من بعيد بس

اللحظة دي افتكرت اهم تفصيلة في القصة .. فرق الدين بيننا

هي مسيحية و انا مسلم .. وهنا اكتر حاجة رايقة في القصة دي كلها

لو كنت شخص عادي كان التعامل معايا هيبقى عادي من اول يوم .. ممكن اتحط فريند زوون عادي .. ممكن ابقى الزميل اللي من كلية بيزنس مثلاً .. ممكن كانت تصدني ببرود مثلاً .. ممكن كانت تتجاهلني بس .. اصل ليه هتخسرني اصلاً وانا شخص عادي حتى لو بتكرهني مثلاً

لكن ماذا لو قصتي هي قصتها برضو

ماذا لو هي برضو بتحبني .. بس خايفة تقع فبتهرب وتبعد .. اذا كنت انا ليمون اللي مش فارق معاه حد في الدنيا وكله شبه بعضه وبعرف اتحكم في المشاعر وقعت قدامها ووقعت في حبها اكتر من اي حد تاني .. دا وانا مصنف نفسي اني بعرف اكنترول نفسي .. مابالك ب استاذة ناتو

ماذا لو كنت انا جراي على ارض الواقع مثلاً

الاحتمال الوحيد اللي يخوف وكنت بحاول انكره من أول يوم .. انها بتحبني

حالياً مفيش احتمال او سيناريو تاني اقدر اقوله غيره

حاجة نفسي فيها من الأول .. و في نفس الوقت نفسي متحصلش من الأول

لو هي كدا ف هي هتتعامل معايا ان انا الفتنة اللي ربنا بيختبر ايمانها بيها .. او ان انا الفتنة اللي لازم تغلبيها

بنوتة مسيحية جالها شاب مسلم شبهها واهتم بيها وبتفاصيلها وقرأها من Head to Toe زي ما كانت عايزة .. و هي حبته لدرجة انها مش عارفة تتعامل معاه كشخص عادي

النتيجة ايه؟ .. هتبيع اخرتها عشان شيطان زيي مصيره النار وهيشدها معاه؟ .. هتقف قدام عيلتها تقولهم انا بحب مسلم؟ .. هتسيب الخلاص الأبدي عشاني انا مثلاً؟ .. اكيد لا

اروق حاجة ان فرصة اننا نبدأ فتنة طائفية في مدينتنا اكبر من فرصة اننا نكوّن اسرة سعيدة 😅

مش بغلط ناتو .. انا كمان في نفس الموقف بس مش بظروفها هي اكيد .. هي موقفها اصعب وفاهمها ولو كنت مكانها كنت قفلت باب ليمون دا من اول يوم زي ما عملت بصراحة

بس عندي انا برضو نفس التفصيلة .. بتحب مسيحية .. هل هتتجوزها؟ .. ولادكو هيروحو الجامع ولا الكنيسة على كدا؟ .. هتخلفوا حسن ومرقص على كدا؟

اكتر واحدة شبهك وبتحبها مسيحية ف مينفعش توصلها او تبدأ معاها حاجة .. هتعمل ايه؟

دا بالنسبالك مش فتنة واختبار من ربنا برضو؟

هنا يكمن معنى القصة كلها

احنا الاتنين شايفين بعض ملايكة في عين بعض .. وفي نفس اللحظة شايفين بعض شياطين ممكن تسحب الطرف التاني للنار .. وهنا المعنى اللي في القصة .. مش كل حاجة بتحبها وبتحبك ينفع تكسبها

مع ذلك .. انا بحبها اكتر من اي حد في الدنيا برضو

هي الوحيدة اللي اتكتبت في قدري انها تخليني احسن وانا بحب نفسي و مش بكرها وعايز اغيرها عشان بكرهها

انا حبيت نفسي وانا واقع في حبها وبحاول عشان اخليها احسن ومحدش يأذيها رغم ان الكل كان بيقول عليا مجنون وغبي

انا حبيت نفسي وهي بصالي من وسط 50 واحد في الباص وقربتني منها تاني قبل ما اتخرج

انا حبتني وانا بتكلم معاها ومتوتر (قولوني العصبي اتدمر بعدها يومين بس فداها عادي) وبحاول اطول الكلام عشان ابص في عنيها اكتر

حبيت نظرتها ليا وازاي انها واقفة ثابتة تتكلم كأنها تمثال بس عنيها بتقول كل حاجة جواها وابتسامتها بتأكد عليها .. خاصةً لنا قولتلها ملقتش احسن منك وابتسمتلي .. كان نفسي احضنها بعد اللقطة دي والعالم ينتهي خلاص

انا حبيتها .. والمرادي فهمتها وحبيتها اكتر من اي وقت قبل كدا

نفسي بنتي تطلع شبهها في كل تفاصيلها ❤️❤️

نفسي متتجرحش بسببي او بسبب القصة دي .. مش عايزها تنساني .. بس مش عايز ابقى عقدة ذنب في قلبها .. عايزها لما تشوفني تبتسم بس

نتالي .. انا بحبك ❤️❤️

مينفعش احب نتالي .. بس انا هحب نتالي ومش هقول

المهم في قلب نتالي .. بن ليمون يختلف عن الآخرون

حتى لو مش دا السيناريو الحقيقي .. المرادي هشتري الوهم ومش عايز اعرف الحقيقة لانها مبقتش مهمة أخيراً.. بس انا متأكد انها بتحبني

اخيراً انا طلعت Loveable مع حد بحبه

ربنا يكتبلنا احنا الاتنين اللي فيه الخير لينا ويدخلنا الجنة سوا .. دا كل اللي عايزه معاها بس

انا بحبها .. اكتر من اي حد في الدنيا .. وبحب اني بحبها .. بس كدا

انا واحد بيتغير لأنه بيقعد مع نفسه كل فترة.. ويقتل النسخة القديمة منه لأنها معدش ليها لازمة في الظروف الجديدة ف لازم الشخصية دي تنتهي نهائي من الوجود وتاخد مكانها نسخة جديدة احسن

-هكذا يقتل ليمون نفسه كل فترة -

انا خايف من عنيها .. انا بقيت خايف اتعامل معاها اكتر من اي مرة قبل كدا

مش خايف من رد فعلها او انها تجرحني او منها شخصياً او من حاجة هي عارفاها عني مثلاً

انا خايف اتعامل بحب مع حد بيحبني .. لأول مرة

حاسس ان انا كاتم جوايا مشاعر كتير مش قادر اتحكم فيها قدامها لو اتكلمت .. انا خايف اعك الدنيا اكتر ف ابان مدلوق اوي او ابان كارف اوي ف اخسرها

خايف لان انا عمري ما عبرت عن مشاعري لحد بجد او حسيت ان انا محتاج الشخص دا ف حياتي قد ما عملت معاها

خايف منها لان هي اللي كسرت الواقع ومن ساعت ما ظهرت هي بس اللي اللي منورة عن الباقي

خايف لان انا مش قادر اتحكم فيا انا وهي موجودة

انا خايف من ان الطفل الغبي الضعيف اللي جوايا اللي كان بيحط امل في الناس ويستنى ان حد يقف معاه او يحبه بعد ما يحصله حاجة يظهر تاني بسببها

انا كدا عايش وعارف اعيش كويس .. لا حد عنده حاجة عندي ولا انا ليا حاجة عند حد .. كدا الدنيا امان وكويسة

هي لو دخلت حياتي فعلا هتعمل فيا ايه .. هبقى بحط امل في حد انا بحبه وهستناه يقف جنبي

هغير عليها تاني وقلبي يحرقني عليها

هرجع تاني افكر انا كدا عاجبها ولا لا وهل هي هتحبني او لا

هتستنى مني اعبرلها عن مشاعري واتكلم وانا عمري ما عملت كدا مع اي حد اصلا ولازم الف الموضوع في قصة عشان اطلعه من دماغي بس

هل لو دي في حياتي وفشلت ف حاجة قدامها هعرف ابص في عنيها واقولها انا فشلت عادي زي ما بقولها لنفسي وانا لوحدي

انا خايف و عايز حد يقتلني بس

انا بقيت شخصية جامدة في الشغل والتخطيط والتنفيذ بشكل عام

لكن ك بني ادم بيتعامل مع بني ادمين .. بقيت شخصية حقيرة حرفياً .. بتعامل مع كل الناس انهم شخصيات بس هتعامل معاهم كأني ف لعبة من كتر ما هما بيتبدلو قدامي .. مش عايز منهم مصلحة او حاجة بس مش عايز ابقى لوحدي او احس اني منطوي ف عارف اعمل ايه عشان اكسب ناس جديدة

لو عايز اقتل النسخة دي مني هعملها ازاي لوحدي؟

لو قولنا ان النسخة دي اتعودت عالوحدة والشغل ف عشان تتقتل وتطلع شخصية جديدة .. لازم حد تاني هو اللي يقتلني ونطلع سوا النسخة الجديدة

و دا اللي راعبني

هبني نسخة جديدة مني بأيد حد تاني .. لو الحد دا مش قد المهمة دي .. هيدمرني

دا اللي مخليني خايف منها

واحدة بتتعامل بلطافة وعنيها بتقول انها بتحبني

لسه مبلكاني من كذا مكان لحد دلوقتي كاني متحرش وبتأمن نفسها مني بكدا

كل اللي حكيتله عليها عشان احل مشاكلنا ومخسرهاش قالي ابعد عنها و سيبها

وانا لسبب ما مصر انها ليا ومش هخسرها و مراهن عليها قدام اي حد

لو هي بتحبني .. انا هخليها ليا لو وقفت قدام مين في الدنيا .. هي هتبقى قدري ومكتوبالي انا ومحدش هيحبها اكتر مني او هيعملها اللي انا هعمله

لو مبتحبنيش .. ف عادي انا كل اللي كنت عايزه اني ابقى واحد عادي بتسلم عليه بس ومبتخافش منه وتقدر تبص في عنيه

هي بالنسبالي انا لو كنت اصفى واحسن والدنيا مداستش عليا .. هي احسن مني و اطيب مني ومحترمة اكتر مني كأنها نازلة من الجنة علطول لكن هي نسخة مني بتفكيرها وتخطيطها ولعبها وجروحها وشخصيتها والبوكر فيس اللي بتلبسه عشان تداري مشاعرها وتتحكم في نفسها بخوفها ان حد يكون كاشفها .. بعمق مشاعرها ونظرتها للدنيا

هي العكس ليا كبني ادمة .. لكن هي نسخة مني كشخصية

عشان كدا قادر اشوفها منغير اقنعة .. قادر افهمها من عنيها .. بحب اسمع صوتها وهي مبسوطة وبتتكلم مع صحابها .. مبعرفش اشيل عيني من عليها وهي قدامي .. بستنى اللحظة اللي اقدر اكلمها فيها عشان تكلمني بس واحس اني ف حياتها

انا بحبها لأن هي في كفة و الدنيا في كفة

مش عايز اهرب من نفسي واقعد اكدب واقول مبحبهاش .. انا واقع .. هي عارفة ان انا واقع .. اي حد شافني وانا بتكلم عنها عارف اني واقع .. الدنيا كلها عارفة اني واقع

انا والله ما عارف اعمل بس

انا نفسي انها تنام على كتفي وهي مرتاحة وحاسة انها متطمنة وحاسة بالأمان بس .. وتكون بتحبني

بس حالياً انا مشاعري مخلياني مش عارف افكر كويس واي حركة هتبقى غبية

انك تلعب لعبة لوحدك لمدة عشرين سنة كاملة هتخليك راجل جامد ومجنون في نفس الوقت لان ليه اهتم لشخصية في لعبة كدا كدا ليها سكريبت واستراتيجية معروفة كل اللي هتعمله انك تخطط ازاي تتعامل معاها و تتعامل و بس كدا .. بقت مرحلة وخلصت وكل ما هتتعامل معاه هتعيد الخطة وهيبقى الحوار ممل مع الوقت ف اهتم ليه منا عارف النتيجة من الاول؟

ك لاعب في اللعبة دي انا مش مهتم مين يحبني و مين يقولي انت جامد و مين يكرهني و مين يتمنى اني اموت .. انا اللاعب وعارف اقدر اعمل ايه واطور نفسي ازاي و امتى اكون فاشل او ناجح في اللعبة دي .. اي معلومة عني هاخدها من حد في اللعبة هتبقى مش كاملة ف مينفعش ابقى غبي واسلم ودني لأي حد

دي هي اللعبة الوحيدة اللي اعرف العبها .. منغير مشاعر .. Just for Fun .. بحاول احط مهمات صعبة وابقى جامد واخلصها بحيث اعرف انا جامد قد ايه .. بحاول مأذيش حد .. دا كل اللي يقدر يعمله وقدام بقيت الشخصيات هو مجنون و غريب و معاق نفسياً لما الحوار يتطلب مشاعر

يوماً ما قابل شخصية مقدرش يحدد استراتيجيتها او يحطلها خطة .. ففضلت معلقة في دماغة لحد دلوقتي .. انا مش عارف هي جزء من اللعبة ولا دي لاعب حقيقي تاني واللعبة طلعت Multiplayer ولا ايه

هي عدت معايا ب ٣ مراحل و قدرت العب بشكل احترافي فيهم وكانت اللعبة ف ايدي وملتزم بالخطة والدنيا تمام

----------------------------------------------

مرحلة الاستكشاف: كنت عايز انهي الفضول واعرف هي مين وليه انا شايفها اكتر من اي حد و مشدودلها ليه اوي كدا .. قدرت العب وافهم هي ليه مميزة لكن هي انسحبت من المرحلة ف بعدت عنها

مرحلة الإنعزال: هي قررت تحطني في خانة مهينة ليا او انا مفهمتهاش لكن قررت ابعد عشان مينفعش اقرب .. كدا كدا هي اللي كانت متحكمة في المرحلة

مرحلة الجنون: هي مخرجتنيش من المرحلة اللي فاتت فقررت ابدأ انا مرحلة جديدة .. اياً كانت اسبابها ايه قبل كدا مش مهم .. المهم انها ف خطر دلوقتي و لازم انهي الخطر لكن انا معنديش فرصة اتكلم .. اوكي همشي بمبدأ Show Dont Tell وهدخلها معايا ف لعبة جانبية ممكن تكرهني فيها .. انا "الستوكر المجنون" اللي بيكشف كل ثغراتها عشان تقفلها ومحدش يقدر يأذيها بأي شكل فعلاً .. عملت معاها White Hat Hacking بمعنى اصح ولما خلصت كل كروتي شرحتلها كل اللي عملته عشان متخافش مني و عشان تكرهني بمعنى اصح و حصل نوعاً ما

المفروض اللعبة اللي بينا خلصت لحد هنا وبقينا بنبص لبعض بقرف وخلاص والدنيا تمام

لحد ما هي اتقلبت ١٨٠ درجة منغير ما اعمل حاجة .. هي اللي اتغيرت من نفسها .. 100% عرفت حاجة عني خليتها واثقة لدرجة انها تبدأ مرحلة جديدة

هل هي بتحبني؟ .. هل هي كانت بتحبني من الأول اصلاً؟ .. يمكن عشان كدا كانت بتهرب وترجعني لقصتها كل ما اخرج منها في كل مرة؟

الاسئلة دي تحديداً انا هبقى مرعوب لو سمعت اجابتها .. لو مبتحبنيش ف دا العادي ومش هخاف من دا .. مش عايز كدا اكيد بس اقدر اتعامل مع دا

لكن لو بتحبني .. قمة الرعب بالنسبالي

انا بحبها .. بحبها اكتر من اي حد في اللعبة كلها لأنها هي الوحيدة اللي مختلفة .. ولو شبه الباقي ف هي مختلفة في عيني انا عن الكل وبحب كل تفاصيلها بصراحة

لكن .. انا عمري ما حبيت حد قبل كدا للدرجة دي .. كل اللي اتعاملت معاه قبل كدا كان اعجاب بدرجات مختلفة مع كذا حد .. لكن لما اقرر اشيله من دماغي كنت بفتكر ان انا بطل قصتي وهو مجرد شخصية وفيه شبهه كتير و هو فيه عيوب ف عادي اقدر اتخطاه ومفكرش فيه

لكن هي حالة مختلفة .. هي لاعب حقيقي مش مجرد شخصية .. هي بطلة مشاركة في القصة وهي اللي بتألف مسارها بنفسها ف مش عارف اتعامل معاها زي الباقي .. و هنا المعضلة

ماذا لو هي قررت تبدأ المرحلة الرابعة .. مرحلة الحب

ماذا لو هي طلعت طول الوقت بتحبني و قررت تقرب مني عشان نبقى مع بعض ويبقى فيه مشاعر رايحة جاية .. انا هعمل ايه؟

حرفياً دا الاحتمال الوحيد اللي استبعدته طول الوقت .. وكل احتمال غيره طلع غلط

هي بتكرهني .. هي بتلعب بيا لمصلحتها .. هي وخداني ريباوند .. هي عايزة مني مصلحة مثلاً .. اي حاجة عشان احاول انساها لكن كل الاحتمالات دي على ارض الواقع بتتبخر

انا مش عبيط عشان امشي ورا افتراض زي دا .. هي مبتحبنيش لحد ما تعترفلي بكدا .. دا المبدأ عندي عادي .. لكن انا مش غبي برضو اني افترض انها مبتحبنيش 100% واتعامل بكدا يعني

انا خايف ..

خايف انها تحب حد تاني ميكونش انا

و خايف انها تحبني .. لأني بحبها انا كمان و معرفش لو بحب حد وهو بيحبني المفروض اعمل ايه واديله مشاعر ازاي وانا معاق نفسياً وغبي كدا

وبعدين هي حبت فيا ايه اصلاً .. ما لو كان فيه حاجة تتحب كنت شوفتها او خدت بالي منها يعني

والله ما عارف المفروض اعمل ايه بصراحة لو هي بدأت المرحلة دي فعلاً

انا نفسي اعترفلها اني بحبها ف تاخدني بالحضن وتضربني بسكينة في جنبي بحيث اخلص من المعضلة دي .. اخد الحب و مدخلش في حواراته😅

عامةً عندي استراتيجية رايقة لو حاسس اني هتكشف خلاص .. اخدها بالحضن ف متعرفش تشوف وشي وافضل جامد .. الاستراتيجية دي متنفعش مع البوس

الحمدلله انها مش هتطلب بوسة عامةً😅😅

Dear N ..

انا بحبك اكتر من اي حد وهفضل احبك و عمري ما هقول .. لحد ما تستخرجي المعلومة دي مني .. غير كدا انا رجل تلج ومش هدوب تحت اي ظرف

معرفش ايه اللي حصلها وغيرها 180 درجة في اقل من شهر .. المفروض انها كانت كرهاني وبنتجنب بعض بكل الطرق .. فجأة بقت عينيها هادية لما تيجي عليا عادي .. وفجأة بعدها تعمل معا Eye Contact في الباص الزحمة في يوم مليان مشاكل .. وقتها فجأة كل دا يتبخر عشان عينين حلوين وابتسامة هادية كانو متوجهين عليا انا مخصوص كأني انا اللي بهرب في لعبتها المرادي؟!

مش فاهم انا ليه وقتها بعد اللقطة دي حسيت اني بقيت مرتاح ومش شايل هم و مبسوط بشكل مش طبيعي .. انا المفروض كنت تخطيتها ((كداب وربنا)) والدنيا بقت عادي من غيرها خلاص .. فجأة اكتشف اني طلعت لسه شايل هم انها بتكرهني او لا؟!

هي ليه عملت كدا .. في يوم 14 4 عامةً😅 (الحوار دا بقى يخوف نوعاً ما)

بعدها ب اسبوع اخيراً قدرت اكلمها..

هي الطف واجمل حد ممكن اكون كلمته في حياتي تقريباً

ضحكتها .. طريقة كلامها .. عفويتها وهي بتتحرك مع الكلام .. عنيها .. كانت بتتكلم زي اليوم اللي سألتها فيه عن اسمها بالظبط من اكتر من سنة تقريباً وكان احلى يوم عدى علينا تقريباً

هي وقفت وواجهتني .. على ارض الواقع و عينها ف عيني عادي .. مخافتش مني ولا كانت متوترة .. انا مبقتش الوحش الستوكر اللي بيجري وراها خلاص .. صفحة و هي قفلتها المرادي .. هي اللي كسبت بمجهودها منغير ما احاول انا اساعدها حتى .. هي كانت واقفة مستنياني تقريباً عشان تكسب المرادي

انا كنت فخور بيها بطريقة مش طبيعية وقتها .. وكان نفسي اعزمها على عصير (ليمون اكيد)

بس مكنش ينفع اعتقد 😅

ناتو الطفلة الطيبة اللطيفة اللي كأنها متربية في الجنة ونازلة على الأرض .. بقت بتواجه مشاكلها بدل ما تهرب منها اخيراً وهي لسة بشخصيتها الملائكية زي ما هي

قصتي معاها بدأت من اللحظة اللي نزلت فيها من الباص وعينها جت في عيني و كان باين انها متوقعة مني حاجة .. وقتها انا اتوترت!! .. انا اللي ماشي بمبدأ No Risk No Fun ومفيش حد فارقلي حرفياً .. انا اتوتر كأن فيه خمس قناصين موجهين الليزر عليا .. عشان كتكوتة زي دي بصتلي في عيني وابتسمت

انا حرفياً اول مرة اعرف ان الاوبشن دا موجود عندي

انا طلع عندي مشاعر وممكن احب حد اصلا

وقتها قولت عادي هي عسلية بس .. انا اكيد معجب بيها بس .. بس المغفل مخدش باله ان الجامعة مليانة بالعسليات وهو مركز معاها هي بس

من وقتها والقصة مشيت بالشكل دا لحد ما وصلنا لهنا

معرفش ليه من بداية القصة دي وهي حاطة عليا سبوت و كأن مفيش غيري في الباص .. حتى وهي بتبعدني عنها برضو بتهرب مني انا تحديداً مع اني عملت موقف عادي وخلاص

كان رأي الكل اني اكرف و اشوف غيرها .. منطقي

بس انا مش عارف اعمل كدا .. مفيش غيرها في عيني .. كل يوم ببقى نفسي تركب معايا في الباص عشان اتطمن عليها معرفش ليه .. كل مرة كانت تعدي قدامي في الجامعة و مبسوطة مع صحباتها كنت ببقى مبسوط معرفش ليه .. كل مرة كانت بتعمل موقف معايا انا تحديداً ببقي مبسوط اني جزء من قصتها .. حتى لو انا الشرير او المجنون اياً يكن بس انا في قصتها

وبعد ما لقيتها ممكن تتضر بسبب كذا نقطة هي مش شايفاهم .. قررت اساعدها واديها الأبديت اللي يحل مشاكلها

لو بس كانت ادتني فرصة اشرح

لكنها مدتنيش الفرصة .. ودا مش هيعطلني عن الهدف الأساسي .. احميها من نفسها و اي حد

هي تقدر تدمر نفسها وتلف في دماغها مع ان الواقع عادي ومش زي اللي في دماغها .. هي كانت هتفضل تهرب ومش هتواجه مع ان المشكلة بسيطة جداً

لذلك لعبت عليها لعبة اكشف بيها ثغراتها قدامها بحيث تقدر تطور نفسها وتبقى في امان اكتر .. و نجحت في الاخر .. حالياً صعب ان حد يأذيها

والله معرف ان كانت هي شيفاني عادي ولا معجبة ولا بتحبني او انا بالنسبالها ايه .. بس مش دا المهم

طول ما هي مبسوطة في حياتها وعايشة في امان و مش خايفة دا اللي يهمني .. مش مطلوب مني اظهرلها حبي ليها والعبث دا .. انا كل دوري اني احميها واتأكدا انها احسن من زمان .. This is my love language

بصراحة .. انا نفسي تكون بتحبني بجنون وبتفكر فيا كل يوم و اكون بطلع في احلامها .. نفسي تعدي باللي عديت بيه .. بس مش لدرجة تأذيها يعني .. عايزها تكون بتحبني بنفس القدر اللي بحبها بيه

انا بحبها بجد .. مش معجب بس .. مش شايفها لطيفة وخلاص .. لا دا اسمه حب بجد

انا عرفت اخيراً اني عندي مشاعر بتتحرك وممكن اقع واحب بجد بسبب عينها وابتسامتها

انا بحبها اكتر من اي حد .. ومعرفش ليه .. كل اللي اعرفه ان كل الناس في كفة و هي لوحدها في قلبي معاها عقد rent-free .. معرفش ليه هي كدا بس انا بحبها و حابب اني واقع في حبها كدا ❤️❤️

(نفسي هي تكون زيي كدا برضو بصراحة)

"يوماً ما عيني هتيجي في عينها وهخطفها في حضني ومش هسيبها لحد ما تتأكد بنفسها ان نبضها هو اللي بيشغل قلبي"

انا عمري ما هضيع فرصة بعد كدا في اني اخليها من نصيبي انا مهما حصل .. هي دي اللي عايز اواجه الدنيا واي حد عشانها وهبقى مبسوط وانا بعمل كدا

انا بحبها .. وبحب كل تفاصيلها ❤️❤️