Amal's Stuff

خايفة اوي ورمضان جاي علينا مش عارفه ازاي هبقي وسط العيلة كلهم اول يوم وانت لوحدك .. بعمل كل حاجة متعودين عليها عشان البنات بس ولا احساس كنا بنحسه موجود .. اتفقنا نعلق زينة رمضان بكرة بس هيبقي ناقصنا فرحتنا لما كنت بتخلص وتنورها كلها .. مكنتش هي اللي بتنور وتفرحنا والله كان انت ..

كل حاجة اصعب كتير اوي اوي مما كنت متخيلة

انا طول الوقت مببقاش مدركة اني بمر بوقت صعب بس بعرف اني مضغوطة من عصبيتي وتعبي وتوتري وقرقضة ضوافري

يمكن دي من المرات المعدودة اللي ابقي بهدي نفسي فيها اني مش بدلع واني بجد شايلة كتير فوق طاقة احتمالي وقدرتي

ايام قليلة اوي اوي اللي عدت من غير عياط وتعب .. ايام قليلة اوي اللي عرفت انام فيها وارتاح

دا خامس خميس كان يعدي علينا من وقتها بقت حاسة اني يوم الخميس ف حد ذاته بقي صعب عليا اوي

مجرد ما بصحي وبشوفه ف الكالندر برجع ليوم سفره كانه لسه ماشي حالا وسايبني

كل الاغاني اللي كنت بدندنها وبنغني معاها بقت دلوقتي بتفكرني بيه وانه مش جمبي

عياط كتير اوي اوي .. شهر كامل وانا لوحدي انا والبنات من غير لا اهل ولا قرايب

شهر ضغط وامتحانات ومدارس وبطولات وتعب واصابات ولف علي دكاترة ومستشفيات وعلي بتوع الخضار والسوبرماركتس والمحلات والسواقة اللي طول الليل والنهار

يمكن كمان يكون دي من المرات اللي يتجلي فيها ف بالي انه اطلع من دايرة خوفي وافكاري وزعلي وابص للي المفروض اديه ف الوقت دا والمفروض اعمله جملة " لازم انتي تبقي هادية عشان تعرفي تهدي ولادك" فينور ف بالي انه ايوة مش هينفع اسيب نفسي للي حساه عشانهم واني لو سبت نفسي انهار واعيط وادبدب ف الارض فمش هيبقي ليهم فرصة غير انهم يدبدبوا هما كمان.

" لو بس نعدي الليلة ونعرف نطلع منها سُلام ..