ForgottenWords

Alpabeto ng Pag-ibig

Gusto niyo bang matuto? Kakaibang uri ng alpabeto. Nagmula sa utak, hinugot sa puso. Bibig ang pumutak, pakinggan sana hanggang dulo.

Umpisahan natin sa unang letra. A. Ahh. Iyan ang daing ng mga kabataan, kanilang kasiyahan kapag nakakakita ng pogi. Ahh. Hindi matigil sa pagkandirit, namimilipit sa kilig, lalo na kapag ngumiti. A, para sa atraksyon, atraksyon na siyang dahilan kung bakit ka baliw ngayon.

Sunod sa listahan ay B para sa pagbati. Halos mapunit ang labi kakangiti, 'Magandang umaga, kumain ka na?' at dahil isa kang dakilang tanga, nagsimulang tumipa, 'Oo, tapos na. Ikaw ba?' B para sa pagbati, nag umpisa sa 'Magandang umaga' napunta sa 'Gusto kita' at nasundan pa ng, 'Mahal kita'. Pero hindi doon nagtatapos. Dahil ngayo'y ikaw ay nakasimangot, nagtataka, 'Bakit hindi pa siya sumasagot?' Nakakatakot. Nakakalungkot.

B. Ay para rin sa Bata, oo, para sayo. Kawawa. Kawawa, lumuluha, tumutula.

Dahil doon, ako'y nagalit. Kinimkim ang sakit. Hindi ko makuwento sa iba, ang halos dalawang linggo naming istorya. Pangit sa panlasa ang masabihan ng boba.

Pero ng muli kaming magkita, tinuloy ko sa C para sa chance. Sa tagalog ay tyansa. Salita na ilang ulit kong pinag isipan, dapat bang ibigay ko sa kaniya. Tyansa para sa isang tao na mahilig maglaro. Manloloko.

D. Dulo, oo, ako, tanga. Hahaha. Dahil binigay ko sayo ang tyansa. Nasa dulo nga talaga ang pag sisisi. Sa aking pagtaya, ako ay nalugi.

Matapos nanaman ng halos dalawang linggo, heto ako, nagdurugo, nadudurog ang puso. Pero pinilit ko, nasaan na ba ko, ay oo, E. Engganyo, dahil sa kaniya. Ako'y na engganyong tumula. Magsulat ng mga letra gamit ang mata, bumuo ng istorya dahil sa luha. Tumula, mangapa. Wala na kong madama.

Natapos na ang saamin, masakit man tanggapin, ang dating TAYO, ngayon ay ikaw na lang at ako.

Haay. Malapit na. Nandito na ko sa huling dalawang letra.

F. Faraya. Pigilan man ang pagtawa, iyan ay kakawala. Ako'y nagfaraya. Mali man ang umpisa pero iisa lang ang halaga. Sawa na 'ko. Pagod na 'ko. Oras na para sa king sarili, oras na para ako ang pumili.

Ngayon niya subukang tumawa, ayos lang kahit halakhak pa. Sumabay kayo sa patak ng luha galing sa 'king mata. Pasensya na.

A-B-C-D-E-F.U. Atraksyon. Bati. Bata. Chance. Dulo. Engganyo. Faraya. At U? Ulit sa umpisa.

Hindi ko alam ang mararamdaman, Kung bakit ba kinakabahan, Ano ba ang nangyayari? Puso ko'y di mapakali,

"May gusto akong sabihin sayo" Nakabitin sa ere ang mga salita mo, Ako ay nalilito, naguguluhan, Aamin ka na ba ng totoong nararamdaman?

Pero sino bang niloko ko Sarili ko nanaman, ang tanga ko Wala naman akong aasahan sayo, Nasa kaniya pa rin ang iyong puso,

Tila pagbitin ay lumagapak, Nahulog, nalunod sa lusak, Pagkatao ay mayroon nanamang biyak, Ilang gabi ang bibilangin para sa aking pag iyak?

"Alam ko na kung bakit niya ako niloloko" Sunod na ganap sa inyong kwento, Alam ko na kung bakit ako baliw sayo, Iyon ay dahil sa parehas lang tayo,

Nakakapit sa pag asang imahinasyon, Ayaw bumitaw sa gumuguhong relasyon, Masakit, mapait, nakakagalit, Sumisiksik sa utak kong pilit,

Bakit ba ayaw kong sumuko? Kahit na sinasampal na ako, Nang maraming katotohanan, Walang mabubuong pagmamahalan,

Ipilit mang hindi tayo tao, Pero hindi rin bagay, oo, Kulang-kulang na pagkatao, Binubuo ng mga maling piraso,

Aking sinabi, "Ayos lang yan", Sa wakas ay ngumiti ka, tayo'y nagyakapan, Pinilit pigilan ang mga luha, Hawak man kita, pero hindi pa rin makuha,

Makakahanap ka rin ng bago, Ngunit alam kong hindi iyon ako, Sapat na kaibigan lang ang turing mo, Basta tandaan mong nandito lang ako,

Nagmamahal, Nasasaktan, Nagiging hangal, Sayo ako ay nagtatanga-tangahan,

Mahal kita, mahal mo siya, May mahal naman siyang iba, Luhaan tayong pareho, Binabaliwala ng ating mundo,

Hindi ko ito gustong simulan. Hindi dahil ayokong masundan. O magkaroon ng pagkakalinawan. Kundi dahil takot ako sa katapusan.

Sa katapusan na laging nakabantay. Laging nakaantabay. Sa walang humpay na pag-aaway. Kung mauuwi ba sa bati at ngiti. O pagbubukludin ng hiwalay.

Hiwalay. Na siyang dahilan ng lamat. Sa puso kong dating tapat. Dahil ang sabi mo ang ‘ako’ ay sapat. Pero hindi ka pa rin nakuntento sa binigay kong lahat.

Oo, ang lahat-lahat mo. Ngiti at tawa. Dulot nito sa akin ay kakaibang saya. Pero ngayon ay puro na lang pagluha. Dahil alay mo na ‘to sa iba.

Iba. Ipinagpalit mo ko sa kaniya. Sige, ako na ang tanga. Tangina, naniwala akong kaibigan mo lang siya. Kasi iyon ang sabi mo kahit iba na ang bigkas ng iyong mata.

Pangalan na niya. Tanging mukha na lang niya ang iyong nakikita. Na dating ako, ako na lang ulit sana. Bakit nagkaganoon tayong dalawa. Bakit ang para sa dalawa ay dinagdagan mo pa ng isa?

Pogi: Lucky