wos ma über mi wissn soit:
I bin a mensch der immer zfü nochdenkt, i verbring so fü zeit mit analysieren, interpretieren und philosophieren, des is neama normal. Es is immer a ewige diskussion in mir drin zwischen dem teil von mir, der immer olles und jeden in frage stöht, immer an sinn und a “wieso eigentlich” hom wü und der sochn ned oafoch so lossn ko wies san, und dem teil von mir der glücklich und zufrieden und lebensfroh sei mecht und sochn oafoch akzeptiert.
I hob ned fü leit de ma wirklich wichtig san- oba i lieb, lieb, lieb, lieb und lieb und lieb; wenni lieb, lieb i. I lieb von gonzem herzen und i lieb ehrlich. I gib olles für menschen de i lieb, i stöh mi nie an erste stöh. Wenn i moi lieb, erfüllt mi des von unten bis oben, von rechts bis links und von hinten bis vuan und es losst mi ned so schnö aus. I bin prinzipiell vadommt ehrlich, monchmoi zfü. Oba immerhin bini ehrlich und i sog wos i denk (wenns wen ondan betrifft..)
Über meine Probleme redi ned mid fü, und i hob enorm long braucht bis i glernt hob überhaupt drüber zredn. Und i hob probleme, ziemlich ernsthofte zum teil.
I bin oba a mensch zum reden, a mensch für “gott-und-die-welt-gespräche”.. im wahrsten sinne des wortes. I leb für longe gespräche, de ma stundenlong führen ko und wo ma am schluss immer des gefühl hod dass ma grod amoi an minimalen bruchteil von dem gsogt hod wos ma sogn woit.
I bin für jeden do, den i gern hob. Immer. Und i vasuach immer zu jeden nett zsei.. des muast echt moi schoffen dass i ernsthoft wos gegen di hob, do foit ma nemlich auf de gachn nedmoi der ei, bei dem i jeden grund dazua hett. I bin a guada zuhörer, hoffi. I bin zwoa ned guad im ratschläge gem, oba es kimmt doch aufs “do-sei” o oder?
I schreib. Wenns ma ned guad geht schreibi. Und bin donn immer enttäuscht dassi weit ned des ummabrocht hob wos i woit (jetzt is nix ondas). Mei bewunderung für menschen de texte schreim kinnan von desd direkt a ganslhaut kriagst is groß -so war i a gern.
I mecht de wöd verändern, bin oba sogoa zfaul dassi wos fiad schui lern. I tram von am leben, des auf olle kontinente stottfindet und i tram davo, in ana position zsei in der i wirklich wos bewegen ko, a wenn i nur zwoa drei menschen a guades leben schenken ko.
ajo, as leben, as leben söba is ma ned fü wert. wenni stirb, stirb i, koa so großes drama. Jeds leben is moi vorbei, des oane friara, des ondane spada. Des is ma nix wert. I leb liaba -wenns is a bis zum limit. I mechts gern auskostn, i mecht bungeejumpen und flieger fliang und segeln und paragliden und fü mehr reiten und i mecht reisen. I glaub i bin mit dem gedanken geboren dass i moi überoi hi mecht, i dat a leben mitn nötigsten und dafia in freiheit an leben mit verpflichtungen und dauerstress und dafia mit göd und luxus sowos von vorziang. Wenni mit da schui fertig bin mecht i moi irgendwo mit gonz wenig göd hifoan und donn mit an motorradl oder so herumfoan und olles seng und erleben und leit kennalerna und a moi togelong goa koan seng und i mecht durchn urwald und in de wälder von kanada wondan und i mecht in alaska mit de huskys schlittenfoan und i mecht am liabstn a zu de eisbean und pinguine und i wü noch afrika und leit höfn und i wü dass da kriag aufheat und i wü moi in new york leben und i wü gonz island obreiten und i mecht in de wüste und auf de märkte von marrakesch und i mecht in asien schifoan und in amerika und überoi wos geht -des freiheitsgefühl wennst gonz in da fruah über a frisch präparierte pisten carvst oder de erste spur durch an neich eigschneibtn tiafschneehong ziagst is sowieso mit nix aufzuwiegen.
oba im endeffekt denki ma so oft dass i mei leben niagends ondas vabringa mecht wia dahoam, weils oafoch so sche is.. trotzdem datis ned aushoitn immer do sei und nur do leben.. des dat mi auf dauer ned glücklich mochn, des woas i.
i bin ned bled, um ned zsong gscheid, owa i moch nix draus. es is traurig owa es is so.. i woas ned obs am thema liegt oder warum i monchmoi oafoch n i c h t s dua. I hob gonz wenig söbstdisziplin, des is oans von meine greßtn probleme, i geh füz sötn zum pferd (des i owa foi lieb hob), i üb zwenig horn, i moch zwenig sport, i lern zwenig fiad schui, i reiß mi beim essen zwenig zomm. Owa he- i oabat dro, wirklich.
so ernst und philosophisch gespräche mit mir sei kinnan, so sarkastischen bledsinn gib i a monchmoi von mir, bei dem schmoan ko ned jeder midhoitn -oba wonn, donn schau i ma drauf dass i den so guad wie möglich in mein leben ghoit.
I ko siaß sei, hobi söba ned glaubt, oba i ko echt vadommt liab sei. und genauso wies eig koana schofft dassi wos gegen erm hob homs nu ned fü gschofft dass mi ernsthoft aufreng, mei beste freindin hod moi gmoad dass fost unmöglich is mit mir streiten ozfonga, weili oafoch immer vasuach an grund und a lösung zfindn und weil i oafoch ned bes wia. monchmoi ned so guad für mi söwa oba es is so.. i bin so guad wie nie ernsthoft ogfressn auf wen, oiso wennstas schoffst dassd mi wütend mochst, oder mi überhaupt glei zum durchdrahn bringst donn host entweder a komplett hirnrissige aktion grissn oder du bist ma vadommt extrem wichtig.
oans nu: i bin wahnsinnig gern alloa. nix lieb i so wie zeit für mi zum hom- in ana kloarn nocht alloa durch a (verschneite) londschoft zgeh und oafoch nur do zsei und de sterne ozschaun is pures glück fia mi. Und jedes moi wenn i donn dahoam okimm mog i ned einigeh weil i koa dochflächenfenster hob, oiso wenni ma moi a haus bau wead mei schlofzimmer unta an dochfenster in an zimmer mit sichtdochstui sei. sowos von hundertprozentig. du muast guad sei dassdas schoffst dassi liaba mit dir zomm bin wia alloa, nur so am rande.
bei anregungen, wünschen oder beschwerden wendt di bitte ned an mi, weil wenn wer a problem mit mir hod is des ned mei problem.
